រុស្ស៊ីបានបរិហារលើនយោបាយបែបអាណានិគមរបស់បារាំង និងអឺរ៉ុបនៅម៉ាលី
ប្រមុខការទូតនៃប្រទេសម៉ាលីលោកអាប់ឌូឡាយេ ឌីយ៉ូបបានបំពេញទស្សនកិច្ចនៅក្នុងប្រទេសរុស្ស៊ីនាថ្ងៃសុក្រ ទី២០ ឧសភា។ លោកអាប់ឌូឡាយេ ឌីយ៉ូបបានជួបសន្ទនាជាមួយសមភាគីរុស្ស៊ីលោកស៊ែរហ្កី ឡាវរ៉ូហ្វនៅក្នុងទីក្រុងមូស្គូ។ នាឱកាសសន្និសីទការសែតរួមគ្នា លោកស៊ែរហ្កី ឡាវរ៉ូហ្វបានបរិហារលើនយោបាយអាណានិគមរបស់ប្រទេសបារាំង និងអឺរ៉ុបនៅក្នុងប្រទេសម៉ាលី។ តាមលោកស៊ែរហ្កី ឡាវរ៉ូហ្វ រុស្ស៊ីមិនពេញចិត្តនឹងការប៉ុនប៉ងរបស់បារាំង និងប្រទេសអឺរ៉ុបផ្សេងទៀតដែលតាំងខ្លួនដើរតួនាទីគ្របដណ្តប់នៅអាហ្រ្វិក និងនៅតំបន់ផ្សេងទៀត។ លោកស៊ែរហ្កី ឡាវរ៉ូហ្វយល់ថា ការដែលបារាំងព្យាយាមផ្តល់មេរៀន និងចង្អុលផ្លូវឲ្យម៉ាលីដើរជារឿងដែលមិនអាចទទួលយកបានទេ។ ដោយឡែក លោកស៊ែរហ្កី ឡាវរ៉ូហ្វបានប្រាប់សមភាគីម៉ាលីដោយធានាថា រុស្ស៊ីបានត្រៀមខ្លួនផ្តល់ការគាំទ្រចំពោះម៉ាលីដើម្បីបង្កើនសមត្ថភាពប្រយុទ្ធរបស់កងទ័ពម៉ាលី ពិសេសក្នុងផ្នែកបណ្តុះបណ្តាលយោធា និងប៉ូលិស។ បន្ទាប់មក លោកស៊ែរហ្កី ឡាវរ៉ូហ្វក៏បានធានាពីការបន្តផ្តល់ឲ្យម៉ាលីនូវវត្ថុធាតុដើម។
ចុះផ្សាយនៅថ្ងៃ៖
ស្តាប់ - ០១:២៨
« នៅក្នុងដំណើរទស្សនៈកិច្ចរបស់ប្រមុខការទូតម៉ាលី ការយកចិត្តទុកដាក់ជាចម្បងបានផ្តោតសំខាន់លើទំនាក់ទំនងទ្វេភាគីរបស់យើង និងទស្សនវិស័យនៃការអភិវឌ្ឍន៍របស់យើងនៅលើគ្រប់វិស័យទាំងអស់ ពិសេសនៅក្នុងវិស័យពាណិជ្ជកម្ម និងវិស័យសេដ្ឋកិច្ច។ គណៈប្រតិភូរបស់រដ្ឋមន្រ្តីការបរទេសម៉ាលីក៏មានរដ្ឋមន្រ្តីមកពីក្រសួងផ្សេងទៀត ពិសេសក្រសួងដឹកជញ្ជូន និងហេដ្ឋារចនាសម្ព័ន្ធ ក្រសួងសេដ្ឋកិច្ច និងហិរញ្ញវត្ថុ ក្រសួងរ៉ែ ថាមពល និងធនធានទឹក។
មានន័យថា សមាសភាពនៅក្នុងគណៈប្រតិភូម៉ាលីនេះបង្ហាញពីអាកប្បកិរិយាប្រាកដប្រជា និងម៉ឺងម៉ាត់ដើម្បីឈានទៅសម្រេចឲ្យបាននូវកិច្ចព្រមព្រៀងពិសេស។ គណៈប្រតិភូបានទាក់ទងរួចហើយនៅថ្ងៃម្សិលមិញ និងបន្តមានទំនាក់ទំនងជាបន្តទៀតជាមួយនាយកដ្ឋាន និងក្រសួងពាក់ព័ន្ធរបស់សហព័ន្ធរុស្ស៊ីនៅក្នុងអំឡុងពេលស្នាក់នៅទីនេះរបស់គណៈប្រតិភូម៉ាលី។ ខ្ញុំគិតថា លទ្ធផលត្រូវបានគេមើលឃើញរួចជាស្រេចហើយ។
ទន្ទឹមគ្នានេះ កិច្ចពិភាក្សាបានផ្តោតលើការផ្គត់ផ្គង់វត្ថុធាតុដើមឲ្យម៉ាលី ក្នុងនោះ មានការផ្គត់ផ្គង់ស្រូវសាលី ការផ្គត់ផ្គង់ជីកសិកម្ម និងការផ្គត់ផ្គង់ប្រេង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ