ប្រមុខការទូតអឺរ៉ុប៖អឺរ៉ុបចង់បន្តបេសកកម្មយោធានៅម៉ាលី តែមិនមែនបន្តក្នុងតម្លៃណាមួយនោះទេ
នៅថ្ងៃព្រហស្បតិ៍ ទី១៣ មករា បារាំងក្នុងនាមជាប្រធានផ្លាស់វេនសហភាពអឺរ៉ុបរយៈពេល ៦ខែបានរៀបចំកិច្ចប្រជុំថ្នាក់រដ្ឋមន្រ្តីការពារជាតិអឺរ៉ុប។ ថ្លែងនៅក្នុងសន្និសីទកាសែតនាកិច្ចប្រជុំ ប្រមុខការទូតអឺរ៉ុបលោកហ្សូសេព បូរែលបានលើកឡើងពីស្ថានការណ៍ធ្ងន់ធ្ងរនៅក្នុងប្រទេសម៉ាលី។ ការលើកយ៉ាងដូចនេះរបស់លោកបូរែលបានធ្វើឡើង ខណៈដែលរបបសឹកម៉ាលីបន្តបដិសេធមិនរៀបចំបោះឆ្នោតឆាប់រហ័សដើម្បីប្រគល់អំណាចទៅឲ្យស៊ីវិល។ តាមប្រមុខការទូតអឺរ៉ុប អឺរ៉ុបនឹងបន្តតាមដានស្ថានការណ៍នៅម៉ាលី និងមិនញញើតដាក់ទណ្ឌកម្មចាស់ដៃលើរបបសឹកម៉ាលីទេ។ ទន្ទឹមគ្នានេះ លោកបូរែលមិនភ្លេចបញ្ជាក់ពីបំណងរបស់អឺរ៉ុបក្នុងការបន្តបេសកកម្មយោធានៅម៉ាលី តែនឹងមិនធ្វើឡើងនៅក្នុងតម្លៃណាមួយនោះឡើយ។
ចុះផ្សាយនៅថ្ងៃ៖
ស្តាប់ - ០១:៤៤
« ស្ថានការណ៍នៅក្នុងប្រទេសម៉ាលីធ្លាក់កាន់តែធ្ងន់ធ្ងរទៅៗ។ យើងនឹងបន្តតាមដានមើលស្ថានការណ៍នៅក្នុងប្រទេសនេះដោយយកចិត្តទុកដាក់ជាទីបំផុត និងចាត់វិធានការជាអចិន្ត្រៃយ៍។ បើគេមើលលើចំណាត់ការដែលអនុម័តដោយសហគមន៍សេដ្ឋកិច្ចនៃរដ្ឋអាហ្រ្វិកខាងលិច (Cédéao) យើងនឹងចាត់វិធានការដូចគ្នានេះ។
ទោះបីជាមានការព្រមានលើរដ្ឋអំណាចម៉ាលីច្រើនដងក៏ដោយ ក៏យើងមិនទាន់បានឃើញមានសញ្ញាចម្រើនទៅមុខណាមួយសោះ។ សម្រាប់ពេលនេះ បេសកកម្មបណ្តុះបណ្តាល និងផ្តល់យោបល់របស់យើងចំពោះកងទ័ព និងកងកម្លាំងសន្តិសុខផ្ទៃក្នុងនៅម៉ាលីនឹងបន្តធ្វើ។
ក៏ប៉ុន្តែ យើងបានផ្អាកជំនួយថវិកាចំពោះរដ្ឋអំណាចម៉ាលី។ ដោយឡែក ជំនួយសម្រាប់ពលរដ្ឋម៉ាលីតាមរយៈកម្មវិធីជំនួយអភិវឌ្ឍន៍មិនត្រូវបានផ្អាកទេ។ ដរាបណារបបសឹកម៉ាលីមិនប្រកាសពីថ្ងៃ ខែរៀបចំបោះឆ្នោតថ្មីទេ ដរាបនោះយើងនឹងមិនផ្តល់ជំនួយថវិកាឲ្យរដ្ឋអំណាចម៉ាលីឡើយ។
ថ្ងៃនេះ បណ្តារដ្ឋមន្រ្តីការពារជាតិអឺរ៉ុបបានបញ្ជាក់ច្បាស់ហើយថា យើងចង់បន្តបេសកកម្មនៅម៉ាលី យើងចង់បន្តបេសកកម្មនៅតំបន់សាហ៊ែល។ យើងកំពុងបំពេញបេសកកម្មនេះ។ តែការបន្តបេសកកម្មនេះមិនចេះតែធ្វើឡើងនៅក្នុងតម្លៃណាមួយនោះឡើយ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ