លោកម៉ាក្រុងថាដំណើរការចាក់វ៉ាក់សាំងរបស់បារាំងនឹងតាមទាន់អង់គ្លេសឆាប់ៗ
ចំនួនប្រជាជនបារាំងដែលទទួលបានការចាក់វ៉ាក់សាំងបង្ការកូវីដ នឹងតាមទាន់ចំនួនប្រជាជនអង់គ្លេសនៅប៉ុន្មានសប្តាហ៍ខាងមុខ។ នេះគឺការលើកឡើងរបស់លោកប្រមុខរដ្ឋបារាំងអេម៉ានុយអែល ម៉ាក្រុង នៅថ្ងៃអាទិត្យ ២៨ មីនា ខណៈកំពុងមានជម្លោះជាមួយអង់គ្លេសជុំវិញការទទួលបានវ៉ាក់សាំងមិនទាន់ពេលកំណត់។
ចុះផ្សាយនៅថ្ងៃ៖
ស្តាប់ - ០២:៥៤
យុទ្ធនាការចាក់វ៉ាក់សាំងបង្ការកូវីដរបស់ប្រទេសបារាំងរងការរិះគន់ថាមានភាពយឺតយ៉ាវខ្លាំង។ បច្ចុប្បន្ន ប្រជាជនបារាំងចំនួនត្រឹមតែ ១១,៤៥% ប៉ុណ្ណោះទទួលបានការចាក់វ៉ាក់សាំងយ៉ាងហោចម្តង។ អត្រានេះមានចំនួនទាបបើធៀបនឹងប្រទេសអង់គ្លេសដែលអត្រាប្រជាជនទទួលបានការចាក់វ៉ាក់សាំងមាន ៤៣,៧៩ %។
យ៉ាងណាក្តី លោកប្រធានាធិបតីបារាំងបាននិយាយថា រដ្ឋាភិបាលបារាំងបានបង្កើនល្បឿននៃការចាក់វ៉ាក់សាំងរបស់ខ្លួន និងថាដំណើការចាក់វ៉ាក់សាំងរបស់អង់គ្លេសនឹងថមថយកម្លាំងនាពេលឆាប់ៗនេះ។ “ក្នុងរយៈពេលពីរបីសប្តាហ៍ទៀត យើងនឹងតាមទាន់អង់គ្លេស។ អង់គ្លេសដែលជាប្រទេសនឹងពឹងផ្អែកកាន់តែខ្លាំងឡើងលើអឺរ៉ុបដើម្បីអាចចាក់វ៉ាក់សាំងជូនប្រជាជនរបស់គេ”។ លោកម៉ាក្រុងបន្ថែម។
កំណត់សម្គាល់របស់លោកប្រមុខរដ្ឋបារាំងនេះ សំដៅដល់វ៉ាក់សាំង AstraZeneca ដែលត្រូវបានផលិតនៅក្នុងទឹកដីរបស់រដ្ឋជាសមាជិកសហភាពអឺរ៉ុប។ ការចេញមុខនិយាយជាលើកដំបូងរបស់លោកម៉ាក្រុងពាក់ព័ន្ធរឿងវ៉ាកសាំងនេះធ្វើឡើងក្រោយគណៈកម្មការអឺរ៉ុបបានសម្រេចពង្រឹងការត្រួតពិនិត្យលើការនាំចេញវ៉ាក់សាំងដែលផលិតឡើងនៅទឹកដីអឺរ៉ុប។
ដោយសារតែក្រុមហ៊ុនផលិតវ៉ាក់សាំង AstraZeneca មិនអាចបញ្ជូនវ៉ាក់សាំងគ្រប់ចំនួនឲ្យសហភាពអឺរ៉ុបតាមកាលកំណត់ អឺរ៉ុបបានគំរាមហាមក្រុមហ៊ុនមិនឲ្យនាំចេញវ៉ាក់សាំងទៅកាន់ប្រទេសអង់គ្លេស និងប្រទេសដទៃផ្សេងទៀតដែលទទួលបានការផ្គត់ផ្គង់វ៉ាក់សាំងច្រើនហើយ លុះត្រាតែក្រុមហ៊ុនអាចប្រគល់វ៉ាក់សាំងឲ្យអឺរ៉ុបស្របតាមកិច្ចសន្យា។
បារាំងដែលជាប្រទេសអឺរ៉ុបមួយកំពុងរងការរិះគន់ខ្លាំងជុំវិញការចាក់វ៉ាក់សាំងយឺតយ៉ាវនៅខណៈដែលករណីឆ្លងរាលដាលកូវីដកំពុងហក់ឡើងខ្លាំងក្នុងប្រទេសនោះ មិនសប្បាយចិត្តនិងបានរិះគន់អង់គ្លេស។
ការរិះគន់របស់បារាំងចំពោះអង់គ្លេសពាក់ព័ន្ធបញ្ហាផ្គត់ផ្គង់វ៉ាក់សាំងខកពេល ធ្លាក់មកក្រោយពេលដែលក្រុមវេជ្ជបណ្ឌិតនៅតាមមន្ទីរពេទ្យក្រុងប៉ារីស បានប្រកាសអាសន្នពីចំនួនអ្នកជំងឺកូវីដដែលនឹងអាចកើនឡើងចាល់ខ្លាំងក្នុងពេលឆាប់ៗ និងបានព្រមានថាបើចំនួនអ្នកជំងឺច្រើនហួសសមត្ថភាពអាចគ្រប់គ្រង់បាន នោះ ក្រុមគ្រូពេទ្យនឹងជៀសមិនរួចពីត្រូវបង្ខំចិត្តជ្រើសរើសថាតើអ្នកជំងឺណាដែលត្រូវសង្គ្រោះនោះទេ។
ទន្ទឹមនេះ ក្រុមគ្រូពេទ្យបារាំង បានអំនាវពាវផងដែរឲ្យរដ្ឋាភិបាលចាប់ពង្រឹងវិធានការតឹងរ៉ឹងជាងមុនដើម្បីការពារកុំឲ្យចំនួនអ្នកជំងឺកូវីដកើនឡើងខ្លាំងពេក។
គួរជ្រាបថាកាលពីថ្ងៃសៅរ៍ ប្រទេសបារាំងបានកត់ត្រាករណីឆ្លងកូវីដចំនួន ៤២ ៦១៩ ករណី។ ចំនួននេះ មានកម្រិតលើសច្រើនដងពីគោលដៅដែលកំណត់នៅចុងឆ្នាំ២០២០ ដោយរដ្ឋបាលរបស់លោកម៉ាក្រុងដែលចង់ឲ្យករណីឆ្លងប្រចាំថ្ងៃមានត្រឹម ៥០០០ ករណី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ