អង់គ្លេស៖ព្រះមហាក្សត្រីយានី Elizabeth II ឆ្លងកូវីដ១៩ តែមានរោគសញ្ញាស្រាល
នៅក្នុងប្រទេសអង់គ្លេស ព្រះបរមរាជវាំងបានប្រកាសឲ្យដឹងក្នុងថ្ងៃអាទិត្យ ទី២០ កុម្ភៈថា ព្រះមហាក្សត្រីយានី Elizabeth II ដែលមានព្រះជន្ម ៩៥វស្សាបានឆ្លងកូវីដ១៩ តែមានរោគសញ្ញាស្រាល។ ទោះជាយ៉ាងនេះក្តី ដំណឹងនេះបានធ្វើឲ្យមហាជនអង់គ្លេសទូទៅបារម្ភពីសុខភាពរបស់ព្រះមហាក្សត្រីយានី Elizabeth II ដែលទើបប្រារព្ធខួប ៧០ឆ្នាំនៃការឡើងសោយរាជ្យ និងជាព្រះមហាក្សត្រីយានីដ៏ល្បីល្បាញជាងគេលើលោក។ នាយករដ្ឋមន្រ្តី និងសមាជិកក្នុងរដ្ឋាភិបាលអង់គ្លេសបានជូនពរព្រះមហាក្សត្រីយានីឲ្យឆាប់ជា និងមានព្រះរាជសុខភាពល្អឡើងវិញ។
ចុះផ្សាយនៅថ្ងៃ៖
ស្តាប់ - ០២:២២
គឺតាមរយៈសេចក្តីប្រកាសព័ត៌មានមួយចេញផ្សាយក្នុងថ្ងៃអាទិត្យ ទី២០ កុម្ភៈដែលព្រះបរមរាជវាំងបានបញ្ជាក់ពីលទ្ធផលតេស្តិ៍វិជ្ជមានកូវីដ១៩ របស់ព្រះមហាក្សត្រីយានី Elizabeth II។ សេចក្តីប្រកាសព័ត៌មានដដែលបានបន្ថែមថា រោគសញ្ញាដែលព្រះមហាក្សត្រីយានី Elizabeth II មានជារោគសញ្ញាស្រាលៗដូចរោគសញ្ញាផ្តាសាយធម្មតា។ ទោះជាយ៉ាងនេះក្តី ព្រះមហាក្សត្រីយានី Elizabeth II មានព្រះសុខភាពល្អ និងបន្តស្ថិតក្រោមការតាមដានមើលពីក្រុមគ្រូពេទ្យយ៉ាងយកចិត្តទុកដាក់ជាទីបំផុត។ តាមសារព័ត៌មានអង់គ្លេស ព្រះមហាក្សត្រីយានី Elizabeth II ដែលមានព្រះជន្ម ៩៥ព្រះវស្សា និងឆ្លងចូល៩៦ព្រះវស្សានៅថ្ងៃទី២១ មេសាខាងមុខបានចាក់វ៉ាក់សាំងបង្ការកូវីដ១៩ ចំនួន ៣ដូស។
គេមិនដឹងថា តើព្រះមហាក្សត្រីយានី Elizabeth II បានឆ្លងកូវីដ១៩ នៅទីណា និងពីអ្នកណាទេ។ អ្វីដែលគេដឹង ព្រះមហាក្សត្រីយានី Elizabeth II បានជួបសន្ទនាជាមួយព្រះអង្គម្ចាស់ Charles ដែលជាព្រះរាជបុត្រាក្នុងថ្ងៃទី៨ កុម្ភៈ ពោល ២ថ្ងៃមុននឹងព្រះអង្គម្ចាស់ Charles មានវិជ្ជមានកូវីដ១៩ក្នុងថ្ងៃទី១០ កុម្ភៈ។ គួរបញ្ជាក់ថា ព្រះមហាក្សត្រីយានី Elizabeth II ដែលជាព្រះមហាក្សត្រីយានីដ៏ល្បីល្បាញខ្លាំងជាងគេលើលោកទើបបានប្រារព្ធខួប ៧០ឆ្នាំនៃការឡើងគ្រងរាជសម្បត្តិ។ នាយករដ្ឋមន្រ្តីអង់គ្លេសលោកបូរីស ចនសុនបានជូនពរឲ្យព្រះមហាក្សត្រីយានី Elizabeth II ឆាប់ជា និងមានព្រះរាជសុខភាពធម្មតា មាំមួនឡើងវិញ។
សារដូចគ្នានេះក៏មានពីថ្នាក់ដឹកនាំនយោបាយអង់គ្លេសគ្រប់លំដាប់ថ្នាក់ ពិសេសពីសមាជិកក្នុងរដ្ឋាភិបាល។ ពីអន្តរជាតិវិញពេលនេះ គឺសាររបស់ប្រមុខអង្គការសុខភាពពិភពលោកលោកទេដ្រូស។ គួរបញ្ជាក់ថា តាំងពីក្រោយចូលសម្រាកព្យាបាលជំងឺរយៈពេល ១យប់ក្នុងមន្ទីរពេទ្យកាលពីខែតុលា ឆ្នាំ ២០២១ មក ព្រះមហាក្សត្រីយានី Elizabeth II មិនបានបង្ហាញព្រះភ័ក្រជាសាធារណៈទេ។ គឺទើបនៅដើមខែកុម្ភៈនេះដែលព្រះមហាក្សត្រីយានី Elizabeth II បានលេចព្រះភ័ក្រ និងផ្តើមបំពេញព្រះរាជសកម្មភាពសាធារណៈជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ