បារាំងនិងអាល្លឺម៉ង់បណ្តេញមន្ត្រីទូតរុស្ស៊ីរាប់សិបនាក់ក្រោយផ្ទុះព័ត៌មានពីការសម្លាប់ជនស៊ីវិលនៅប៊ូតឆា
បារាំងនិងអាល្លឺម៉ង់បានប្រកាសកាលពីថ្ងៃចន្ទ ៤មេសាម្សិលមិញបណ្តេញមន្ត្រីទូតរុស្ស៊ីជាច្រើនសិបនាក់ បន្ទាប់ពីមានព័ត៌មានអំពីការសម្លាប់រង្គាលលើប្រជាជនអ៊ុយក្រែនក្នុងទីក្រុងប៊ូតឆា។ ស្របពេលជាមួយគ្នានេះ អាមេរិកនិងសហភាពអឺរ៉ុបក៏កំពុងរៀបចំទណ្ឌកម្មថ្មីបន្ថែមទៀតដែរដើម្បីប្រឆាំងនឹងវិមានក្រេមឡាំង។
ចុះផ្សាយនៅថ្ងៃ៖
ស្តាប់ - ០២:១៤
ក្រោយមានព័ត៌មានពីការសម្លាប់ជនស៊ីវិលអ៊ុយក្រែនជាង ៤០០នាក់នៅក្រុងប៊ូតឆា ប្រទេសអឺរ៉ុបកាន់តែច្រើននាំគ្នាបណ្តេញមន្ត្រីទូតរុស្ស៊ីចេញពីប្រទេស។ ជាក់ស្តែងកាលពីថ្ងៃចន្ទម្សិលមិញ អាល្លឺម៉ង់បានសម្រេចបណ្តេញមន្ត្រីទូតរុស្ស៊ីចំនួន ៤០នាក់។
រដ្ឋមន្ត្រីការបរទេសអាល្លឺម៉ង់អ្នកស្រី Annalena Baerbock បានហៅចំណាត់ការនេះថាជាការឆ្លើយតបទៅនឹងអំពើឃោរឃៅមិនគួរឲ្យជឿដែលវិមានក្រេមឡាំងបានប្រព្រឹត្តនៅក្នុងប្រទេសអ៊ុយក្រែន។
ភ្លាមៗក្រោយសេចក្តីប្រកាសរបស់អាល្លឺម៉ង់ ប្រទេសបារាំងបាននិយាយថានឹងបណ្តេញអ្នកការទូតរុស្ស៊ី ៣៥នាក់។ នៅក្នុងសេចក្តីថ្លែងការណ៍កាលពីថ្ងៃចន្ទម្សិលមិញ ក្រសួងការបរទេសបារាំងបានពន្យល់ថាបារាំងបានសម្រេចចិត្តបណ្តេញបុគ្គលិកទូតរុស្ស៊ីមួយចំនួនដោយហេតុថាសកម្មភាពរបស់ពួកគេប្រឆាំងនឹងផលប្រយោជន៍សន្តិសុខរបស់បារាំង។
ស្រដៀងគ្នានេះ លីទុយអានីបានសម្រេចបណ្តេញឯកអគ្គរដ្ឋទូតរុស្ស៊ីចេញពីប្រទេសដែរ។ ចំណែកប្រទេសដាណឺម៉ាកឯណោះវិញបានឲ្យដឹងនៅថ្ងៃអង្គារនេះដែរថាខ្លួនកំពុងតែបណ្តេញមន្ត្រីទូតរុស្ស៊ីចំនួន ១៥នាក់ពីបទចារកិច្ច។
ជុំវិញរឿងសម្លាប់ជនស៊ីវិលនៅអ៊ុយក្រែននេះ សហរដ្ឋអាមេរិកនិងអឺរ៉ុបក៏កំពុងរៀបចំផែនការដាក់ទណ្ឌកម្មថ្មីបន្ថែមទៀតលើទីក្រុងមូស្គូដែរ។ លោកប្រធានាធិបតីអាមេរិក ចូ បៃដិនបានអំពាវនាវឲ្យមានការកាត់ទោសឧក្រិដ្ឋកម្មសង្រ្គាមប្រឆាំងនឹងមេដឹកនាំរុស្ស៊ីលោកពូទីន ហើយថាសហរដ្ឋអាមេរិកនឹងស្នើឲ្យមហាសន្និបាតអង្គការសហប្រជាជាតិផ្អាកសមាជិកភាពរុស្ស៊ីពីក្រុមប្រឹក្សាសិទ្ធិមនុស្សទៀតផង។
វិមានក្រេមឡាំងបានទាត់ចោលរាល់ការចោទប្រកាន់របស់លោកខាងលិចពាក់ព័ន្ធការសម្លាប់ជនស៊ីវិលអ៊ុយក្រែននៅប៊ូតឆា ហើយថាខ្លួននឹងបង្ហាញភស្តុតាងជាក់ស្តែងក្នុងកិច្ចប្រជុំនៃក្រុមប្រឹក្សាសន្តិសុខអង្គការសហប្រជាជាតិនៅអង្គារនេះដើម្បីបង្ហាញពីភាពស្អាតស្អំរបស់កងទ័ពរុស្ស៊ី។
ក្រៅពីនេះ ទីក្រុងមូស្គូបានលើកឡើងថាការបណ្តេញមន្ត្រីទូតរុស្ស៊ីពីសំណាក់ក្រុមប្រទេសលោកខាងលិចគឺជារឿងមិនសមហេតុផលទាល់តែសោះឡើយ ហើយថារុស្ស៊ីនឹងឆ្លើយតបទៅកាន់ពួកគេវិញឲ្យបានសក្តិសមជាទីបំផុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ