អាមេរិក និងអាល្លឺម៉ង់ ខឹងស៊ែរប៊ី ដែលទិញសព្វាវុធពីចិន
វត្តមានរបស់យន្តហោះយោធាចិនដែលចុះចតនៅព្រលានយន្តហោះនៅទីក្រុងប៊ែលក្រាត ប្រទេសស៊ែរប៊ី កាលពីចុងសប្តាហ៍កន្លែងទៅ បានបណ្តាលឲ្យមានប្រតិកម្ម រិះគន់ មិនពេញចិត្តពីសំណាក់អាមេរិក និងអាល្លឺម៉ង់។ យន្តហោះយោធាចិន ៦គ្រឿងបានដឹកជញ្ជូន មីស៊ីលបាញ់ចេញពីដី ដែលស៊ែរប៊ីបានបញ្ជារទិញ ពីចិន កាលពីឆ្នាំ ២០១៩។ ស៊ែរប៊ី ដែលកំពុងដាក់បេក្ខភាពសម្រាប់ចូលជាសមាជិកអឺរ៉ុប ជាប្រទេសអឺរ៉ុបតែមួយ ដែលទិញ សព្វាវុធពីប្រទេសចិន។
ចុះផ្សាយនៅថ្ងៃ៖
ស្តាប់ - ០២:៣២
នេះជាលើកទី១ដែលអឺរ៉ុប ឃើញ យន្តហោះយោធារបស់ចិនចុះចត នៅក្នុងនៅទឹកដីរបស់ខ្លួន។ យន្តហោះយោធាចិនប្រភេទ Y20 ដែលចិនទើបផលិតបាននៅឆ្នាំ ២០១៥ មាននាទីដឹកជញ្ជូនមីស៊ីលជាច្រើនគ្រឿង ដែលជាការកម្ម៉ង់ បញ្ជាទិញពីរដ្ឋាភិបាលស៊ែរប៊ី។ រដ្ឋមន្រ្តីការពារជាតិស៊ែរប៊ី មិនបានអត្ថាធិប្បាយអ្វីទាក់ទងនឹងវត្តមានចុះចតរបស់យន្តហោះយោធាចិន នៅព្រលានយន្តហោះ ប៊ែលក្រាត ប៉ុន្តែ ប្រធានាធិបតីស៊ែរប៊ី លោកAleksandar Vucic ដែលទើបជាប់ឆ្នោតកាលពីចុងខែមីនាបានបញ្ជាក់ ជាផ្លូវការព័ត៌មាននេះ និងថា លោកនឹងប្រកាសឲ្យសាធារណៈជនបានដឹង នៅថ្ងៃពុធទី ១៣មេសា។
ស៊ែរប៊ីបានចរចាជាមួយចិន តាំងពីឆ្នាំ ២០១៩ ដើម្បី ទិញមីស៊ីលបាញ់ពីដី ប្រភេទ HQ-22 របស់ចិនសម្រាប់បំពាក់ឲ្យកងទ័ពរបស់ខ្លួន។ នេះមិនមែនជាលើកទី១ដែលស៊ែរប៊ី ទិញ សព្វាវុធពីចិន។ ជាសម្ព័ន្ធមិត្តដ៏កម្ររបស់រុស្ស៊ី នៅក្នុងទឹកដីអឺរ៉ុប ស៊ែរប៊ីដែលកំពុងដាក់បេក្ខភាពដើម្បីសុំចូលជាសមាជិករបស់សហភាពអឺរ៉ុប ឧស្សាហ៍ទិញ សព្វាវុធពីចិន និងរុស្ស៊ី។ កន្លងមក ស៊ែរប៊ីបានទិញ យន្តហោះ រថក្រោះ ដ្រូន របស់ចិន។
វត្តមានយន្តហោះយោធាចិនដែលដឹកជញ្ជូនមីស៊ីលទៅឲ្យស៊ែរប៊ី នៅចុងសប្តាហ៍មុន បានធ្វើឲ្យក្រសួងការបរទេសអាមេរិកចេញសារព្រមានថា ស៊ែរប៊ីជាប្រទេសមានអធិបតេយ្យភាព ប៉ុន្តែ ស៊ែរប៊ីត្រូវដឹងច្បាស់ពីផលវិបាក គ្រោះថ្នាក់ ក្នុងរយៈពេលខ្លី និងរយៈពេលវែង។ អាល្លឺម៉ង់វិញបានទាមទារឲ្យស៊ែរប៊ី ដែលជាបេក្ខជនសម្រាប់សមាជិកសហភាពអឺរ៉ុប ប្រកាន់ជំហរនយោបាយយោធា ស្របតាមជំហរសហភាពអឺរ៉ុប។
វត្តមានរបស់មីស៊ីល និងយន្តហោះយោធាចិននៅប្រទេសស៊ែរប៊ី ប្រាកដណាស់ កំពុងធ្វើឲ្យអាមេរិក និងអឺរ៉ុបព្រួយបារម្ភ។ យន្តហោះយោធាចិនអាចចុះចតនៅទឹកដីអឺរ៉ុប។ វាបង្ហាញឲ្យឃើញពីសមត្ថភាព យោធារបស់ចិន ដែលអាចបោះដៃ ចេញឆ្ងាយពីដែនឥទ្ធិពលរបស់ខ្លួននៅអាស៊ី។
អ្នកនាំពាក្យរបស់ក្រសួងការបរទេសចិនបានអះអាងកាលពីថ្ងៃអង្គារថា ចិនបានដឹកជញ្ជូនសំភារៈយោធាទៅឲ្យស៊ែរប៊ី ក្នុងក្របខ័ណ្ឌសហប្រតិបត្តិការប្រចាំឆ្នាំ រវាងប្រទេសទាំងពីរ និងថា វាមិនបានសំដៅ ប្រទេសផ្សេង ឬទាក់ទងនឹងស្ថានភាពបច្ចុប្បន្ននៅអ៊ុយក្រែននោះទេ។
ជាច្រើនឆ្នាំមកហើយ ចិន និងស៊ែរប៊ី បានរឹតចំណងមិត្តភាពគ្នា ដោយឈរលើគំនិតស្អប់អាមេរិក។ ស៊ែរប៊ីនៅតែស្អប់គុំអូតង់ដែលបានទម្លាក់គ្រាប់ ប្រឆាំងទាហានស៊ែរប៊ី ក្នុងសម័យសង្រ្គាមកូសូវូ នៅឆ្នាំ ១៩៩៩។ នៅក្នុងសង្រ្គាមកូសូវ៉ូ ចិនក៏ខឹងអាមេរិក ដែលបានទម្លាក់គ្រាប់ប៉ះ ស្ថានទូតចិន នៅប៊ែលក្រាត ដោយសម្លាប់មន្រ្តីទូតចិន៣នាក់។
វត្តមានរបស់យន្តហោះយោធាចិនដែលដឹកជញ្ជូនមីស៊ីលទៅឲ្យស៊ែរប៊ី អាចបញ្ជាក់ផងដែរ ពីការវិវឌ្ឍន៍ថ្មី នៅក្នុងកាលៈទេសៈតឹងតែងនៅក្នុងតំបន់បាល់កង់។ សម្រាប់អ្នកសង្កេតការអឺរ៉ុប ការណ៍ដែលស៊ែរប៊ី ពង្រឹងវិស័យយោធា ដោយទិញ សព្វាវុធកាន់ច្រើន ដើម្បីបំពាក់ឲ្យកងទ័ពរបស់ខ្លួន គឺធ្វើឲ្យបារម្ភកាន់តែខ្លាំង ពីការកើនឡើងនៃភាពតានតឹង និងលទ្ធភាពផ្ទុះសង្រ្គាមនៅតំបន់បាល់កង់ ជាពិសេសនៅកូសូវ៉ូ ព្រោះថា រហូតមកដល់ពេលនេះ ស៊ែរប៊ីនៅតែមិនទាន់ទទួលស្គាល់ឯករាជ្យរបស់កូសូវ៉ូ ដែលធ្លាប់ជាខេត្តមួយរបស់ស៊ែរប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ