អ្នកជំនាញUN ថាចិននិងរុស្ស៊ីនៅតែបន្តផ្តល់អាវុធទៅឲ្យរបបសឹកភូមា
អ្នករាយការណ៍ពិសេសរបស់អង្គការសហប្រជាជាតិប្រចាំប្រទេសភូមា លោក Tom Andrews បាននិយាយនៅថ្ងៃអង្គារ ទី២២ កុម្ភៈនេះថាប្រទេសចិន រុស្ស៊ី និងប្រទេសស៊ែប៊ីបានបន្តផ្គត់ផ្គង់អាវុធទៅឲ្យរបបសឹកភូមា។ អាវុធដែលអ្នកជំនាញ UN បរិហារថាត្រូវបានយោធាភូមាប្រើសម្រាប់វាយប្រហារទៅលើជនស៊ីវិលចាប់តាំងពីរដ្ឋប្រហារកាលពីឆ្នាំមុនមក។
ចុះផ្សាយនៅថ្ងៃ៖
ស្តាប់ - ០២:១៦
នៅក្នុងសេចក្តីថ្លែងការណ៍មួយ អ្នកជំនាញអង្គការសហប្រជាជាតិស្តីពីស្ថានភាពសិទ្ធិមនុស្សនៅភូមា លោក Andrews បានគូសបញ្ជាក់ថាបើទោះបីជាមានភស្តុតាងស្តីពីអំពើដ៏ឃោរឃៅប្រព្រឹត្តដោយរបបយោធាតាំងពីរដ្ឋប្រហារកាលពីឆ្នាំមុនក៏ដោយ ក៏សមាជិកអចិន្ត្រៃយ៍ពីរនៃក្រុមប្រឹក្សាសន្តិសុខគឺចិន និងរុស្ស៊ីនៅតែបន្តផ្តល់យន្តហោះចម្បាំង និងរថពាសដែកជាច្រើនដល់របបសឹកភូមារបស់លោកឧត្តមសេនីយ៍មីន អ៊ុងឡាំង។
ឆ្លើយតបនឹងបញ្ហានេះ អ្នកជំនាញអង្គការសហប្រជាជាតិរូបនេះបានជំរុញឲ្យក្រុមប្រឹក្សាសន្តិសុខ កោះប្រជុំជាបន្ទាន់ដើម្បីជជែកពិភាក្សានិងសម្រេចលើការហាមឃាត់អាវុធ ដែលគេដឹងថា ត្រូវបានកងទ័ពភូមាយកទៅប្រើដើម្បីវាយប្រហារនិងសម្លាប់ជនស៊ីវិល។
នៅថ្ងៃអង្គារនេះ លោក Andrews បង្ហាញរបាយការណ៍ដែលគេរង់ចាំជាយូរមក។ ជារបាយការណ៍ រៀបរាប់លម្អិតអំពីទីតាំងដែលរបបសឹកភូមាទទួលបានអាវុធ។ គួរទាញបញ្ជាក់ថាក្រៅពីប្រទេសចិន និងរុស្ស៊ី ប្រទេសស៊ែរប៊ីក៏ស្ថិតនៅក្នុងចំណោមអ្នកលក់អាវុធរួមមានគ្រាប់រ៉ុកែត និងកាំភ្លើងធំទៅឲ្យភូមាផងដែរ។ នេះបើតាមលោក Andrews អ្នកជំនាញឯករាជ្យរបស់ក្រុមប្រឹក្សាសិទ្ធិមនុស្សអង្គការសហប្រជាជាតិ ប៉ុន្តែលោកមិនបាននិយាយក្នុងនាមស្ថាប័នពិភពលោកមួយនេះឡើយ។
អ្នកជំនាញ UN ដដែលនេះបានសង្កត់ធ្ងន់ដែរថាអាវុធដែលគេប្រើដើម្បីសម្លាប់ជនស៊ីវិលភូមា មិនគួរត្រូវបានគេបញ្ជូនឲ្យទៅយោធាភូមាទៀតទេ ហើយវាជារឿងចាំបាច់ណាស់ដែលរដ្ឋជាសមាជិក និងក្រុមប្រឹក្សាសន្តិសុខត្រូវចាត់វិធានការបន្ទាន់បញ្ឈប់ការលក់អាវុធដល់របបយោធា ដើម្បីជួយដល់ប្រជាជនស្លូតត្រង់ ក៏ដូចជាបង្កើនភាពជឿជាក់របស់ពិភពលោកលើសមត្ថកិច្ចរបស់ក្រុមប្រឹក្សាសន្តិសុខ។
គួររំឭកថា ចាប់តាំងពីរដ្ឋប្រហារកាលពីខែកុម្ភៈឆ្នាំមុនមក ប្រទេសភូមាបានស្ថិតក្នុងភាពវឹកវរ ចំណែកសេដ្ឋកិច្ចរបស់ប្រទេសអាស៊ីមួយនេះវិញបានធ្លាក់ចុះខ្លាំង។ ហើយមានជនស៊ីវិលជាង ១ ៥០០ នាក់ត្រូវបានសម្លាប់នៅក្នុងការបង្រ្កាបដោយពួកយោធា។ នេះបើយោងតាមក្រុមអ្នកតាមដានស្ថានការណ៍នៅភូមា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ