បារាំង-អង់គ្លេស៖លោកម៉ាក្រុងវាយបកលោកចនសុនក្នុងរឿងសោកនាដកម្មស្លាប់ជនអន្តោប្រវេសន៍ចំនួន ២៧នាក់
ប្រទេសបារាំង និងប្រទេសអង់គ្លេសកំពុងបន្តដំឡើងសំឡេងដាក់គ្នាក្នុងរឿងស្លាប់ជនអន្តោប្រវេសន៍ចំនួន ២៧នាក់ដោយលង់ទឹកសមុទ្រ។ រឿងរ៉ាវមួយនេះបានកើតមាននៅយប់ថ្ងៃពុធ ទី២៤ វិច្ឆិកា ខណៈដែលមានជនអន្តោប្រវេសន៍មួយក្រុមបានជិះទូកចេញពីក្រុងកាឡេទឹកដីបារាំងឆ្ពោះទៅកាន់ទឹកដីអង់គ្លេស។ នៅថ្ងៃអាទិត្យ ទី២៨ វិច្ឆិកា បារាំងគ្រោងរៀបចំកិច្ចប្រជុំថ្នាក់រដ្ឋមន្រ្តីមហាផ្ទៃអឺរ៉ុប បូកនឹងអង់គ្លេសដើម្បីនិយាយពីបញ្ហានេះ។ តែទីបំផុត រដ្ឋាភិបាលបារាំងបានដកការអញ្ជើញពីអង់គ្លេសវិញ ក្រោយនាយករដ្ឋមន្រ្តីអង់គ្លេសលោកបូរីស ចនសុនបានស្នើតាមលិខិតមួយឲ្យបារាំងយកត្រឡប់វិញនូវជនអន្តោប្រវេន៍ខុសច្បាស់ដែលបានចូលក្នុងទឹកដីអង់គ្លេស។ ចំណែកប្រធានាធិបតីបារាំងលោកម៉ាក្រុងបានវាយប្រហារលោកចនសុនដោយអះអាងក្នុងថ្ងៃសុក្រ ទី២៦ វិច្ឆិកាថា លោកមានការភ្ញាក់ផ្អើលចំពោះវិធីសាស្រ្តរបស់លោកចនសុនដែលលេងសើច និងមិនប្រាកដប្រជា។
ចុះផ្សាយនៅថ្ងៃ៖
ស្តាប់ - ០១:៤៣
« អ្វីដែលបានកើតមានឡើងនារយៈពេលប៉ុន្មានថ្ងៃចុងក្រោយនេះ គឺធ្ងន់ធ្ងរខ្លាំងណាស់។ ចម្លើយពិតប្រាកដចំពោះបញ្ហានេះ គឺមាននៅក្នុងកិច្ចសហប្រតិបត្តិការមួយប្រាកដប្រជា ច្បាស់លាស់ដើម្បីបង្ការទប់កុំឲ្យមានរឿងនេះកើតឡើងជាថ្មី និងដើម្បីគាស់រំលើងបណ្តាញក្រុមរត់ពន្ធមនុស្ស។ ការធ្វើយ៉ាងនេះគឺដើម្បីចៀសវាងកុំឲ្យមនុស្សប្រុស ស្រីចូលមកដល់ក្នុងទឹកដីរបស់យើង ព្រោះវាពិតជាយឺតពេលទៅហើយនៅពេលដែលពួកគេបានមកដល់ទីនេះ។
កាលពី ២ថ្ងៃមុន ខ្ញុំបានជជែកជាមួយនាយករដ្ឋមន្រ្តីអង់គ្លេសលោកចនសុនដោយប្រាកដប្រជា។ សម្រាប់ខ្ញុំ ខ្ញុំបន្តអនុវត្តនូវអ្វីដែលខ្ញុំបានធ្វើជាមួយប្រទេសទាំងអស់ និងថ្នាក់ដឹកនាំទាំងអស់។ តែខ្ញុំមានការភ្ញាក់ផ្អើលចំពោះវិធីសាស្រ្តទាំងឡាយណាដែលលេងសើច មិនប្រាកដប្រជា។ គេមិនដែលឆ្លងឆ្លើយពីថ្នាក់ដឹកនាំម្នាក់ទៅថ្នាក់ដឹកនាំម្នាក់ទៀតលើបញ្ហានេះតាមរយៈបណ្តាញសង្គម ឬមួយក៏តាមរយៈលិខិតប្រកាសជាសាធារណៈនោះឡើយ។
យើងមិនមែនជាអ្នកប្រកាសសញ្ញាអាសន្នណាមួយទេ។ តោះយើង តោះយើង។ ដូច្នេះបណ្តារដ្ឋមន្រ្តីនឹងធ្វើការងារដោយប្រាកដប្រជាដើម្បីដោះស្រាយបញ្ហាដោយប្រាកដប្រជា និងជាមួយក្រុមមនុស្សប្រាកដប្រជា។ គឺនៅក្នុងន័យនេះហើយបានជារដ្ឋមន្រ្តីមហាផ្ទៃបារាំងលោកដារម៉ាណាំងនឹងរួមប្រជុំរដ្ឋមន្រ្តីមហាផ្ទៃអឺរ៉ុប និងគណៈកម្មាធិការអឺរ៉ុបចាប់ពីថ្ងៃអាទិត្យ ទី២៨ វិច្ឆិកាដើម្បីធ្វើការងារនេះ។
បន្ទាប់មកយើងនឹងមើលជាមួយអង់គ្លេសថាតើត្រូវធ្វើយ៉ាងម៉េចដើម្បីដោះស្រាយបញ្ហានេះឲ្យមានប្រសិទ្ធិភាព ប្រសិនបើអង់គ្លេសសម្រេចចិត្តជាអ្នកចង់ដោះស្រាយបញ្ហានេះដោយប្រាកដប្រជា »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ