ប្រធានាធិបតីរុស្ស៊ីលោកពូទីនថា ការដែលហ្វាំងឡង់ចង់ចូលជាសមាជិកអូតង់ជាកំហុសឆ្គងមួយ
នៅថ្ងៃសៅរ៍ ទី១៤ ឧសភា ប្រធានាធិបតីហ្វាំងឡង់លោកសូលី នីនីស្តូបានទូរស័ព្ទនិយាយជាមួយសមភាគីរុស្ស៊ីលោកវ្ល៉ាឌីមៀរ ពូទីន។ នៅក្នុងកិច្ចសន្ទនា លោកនីនីស្តូបានប្រាប់លោកពូទីនពីការដែលហ្វាំងឡង់ត្រៀមដាក់បេក្ខភាពសុំចូលជាសមាជិករបស់អង្គការអូតង់។ តែលោកពូទីនបានប្រាប់លោកនីនីស្តូវិញថា គម្រោងសុំចូលអូតង់របស់ហ្វាំងឡង់ជាកំហុសឆ្គងមួយ និងថា ការប្តូរទិសដៅនយោបាយរបស់ហ្វាំងឡាំងអាចបង្កឲ្យមានផលវិបាកនៅក្នុងទំនាក់ទំនងទ្វេភាគី រុស្ស៊ី ហ្វាំងឡង់។
ចុះផ្សាយនៅថ្ងៃ៖
ស្តាប់ - ០២:២១
ប្រធានាធិបតីហ្វាំងឡង់លោកសូលី នីនីស្តូបានបញ្ជាក់ថា កិច្ចសន្ទនាតាមទូរស័ព្ទរវាងលោក និងប្រធានាធិបតីរុស្ស៊ីលោកវ្ល៉ាឌីមៀរ ពូទីនជាកិច្ចសន្ទនាដោយផ្ទាល់ និងនិយាយត្រង់ទៅ ត្រង់មកដោយគ្មានការលាក់លៀមអ្វីទាំងអស់។ លោកនីនីស្តូបានយល់ឃើញថា ការនិយាយត្រង់ទៅ ត្រង់មកដោយមិនបត់បែនជារឿងសំខាន់ដើម្បីបញ្ជៀសភាពតានតឹង និងការមិនយល់គ្នា។ នៅក្នុងកិច្ចសន្ទនា លោកនីនីស្តូបានប្រាប់លោកពូទីនពីការដែលហ្វាំងឡង់ត្រៀមប្រកាសដាក់បេក្ខភាពចូលជាសមាជិករបស់អង្គការអូតង់។ ការប្រកាសត្រៀមដាក់បេក្ខភាពដែលគ្រោងធ្វើនៅថ្ងៃអាទិត្យ ទី១៥ ឧសភានេះ។ តែលោកពូទីនបាននិយាយត្រង់ទៅកាន់លោកនីនីស្តូវិញថា ការបិទបញ្ចប់នូវនយោបាយមិនចូលបក្សសម្ព័ន្ធ និងអព្យាក្រឹតភាពយោធាជាប្រវត្តិសាស្រ្តរបស់ហ្វាំងឡង់ជាកំហុសឆ្គងមួយ។
ជាកំហុសឆ្គងមួយ ព្រោះហ្វាំងឡង់គ្មានទទួលការគំរាមកំហែងសន្តិសុខណាមួយទេ។ ទន្ទឹមគ្នានេះ លោកពូទីនមិនភ្លេចបញ្ជាក់ដោយព្រមានថា ការប្តូរទិសដៅនយោបាយរបស់ហ្វាំងឡង់អាចបង្កឲ្យមានផលវិបាកនៅក្នុងទំនាក់ទំនងទ្វេភាគីរុស្ស៊ី ហ្វាំងឡង់។ តែលោកពូទីនមិនបានបញ្ជាក់លំអិតបន្ថែមពីផលវិបាកនោះទេ។ អ្វីដែលគេដឹង រុស្ស៊ីទើបបានឈប់លក់ភ្លើងអគ្គិសនីទៅឲ្យហ្វាំងឡង់ចាប់ពីថ្ងៃសៅរ៍ ទី១៤ ឧសភា។ សូមបញ្ជាក់ថា កិច្ចសន្ទនាតាមទូរស័ព្ទរវាងប្រធានាធិបតីហ្វាំងឡង់លោកនីនីស្តូ និងសមភាគីរុស្ស៊ីលោកពូទីនបានធ្វើឡើង បន្ទាប់ពីលោកនីនីស្តូ និងនាយករដ្ឋមន្រ្តីរបស់លោកគឺលោកស្រីសានណា ម៉ារីនបានប្រកាសក្នុងថ្ងៃព្រហស្បតិ៍ ទី១២ ឧសភាពីការចង់ឃើញហ្វាំងឡង់ចូលអូតង់ដោយគ្មានការពន្យារពេល។
គួររម្លឹកថា ហ្វាំងឡង់ដែលមានព្រំដែនជាប់រុស្ស៊ីប្រវែង ១ ៣០០គីឡូម៉ែត្រ និងធ្លាប់ទទួលរងការឈឺចាប់ជាមួយរុស្ស៊ីនៅក្នុងអតីតកាលបានលើកហេតុផលចំនួន ២ ទៅពន្យល់ដើម្បីបញ្ជាក់ពីការចង់ចូលជាសមាជិកអូតង់ ទី១ ឃើញរុស្ស៊ីចូលឈ្លានពានអ៊ុយក្រែន និងទី២ ឃើញរុស្ស៊ីទាមទារកុំឲ្យអូតង់ពង្រីកសមាជិកបន្ថែមទៀត។ ហេតុផលរបស់ហ្វាំងឡង់នេះក៏កំពុងធ្វើឲ្យប្រទេសស៊ុយអែតគិតគូរពីការចង់ចូលជាសមាជិកអូតង់ដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ