NGO ចង្អុលមុខក្រុមហ៊ុនធំៗថាមិនគោរពពាក្យសន្យាការពារព្រៃឈើ ដើម្បីអាកាសធាតុ
ក្រុមហ៊ុនធំៗ និងសហគ្រាសហិរញ្ញវត្ថុ ដែលមានសក្តានុពលខ្លាំង មិនបានបញ្ចេញសកម្មភាពប្រឆាំងនឹងការកាប់ព្រៃឈើ ដូចបានសន្យា នៅក្នុងសន្និសីទអន្តរជាតិស្តីពីអាកាសធាតុ COP២៦ទេ។ នេះបើតាមរបាយការណ៍ចេញផ្សាយនៅថ្ងៃព្រហស្បតិ៍ទី ១៣ មករា ២០២២ ដែលបានចង្អុលមុខក្រុមហ៊ុនសហគ្រាសនិងអ្នកផ្តល់ហិរញ្ញវត្ថុដោយចំៗតែម្តងផង។
ចុះផ្សាយនៅថ្ងៃ៖
ស្តាប់ - ០២:០៥
នៅក្នុងរបាយការណ៍ អង្គការក្រៅរដ្ឋាភិបាល Global Canopy បានចង្អុលមុខក្រុមហ៊ុនសហគ្រាសចំនួន ៣៥០ និង អ្នកផ្តល់ហិរញ្ញវត្ថុ ចំនួន ១៥០ ដែលជាធនាគារ មូលនិធិវិនិយោគ ឬមូលនិធិសោធន ថាមានជាប់ពាក់ព័ន្ធដោយផ្ទាល់ និងដោយប្រយោលនឹងការកាប់ព្រៃឈើ។ មួយភាគបីនៃក្រុមហ៊ុនដែលអង្គការបានចុះទៅសិក្សា គ្មានគោលការណ៍ ឬគម្រោងផែនការការពារព្រៃឈើទេ។ ៧២% ផ្សេងទៀត មានផែនការប្តេជ្ញាមិនកាប់ព្រៃឈើ ខ្លះដែរ តែមិនលើគ្រប់ផលិតផលនិងគ្រប់ដំណាក់នៃសង្វាក់ផលិតកម្មរបស់ខ្លួនទេ។
ប៉ុន្តែទោះបីជាបានសន្យា ដោយចំៗ ថាមិនធ្វើកសិកម្ម សណ្តែក សាច់គោ និងស្បែក ដែលនាំដល់ការកាប់ព្រៃឈើក៏ដោយ ក៏ក្រុមហ៊ុនមិនអាចផ្តល់ភស្តុតាងជាក់ស្តែងបញ្ជាក់អំពីដំណើរផលិតកម្មរបស់គេបានដែរ។ នេះបើតាមរបាយការណ៍ដដែល ដែលបញ្ជាក់ទៀតថា មានក្រុមហ៊ុនតិចតួចណាស់ដែលទទួលស្គាល់អំពីហានិភ័យអាកាសធាតុបង្កឡើងដោយការកាប់ព្រៃឈើ និងបូកបញ្ចូលបណ្តាញសង្វាក់ផលិតកម្ម ក្នុងការវាយតម្លៃហានិភ័យអាកាសធាតុនោះ។
ក្រុមហ៊ុនដែលមានសកម្មភាពការពារព្រៃឈើគ្រាន់បើជាងគេ គឺ Cargill, Colgate-Palmolive, Nestle, Unilever និងPepsiCo។
ចំណែកស្ថាប័នហិរញ្ញវត្ថុទាំង១៥០ ដែលបានចំណាយថវិកាដល់ទៅជាង ៥៥០០ពាន់លានដុល្លារក្នុងមួយឆ្នាំៗឱ្យក្រុមហ៊ុនទាំង៣៥០នេះវិញក៏គ្មានគិតគូរការពារព្រៃឈើដូចគ្នា។ បើតាមរបាយការណ៍ ស្ថាប័នហិរញ្ញវត្ថុចំនួន ៩៣លើ១៥០ គ្មាននយោបាយប្រឆាំងនឹងការកាប់ព្រៃឈើ សម្រាប់ផ្តល់វិនិយោគឬកម្ចីដល់ក្រុមហ៊ុនដែលមានផលិតកម្មប៉ះពាល់ខ្លាំងនឹងព្រៃឈើទេ។ មានតែម្ភៃធនាគារប៉ុណ្ណោះ ដែលមានគម្រោងវាយតម្លៃសកម្មភាពគោរពព្រៃឈើរបស់កូនបំណុល។
អង្គការក្រៅរដ្ឋាភិបាល Global Canopy បានរំលឹកថា ការកាប់ព្រៃ ធ្វើកសិកម្មដាំដូងប្រេង ដាំសណ្តែក ចិញ្ចឹមសត្វ ឬយកឈើ ជាការគំរាមកំហែងត្រីមុខ ៖ គំរាមកំហែងអាកាសធាតុផង គំរាមកំហែងសហគមន៍តំបន់/មូលដ្ឋានផង និងជីវចម្រុះទៀត។ ការកាប់ព្រៃឈើ ត្រូពិក ជា ការបញ្ចេញឧស្ម័នបំពុលបរិយាកាស ធំលំដាប់ទីបី បន្ទាប់ពីចិន និងសហរដ្ឋអាមេរិក និងច្រើនជាងការបញ្ចេញផ្សែងពុលរបស់សហភាពអឺរ៉ុបនិងឥណ្ឌាទៅទៀត។ បញ្ឈប់កសិកម្មដែលជំរុញឱ្យមានការកាប់ព្រៃឈើ អាចកាត់បន្ថយការបញ្ចេញឧស្ម័នកាបូកនិកបានមួយជាពីរ។ ស្តារជីវចម្រុះដែលខូចខាតពីការកាប់ព្រៃឈើ ឱ្យបាននៅឆ្នាំ២០៣០ មិនមែនជាជម្រើស តែជាភាពចាំបាច់ ក្នុងការឈានឆ្ពោះទៅរកអព្យាក្រិត្យភាពកាបោន។ ពុំនោះទេ ពិភពលោកមិនអាចកំរិតការឡើងកម្តៅអាកាសធាតុនៃភពផែនដីត្រឹម១,៥អង្សា បើប្រៀបទៅនឹងសម័យមុនឧស្សាហកម្ម ដូចមានចែងក្នុងកិច្ចព្រមព្រៀងអាកាសធាតុក្រុងប៉ារីសបានទេ។ នេះបើតាមសេចក្តីថ្លែងការណ៍របស់អង់គ្លេស ក្នុងសន្និសីទអាកាសធាតុCOP២៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ