អង្គការសុខភាពពិភពលោក ៖ គ្រូបង្រៀនត្រូវមានអាទិភាព ទទួលវ៉ាក់សាំងប្រឆាំងកូវីដ
ក្រុមអ្នកជំនាញអង្គការសុខភាពពិភពលោកធ្លាប់បានលើកឡើងអំពីអាទិភាពរបស់គ្រូបង្រៀន តាំងពីខែវិច្ឆិកា២០២០មក។ នៅថ្ងៃចន្ទទី ៣០សីហា ២០២១ អង្គការសុខភាពពិភពលោក និងអង្គការយូនីសេហ្វ បានជំរុញជាថ្មី ឱ្យចាត់ទុក ក្រុមគ្រូបង្រៀន និងបុគ្គលិកធ្វើការនៅក្នុងសាលា ជាក្រុមមានអាទិភាព ក្នុងទទួលថ្នាំបង្ការប្រឆាំងនឹងជំងឺកូវីដ១៩។ ធ្វើយ៉ាងដូច្នេះប្រទេសនីមួយៗអាចរៀបចំផែនការយុទ្ធសាស្ត្រ ឱ្យសិស្សានុសិស្សអាចចូលរៀនក្នុងថ្នាក់ដូចធម្មតាបាន។
ចុះផ្សាយនៅថ្ងៃ៖
“ត្រូវតែផ្តល់វ៉ាក់សាំងប្រឆាំងកូវីដ១៩ ដល់ក្រុមគ្រូបង្រៀន និងបុគ្គលិកធ្វើការក្នុងសាលារៀនទាំងអស់ ក្នុងនាមជាក្រុមមានអាទិភាពក្នុងផែនការចាក់ថ្នាំបង្ការជាតិ។ នេះជាសេចក្តីថ្លែងការណ៍របស់ស្ថាប័នអង្គការសុខភាពពិភពលោកប្រចាំអឺរ៉ុប និងអង្គការយូនីសេហ្វ ដែលអំពាវនាវឱ្យរដ្ឋជាសមាជិកទាំងអស់ ត្រូវតែដាក់ឱ្យដំណើរការយុទ្ធសាស្ត្រចាក់ថ្នាំបង្ការ ឱ្យបានត្រឹមត្រូវ ដើម្បីឱ្យសិស្សានុសិស្សអាចមកអង្គុយរៀនក្នុងថ្នាក់បាន មិនមែនរៀនពីចម្ងាយនៅតាមផ្ទះ។
ទោះបីជាមេរោគកូវីដបំប្លែងខ្លួនដែលតា ឆ្លងខ្លាំង យ៉ាងណាក៏ដោយ ក៏សាលារៀនចាំបាច់ត្រូវតែបន្តបើកទ្វារ ព្រោះការសិក្សារៀនសូត្រជាទន់ជាសុខភាពខួរក្បាល និងជាយានសម្រាប់អនាគតដ៏សំខាន់បំផុតរបស់កុមារ។ សាលារៀនជាចំណែកមួយដែលជំរុញឱ្យក្មេងមានភាពរីករាយនិងមានផលិតភាពក្នុងសង្គម។ បើតាមលោកនាយកអង្គការសុខភាពពិភពលោកប្រចាំតំបន់អឺរ៉ុប ជំងឺរាតត្បាតសកលកូវីដ១៩ បានធ្វើឱ្យសិក្សាអប់រំនៅលើពិភពលោកជួបភាពរអាក់ខ្លួនខ្លាំងបំផុតមិនធ្លាប់មានក្នុងប្រវត្តិសាស្ត្រនៃវិស័យអប់រំ។
ដើម្បីឱ្យសាលារៀននៅតែអាចបើកទ្វារទទួលសិស្សានុសិស្សបាន អង្គការសុខភាពពិភពលោកអឺរ៉ុបនិងការិយាល័យអង្គការយូនីសេហ្វប្រចាំអឺរ៉ុបនិងអាស៊ីកណ្តាល បានអំពាវនាវឱ្យប្រទេសជាសមាជិកទាំងអស់ ធានាគិតគូរចាក់ថ្នាំបង្ការដល់ក្មេងអាយុចាប់ពី១២ឆ្នាំឡើងទៅផង និងត្រូវលើកតម្កើងបរិយាកាសក្នុងថ្នាក់រៀនឱ្យមានខ្យល់ចេញចូលវិលប្តូរផ្លាស់បានប្រសើរជាងមុន រក្សាគន្លាត ធ្វើតេស្តសិស្ស និងបុគ្គលិកមើលសិស្សជាញយ។
នៅក្នុងអនុសាសន៍ចេញផ្សាយកាលពីដើមខែកក្កដា សិស្សណាមានរោគសញ្ញា និងស្ថិតនៅក្នុងក្រុមប្រឈមហានិភ័យ ត្រូវមានអាទិភាពទទួលធ្វើតេស្តរកកូវីដ១៩។ បន្ទាប់ឈប់សម្រាកវិស្សមកាលអស់ពីរខែ សិស្សានុសិស្សនៅអឺរ៉ុបត្រូវត្រលប់ចូលសាលារៀន នៅសប្តាហ៍នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ