ឆ្នាំ២០២១ ពិភពលោកបាត់បង់ព្រៃឈើ ត្រូពិក ប៉ុន១០តារាងបាល់ក្នុងមួយនាទី
ក្នុងមួយឆ្នាំ២០២១កន្លងទៅ ភពផែនដីបានបាត់បង់ផ្ទៃដីព្រៃឈើអស់ ២៥៣០០០គីឡូម៉ែត្រការ៉េ។ បើតាមអ្នកស្រាវជ្រាវ ការបាត់បង់ព្រៃឈើត្រូពិក បណ្តាលមកពីការ ដុតនិងកាប់ ដើម្បីយកដីធ្វើកសិកម្មចិញ្ចឹមសត្វ ឬដាំដុះ និងធ្វើឱ្យពិភពលោកពិបាកសម្រេចកម្មវត្ថុថែរក្សាព្រៃ ដើម្បីទប់ស្កាត់ការប្រែប្រួលអាកាសធាតុ។
ចុះផ្សាយនៅថ្ងៃ៖
ស្តាប់ - ០២:០១
តំបន់ត្រូវពិក បាត់បង់ព្រៃអស់ប្រមាណ១១,១លានហិចតារ ក្នុងនោះ៣,៧៥លានហិចតារ ជាព្រៃស្តុក ពោលគឺក្នុងពេញមួយឆ្នាំកន្លងមកនេះ ពិភពលោកបានបាត់បង់ព្រៃស្តុកទំហំប៉ុន១០តារាងបាល់ទាត់ក្នុងមួយនាទី។ នេះបើតាមរបាយការណ៍ប្រចាំឆ្នាំរបស់អង្គការ Global Forest Watch (GFW)នៃវិទ្យាស្ថាន World resources institute (WRI)។
បើតាមការគណនារបស់អ្នកស្រាវជ្រាវដដែល ប្រេស៊ីលបាត់បង់ព្រៃស្តុកច្រើនជាងគេ គឺប្រមាណជាង៤០% ដោយហេតុភ្លើងឆេះ និងការកាប់ព្រៃយកដីធ្វើកសិកម្មនិងចិញ្ចឹមសត្វ។ សកម្មភាពកាប់ព្រៃនេះកើនឡើងដល់៩% និងកន្លែងខ្លះឡើងដល់២៥%បើប្រៀបទៅឆ្នាំ២០២០។ បន្ទាប់មក គឺសាធារណរដ្ឋកុងហ្គោ អស់ ៥សែនហិចតារ បន្តដោយបូលីវី ចំនួនជិត៣សែនហិចតារ។
ខាតបង់ប្រយោជន៍ខាងស្រូបយកឧស្ម័នកាបូនិកហើយ សកម្មភាពបំផ្លាញព្រៃស្តុក នៅឆ្នាំ២០២១នេះ បានបញ្ចេញឧស្ម័នបំពុលបរិយាកាសបន្ថែមដល់ទៅ ២,៥ gigatonnes ពោលគឺស្មើនឹងការបញ្ចេញផ្សេងពុលរបស់ប្រទេសឥណ្ឌាទាំងមូល។
ក្រៅពីព្រៃត្រូពិច ព្រៃនៅតំបន់ត្រជាក់ ក្នុងអឌ្ឍគោលខាងជើង ក៏រងការបាត់បង់ព្រៃច្រើនបំផុត មិនធ្លាប់មានដែរ គិតចាប់តាំងពីឆ្នាំ២០០១មក។ នៅឆ្នាំ ២០២១ កាណាដា រុស្ស៊ី និងអាឡាស្កា បានបាត់បង់ព្រៃអស់ជាង ៨ម៉ឺនគីឡូម៉ែត្រការ៉េ ដោយហេតុតែបាតុភូតភ្លើងឆេះព្រៃ ដែលមានពាក់ព័ន្ធនឹងការប្រែប្រួលអាកាសធាតុ។ នេះបើតាមនាយកកម្មវិធីព្រៃឈើពិភពលោក WRI ដដែល។
របាយការណ៍នេះបានបង្ហាញឱ្យឃើញថា ពិភពលោកបន្តបាត់បង់ព្រៃ និងកំពុងធ្វើខុសពីពាក្យប្តេជ្ញា កាលពីខែវិច្ឆកា២០២១ ក្នុងសន្និសីទអាកាសធាតុរបស់អង្គការសហប្រជាជាតិ COP២៦ ដែលមេដឹកនាំ១៤១ប្រទេសបានប្រកាស បញ្ឈប់ការបំផ្លាញ ព្រៃឈើ នៅឆ្នាំ២០៣០។ ដើម្បីសម្រេចកម្មវត្ថុ អ្នកស្រាវជ្រាវបានព្រមានថា គេត្រូវតែកាត់បន្ថយការបំផ្លាញព្រៃស្តុក ច្រើននិងជាប់ជារៀងរាល់ឆ្នាំ រហូតដល់ដំណាច់ទសវត្សរ៍ ព្រោះបាតុភូតនៃប្រែប្រួលអាកាសធាតុផ្ទាល់ បានបង្កការលំបាកយ៉ាងខ្លាំងក្នុងការថែរក្សាព្រៃដែលមានស្រាប់ស្រេចទៅហើយ។
មានតែឥណ្ឌូណេស៊ីមួយគត់ ដែលអាចពន្យឺតការបាត់បង់ព្រៃស្តុករបស់ខ្លួន បានរយៈពេល៥ឆ្នាំជាប់គ្នា និងក្នុងបរិមាណ ២៥% បើប្រៀបទៅឆ្នាំ២០២០។ នេះបើតាមរបាយការណ៍ដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ