នុយក្លេអ៊ែរអ៊ុយក្រែន ៖ ភ្នាក់ងារថាមពលបរមាណូអន្តរជាតិថាគ្មានគ្រោះវិទ្យុសកម្មនៅឈែរណូប៊ីល
បន្ទាប់ពីបាត់ការទាក់ទងជាមួយប្រព័ន្ធគ្រប់គ្រងសុវត្ថិភាពនុយក្លែអ៊ែរពីចម្ងាយ ភ្នាក់ងារថាមពលបរមាណូអន្តរជាតិ ហៅកាត់ថាAIEA អាអ៊ីអឺអា បានជូនដំណឹងថា មជ្ឈមណ្ឌលនុយក្លេអ៊ែរឈែរណូប៊ីល ដាច់ចរន្តអគ្គីសនីទាំងស្រុង នៅថ្ងៃពុធទី ៩ មីនានេះ។ ដោយហេតុតែកងទ័ពរុស្ស៊ីកំពុងធ្វើការវាយប្រហារខ្លាំង គេមិនអាចជួសជុលតភ្លើងបានវិញទេ។ បើគ្មានចរន្តអគ្គីសនី តើប្រព័ន្ធរក្សាសីតុណ្ហភាពដំណើរការបានយ៉ាងដូចម្តេច ? តើនឹងមានគ្រោះធ្លាយវិទ្យុសកម្មយ៉ាងណា ?
ចុះផ្សាយនៅថ្ងៃ៖
ស្តាប់ - ០២:១៣
ដោយមិនបញ្ជាក់អំពីមូលហេតុនៃការដាច់ភ្លើង រដ្ឋមន្ត្រីក្រសួងការបរទេសអ៊ុយក្រែនបានអះអាងលើទំព័រហ្វេសប៊ុកថា មជ្ឈមណ្ឌលនុយក្លេអ៊ែរឈែរណូប៊ីលមានម៉ាស៊ីនភ្លើងស្រគួរដែលអាចដំណើរការបាន៤៨ម៉ោង។ ហើយបន្ទាប់មក បើចរន្តអគ្គីសនីមិនដើរឡើងវិញទេ នោះប្រព័ន្ធបញ្ចុះកម្តៅសីតុណ្ហភាពគ្រឿងចំហេះនុយក្លេអ៊ែរនឹងត្រូវឈប់។
បើតាមក្រុមហ៊ុនថាមពលអ៊ុយក្រែន Energoatom នៅពេលប្រព័ន្ធបញ្ចុះសីតុណ្ហភាពសំណល់នុយក្លេអ៊ែរលែងដើរ សារធាតុវិទ្យុសកម្មអាចនឹងសាយភាយចេញបាន។ ទៅតាមកម្លាំងខ្យល់ ផ្សែងវិទ្យុសកម្មអាចសាយភាយដល់តំបន់ផ្សេងទៀតរបស់អ៊ុយក្រែន របស់បេឡារុស រុស្ស៊ី និងអឺរ៉ុបផង។ ហើយបើគ្មានចរន្តអគ្គីសនី ប្រព័ន្ធបង្វិលខ្យល់នឹងលែងដើរដែរ នោះបុគ្គលិកធ្វើការក្នុងមជ្ឈមណ្ឌលអាចប្រឈមនឹងជាតិវិទ្យុសកម្មខ្ពស់។ នេះបើតាមក្រុមហ៊ុនថាមពលអ៊ុយក្រែនដដែល។
ប៉ុន្តែបើតាមភ្នាក់ងារថាមពលបរមាណូអន្តរជាតិ AIEA ការដាច់ចរន្តអគ្គីសនីទាំងស្រុងនៅមជ្ឈមណ្ឌលនុយក្លេអ៊ែរឈែរណូប៊ីលនេះ មិនចោទជាបញ្ហាធ្ងន់ធ្ងរដល់សុវត្ថិភាពទេ។ ភ្នាក់ងារបានធានាសហគមន៍អន្តរជាតិ ដោយពន្យល់ថា គ្រោះថ្នាក់នុយក្លេអ៊ែរបានកន្លងយូរពេលទៅហើយ (១៩៨៦) ហើយបន្ទុកកម្តៅក្នុងអាងទឹកដែលមានស្តុកគ្រឿងចំហេះប្រើរួចនិងបរិមាណទឹកក្នុងប្រព័ន្ធបញ្ចុះសីតុណ្ហភាព ក៏មានគ្រប់គ្រាន់សម្រាប់ធានាបញ្ចុះកម្តៅប្រកបដោយសុវត្ថិភាពដោយមិនបាច់ប្រើចរន្តអគ្គីសនីបាន។ ហេតុដូច្នេះហើយបានជា ភ្នាក់ងារមើលមិនឃើញថាមានផលប៉ះពាល់ធ្ងន់ធ្ងរដល់បញ្ហាសុវត្ថិភាពនោះ។
មជ្ឈមណ្ឌលអគ្គីសនីនុយក្លេអ៊ែរឈែរណូប៊ីល របស់អ៊ុយក្រែន ដែលធ្លាប់មានគ្រោះថ្នាក់ដ៏ធ្ងន់ធ្ងរបំផុតក្នុងប្រវត្តិសាស្ត្រនុយក្លេអ៊ែរស៊ីវិល កាលពីឆ្នាំ១៩៨៦ និងដែលត្រូវបានគេបោះបង់ឈប់ប្រើប្រាស់តាំងពីពេលនោះមក មានកប់ម៉ាស៊ីនប្រតិករ និងសំណល់វិទ្យុសកម្មជាបន្សំគ្រឿងចំហេះនុយក្លេអ៊ែរយ៉ាងច្រើន ដល់ទៅប្រមាណជាង២ម៉ឺនដើម។
ស្ថិតនៅចម្ងាយប្រមាណតែ១៤០គីឡូម៉ែត្រពីទីក្រុងកៀវ និងកៀកបង្កើយជាប់ព្រំដែនបៀឡារុស ឈែរណូប៊ីលបានធ្លាក់ក្នុងកណ្តាប់ដៃរុស្ស៊ី ក្រោយពីមូស្គូចាប់ផ្តើមវាយប្រហារលើអ៊ុយក្រែន នៅថ្ងៃទី ២៤កុម្ភៈ បន្តិច។ រុស្ស៊ីវាយយកមជ្ឈមណ្ឌលនេះ ជាសារចង់ព្រមានអូតង់ អឺរ៉ុប និងអាមេរិក កុំឱ្យលូកដៃចូលជួយអ៊ុយក្រែន។ ដូច្នេះការដាច់ចរន្តអគ្គីសនី ថ្ងៃនេះ ទោះដោយចេតនាឬអចេតនា អាចត្រូវបានគេបកស្រាយថាសារសំឡុតពិភពលោកមួយទៀតរបស់រស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ