សម្តេចប៉ាបហ្វ្រង់ស័រ ថ្លែងសរសើរការតស៊ូអង់អាចរបស់យុវជនភូមា ដើម្បីលទ្ធិប្រជាធិបតេយ្យ
នៅក្នុងឱកាសបុណ្យប៉ាក់ (Pâques) ដែលជាបុណ្យដ៏សំខាន់មួយ សម្រាប់ អ្នកកាន់សាសនាកាតូលិក កាលពី ថ្ងៃអាទិត្យ ទី ៤មេសា សម្តេចប៉ាបហ្វ្រង់ស័រ បានមានសង្ឃដីការ ពីចំណុចសំខាន់២ គឺសង្រ្គាមប្រយុទ្ធគ្នា នៅក្នុងពិភពលោក ហើយនិងយុទ្ធនាការ ចាក់វ៉ាក់សាំង សម្រាប់បង្ការជំងឺកូវីដ១៩។ ជំងឺកូវីដដែលបានសម្លាប់មនុស្ស ជាង ២លាន ៨សែននាក់ នៅក្នុងពិភពលោក។ សម្រាប់ប្រមុខសង្ឃកាតូលិក ហ្វ្រង់ស័រ វាជារឿងអាស្រូវមួយខ្លាំងណាស់ ដែលគេ កំពុងប្រជែងសព្វាវុធ ធ្វើសង្រ្គាមប្រយុទ្ធគ្នា ទាំងក្នុងពេលដែលជំងឺកូវីដ ១៩ កំពុងឆ្លងរាតត្បាតខ្លាំង គ្មានលើកលែងប្រទេសណាមួយក្នុងពិភពលោក។ ថ្លែងពីវិហារ បុរីវ៉ាទីកង់ សម្តេចប៉ាប មានសង្ឃដីការផងដែរពីព្រឹត្តិការណ៍កំពុងកើតមាននៅភូមា។
ចុះផ្សាយនៅថ្ងៃ៖
ស្តាប់ - ០២:៣៨
“ជំងឺរាតត្បាតកូវីដកំពុងបន្តលុកលុយពេញពិភពលោក។ វិបត្តិសង្គម សេដ្ឋកិច្ចកាន់តែធ្លាក់ធ្ងន់ធ្ងរ ជាពិសេស នៅបណ្តាប្រទេសក្រីក្រ។ ប៉ុន្តែ ប៉ុណ្ណឹងហើយ និងជារឿងអាស្រូវបំផុត ជម្លោះប្រដាប់អាវុធ និងការប្រកួតប្រជែង ពង្រឹងសព្វាវុធ នៅតែកើតមាន មិនឈប់ឈរ”។ សម្តេចប៉ាប ហ្រ្វង់ស័រ បានថ្លែងរិះគន់យ៉ាងដូច្នេះ នៅក្នុងឱកាសពិធីបុណ្យប៉ាក់ Pâquesរៀបចំនៅ បុរីវ៉ាទីកង់ កាលពី ថ្ងៃអាទិត្យ។
សម្តេចប៉ាប បានមានសង្ឃដីកាដល់សង្រ្គាមនៅស៊ីរី យេម៉ែន ដែលបានជំរុញឲ្យប្រជាជនរាប់លាននាក់ ធ្លាក់ខ្លួន រស់ក្នុងលក្ខខណ្ឌមិនមែនមនុស្ស។ សម្រាប់ សម្តេចប៉ាបហ្រ្វង់ស័រ ពិភពលោក បានធ្វើគថ្លង់ បិទភ្នែកមើលឃើញ ហេតុការណ៍កំពុងកើតមាននៅ ប្រទេសយេម៉ែន និងនៅលីប៊ី ជាទីសង្រ្គាមបង្ហូរឈាមគ្នា បានអូសបន្លាយពេល ១០ឆ្នាំមកហើយ។
នៅក្នុង បទអន្តរាគមន៍ របស់ព្រះអង្គ ទៅកាន់មន្រ្តីសង្ឃ កាតូលិក តិច ជាង ២០០នាក់ នៅ វិហារ St. Peter's Basilica សម្តេចប៉ាប បានមានសង្ឃដីកាពីព្រឹត្តិការណ៍ដែលកំពុងកើតឡើងនៅប្រទេសភូមា ជាទី ដែលបាតុករ បានរងការបង្រ្កាប សម្លាប់បង្ហូរឈាម ពីសំណាក់កងទ័ពភូមា។ នៅត្រង់ចំណុចនេះ ប្រមុខសង្ឃកាតូលិក បានថ្លែងសរសើរភាពក្លាហាន និងការតស៊ូអង់អាចរបស់យុវជនភូមា ដើម្បី លទ្ធិប្រជាធិបតេយ្យ និងបានអំពាវនាវឲ្យ កងទ័ព ស្តាប់លឺ ធ្វើតាមការទាមទារ របស់បាតុករ ដើម្បីស្តារលទ្ធិប្រជាធិបតេយ្យ។
នៅមុនប្រោសប្រទានពរ សម្រាប់ទីក្រុងរ៉ូម និងនៅពិភពលោកទាំងមូល សម្តេចប៉ាប ហ្វ្រង់ស័រ បានចំណាយបទអន្តរាគមន៍របស់ព្រះអង្គ នៅក្នុងពិធីបុណ្យប៉ាក់ Pâques សម្រាប់ប្រជាជនក្រីក្រ អ្នកជំងឺកូវីដ ជនអន្តោប្រវេសន៍ ប្រជាជនដែលធ្លាក់ខ្លួនក្រីក្រដោយសារវិបត្តិកូវីដ និងប្រជាជនដែលរងគ្រោះដោយសារសង្រ្គាមនៅស៊ីរី យេម៉ែន លីប៊ី និងនៅតំបន់អាហ្រ្វិក ជាពិសេស តំបន់ទីហ្រ្កេ ក្នុងប្រទេសអេត្យូពី។
ក្រៅពីអំពាវនាវឲ្យគេឈប់ប្រយុទ្ធគ្នា និងឈប់ ប្រជែងពង្រឹងសព្វាវុធ ប្រល័យជីវិតមនុស្ស សម្តេចប៉ាបបានទទូចសុំផងដែរ ឲ្យមានការបែងចែកវ៉ាក់សាំងកូវីដ ដោយស្មើភាពគ្នា ជាពិសេស សម្រាប់ប្រទេសក្រីក្រ។ ដោយថ្លែងកោតសរសើរដឹងគុណ គ្រូពេទ្យ និងបុគ្គលិកពេទ្យដែលឈរនៅជួរមុខ ក្នុងការប្រឈមនឹងជំងឺកូវីដ សម្តេចប៉ាបហ្រ្វង់ស័របានសង្កត់ធ្ងន់ថា មានតែវ៉ាក់សាំង ដែលជាដំណោះស្រាយសំខាន់ សម្រាប់ ច្រកចេញពីវិបត្តិកូវីដលើកនេះ។ ដូច្នេះ “នៅក្នុងស្មារតី ប្រើប្រាស់វ៉ាក់សាំង នៅទូទាំងពិភពលោក ព្រះអង្គទាមទារឲ្យសហគមន៍អន្តរជាតិរួបរួមគ្នា ដើម្បី ពន្លឿនការចែកចាយវ៉ាក់សាំង និងផ្តល់អាទិភាពដល់ប្រទេសដែលក្រីក្រជាងគេបំផុត”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ