Amnesty International រិះគន់បារាំងពីការលក់អាវុធឲ្យអេហ្ស៊ីបដែលជាប្រទេសល្បីខាងរំលោភសិទ្ធិមនុស្ស
ប្រទេសបារាំងបានបញ្ជាក់ជាផ្លូវការនាថ្ងៃអង្គារ ទី៤ ឧសភាថា ប្រទេសអេហ្ស៊ីបពិតជាបានទិញយន្តហោះចម្បាំងរ៉ាហ្វាល់ចំនួន ៣០គ្រឿង និងគ្រឿងសព្វាវុធមួយចំនួនដែលមានតម្លៃសរុប ៣ ៩៥០លានដុល្លារ។ រដ្ឋមន្រ្តីក្រសួងការពារជាតិបារាំងបានសាទរដោយចាត់ទុកជាការពង្រឹងដៃគូយុទ្ធសាស្រ្តយោធារវាងប្រទេសទាំងពីរ។ ចំណែករដ្ឋាភិបាលបារាំងបានយល់ឃើញថា កិច្ចព្រមព្រៀងទិញអាវុធបារាំងពីអេហ្ស៊ីបពេលនេះជាប្រយោជន៍សេដ្ឋកិច្ច និងសន្តិសុខ។ តែអង្គការសិទ្ធិមនុស្ស Amnesty International មិនបានយល់ឃើញដូចនេះទេ។ លោកអេមេរិក អេល្វ័ង មន្រ្តី Amnesty International បានបញ្ជាក់ថា ការដែលបារាំងលក់គ្រឿងសព្វាវុធឲ្យអេហ្ស៊ីបជាការបិទភ្នែក និងបើកភ្លើងខៀវឲ្យប្រទេសនេះបន្តរំលោភសិទ្ធិមនុស្ស និងបំពានលើច្បាប់អន្តរជាតិ។
ចុះផ្សាយនៅថ្ងៃ៖
ស្តាប់ - ០១:៤១
« គេបានដឹងថា អេហ្ស៊ីបជាប្រទេសល្បីខាងរំលោភសិទ្ធិមនុស្សអាក្រក់ខ្លាំងជាងគេក្នុងលោក។ ពិតណាស់នៅក្នុងសេចក្តីថ្លែងការណ៍របស់ក្រសួងការបរទេសបារាំង បារាំងបានចាត់ទុកបញ្ហាសិទ្ធិមនុស្សជារឿងអាទិភាព។ តែអ្វីដែលបារាំងកំពុងធ្វើពេលនេះដោយលក់យន្តហោះចម្បាំងរ៉ាហ្វាល់ និងគ្រឿងសព្វាវុធទៅឲ្យអេហ្ស៊ីប គឺមានន័យស្មើនឹងផ្តល់ការគាំទ្រដល់របបដឹកនាំក្រុងគែរសព្វថ្ងៃ។
នរណាក៏ដឹងដែរថា របបដឹកនាំមួយនេះកំពុងរំលោភសិទ្ធិមនុស្សតាមរយៈការធ្វើទារុណកម្ម និងការបំបាត់ខ្លួនមនុស្សដោយបង្ខំ។ ដូច្នេះសួរថា តើទង្វើរបស់បារាំងដែលលក់គ្រឿងសព្វាវុធឲ្យអេហ្ស៊ីបពេលនេះបានទទួលការធានាពីអេហ្ស៊ីបស្អីខ្លះ?។ តើមានការធានាទេថា យន្តហោះចម្បាំងរ៉ាល់ហ្វាល់នឹងមិនបានយកទៅប្រើដោយរំលោភបំពានច្បាប់អន្តរជាតិ។ ឧទាហរណ៍នៅក្នុងប្រទេសលីប៊ី។
តើបារាំងបានទទួលការធានាអ្វីខ្លះពីអេហ្ស៊ីបដែលថា អេហ្ស៊ីបនឹងគោរពច្បាប់អន្តរជាតិឲ្យមានលក្ខណៈទូលំទូលាយ ព្រោះចូរកុំភ្លេចថា អេហ្ស៊ីបបានរំលោភរួចស្រេចទៅហើយលើទណ្ឌកម្មអាវុធសម្រាប់ប្រទេសលីប៊ី។ ទាំងនេះសុទ្ធសឹងជាសំណួរដែលគេត្រូវទទួលបានចម្លើយធានាមុនពីអេហ្ស៊ីប។ ឃើញថាទីបំផុតទៅ និងអ្វីដែលគួរឲ្យព្រួយបារម្ភខ្លាំងថ្ងៃនេះ អេហ្ស៊ីបធ្វើអ្វីៗស្រេចតែនឹងចិត្ត។
ដូច្នេះ ភ្លើងខៀវដែលបារាំងបានយល់ព្រមប្រគល់ឲ្យអេហ្ស៊ីបគឺថា អស់លោកធ្វើអីធ្វើទៅជាមួយប្រជាជនខ្លួនឯង យើងនឹងបន្តលក់អាវុធឲ្យអស់លោក ហើយអស់លោកអាចបន្តពឹងពាក់លើយើង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ