Sipri៖ពិភពលោកកំពុងប្រឈមនឹងកំណើនអាវុធនុយក្លេអ៊ែរជាថ្មី
នៅថ្ងៃចន្ទ ទី១៣ មិថុនា វិទ្យាស្ថានស្រាវជ្រាវសន្តិភាពអន្តរជាតិស្តុកខុលហៅកាត់ស៊ីព្រី (Sipri) បានចេញផ្សាយរបាយការណ៍មួយស្តីពីស្ថានភាពអាវុធនុយក្លេអ៊ែរក្នុងលោក។ តាមរបាយការណ៍ ពិភពលោកកំពុងប្រឈមនឹងកំណើនអាវុធនុយក្លេអ៊ែរនៅទសវត្សរ៍ខាងមុខ ក្រោយពីបានធ្លាក់ចុះក្នុងរយៈពេល ៣៥ឆ្នាំកន្លងទៅ។ មានមូលហេតុចំនួនពីរដែលបញ្ជាក់ពីនិន្នាការមួយនេះ ទី១ ការគំរាមប្រើអាវុធនុយក្លេអ៊ែររបស់ប្រធានាធិបតីរុស្ស៊ីលោកពូទីននៅក្នុងសង្រ្គាមអ៊ុយក្រែន និងទី២ ភាពតានតឹងរវាងក្រុមប្រទេសមហាអំណាច។
ចុះផ្សាយនៅថ្ងៃ៖
ស្តាប់ - ០២:៣០
យោងតាមការប៉ាន់ប្រមាណរបស់ស៊ីព្រី (Sipri) ពិភពលោកមានក្បាលនុយក្លេអ៊ែរសរុបចំនួន ១២ ៧០៥គ្រាប់នៅដើមឆ្នាំ ២០២២ ពោលតិចជាងចំនួន ៣៧៥គ្រាប់បើធៀបនៅដើមឆ្នាំ ២០២១។ ក្នុងចំណោមក្បាលនុយក្លេអ៊ែរទាំង ១២ ៧០៥គ្រាប់នេះ មាន ៩០% កំពុងស្ថិតក្នុងដៃរុស្ស៊ី និងអាមេរិក។ ការប្រមើលមើលចុងក្រោយរបស់ស៊ីព្រីបានឲ្យដឹងថា រុស្ស៊ីបន្តស្ថិតជាមហាអំណាចនុយក្លេអ៊ែរលើលោកដោយមានក្បាលនុយក្លេអ៊ែរចំនួន ៥ ៩៧៧គ្រាប់ បន្តអាមេរិកមានចំនួន ៥ ៤២៨គ្រាប់ ចិនមានចំនួន ៣៥០គ្រាប់ បារាំងមានចំនួន ២៩០គ្រាប់ អង់គ្លេសមានចំនួន ២២៥គ្រាប់ ប៉ាគីស្ថានមានចំនួន ១៦៥គ្រាប់ ឥណ្ឌាមានចំនួន ១៦០គ្រាប់ និងអ៊ីស្រាអែលមានចំនួន ៩០គ្រាប់។
ចំណែកកូរ៉េខាងជើងត្រូវបានស៊ីព្រីមើលឃើញជាលើកទី១ ថា មានក្បាលនុយក្លេអ៊ែរចំនួន ២០គ្រាប់ និងមានវត្ថុធាតុដើមគ្រប់គ្រាន់ដើម្បីឈានទៅផលិតបានប្រមាណ ៥០គ្រាប់។ របាយការណ៍របស់ស៊ីព្រីបានព្រមានថា ពេលវេលានៃការរំសាយអាវុធនុយក្លេអ៊ែរហាក់លែងមានទៀតឡើយ ហើយហានិភ័យនៃការប្រឈមមុខដាក់គ្នាដោយអាវុធនុយក្លេអ៊ែរបានឡើងដល់កំពូលគិតតាំងពីក្រោយការបិទបញ្ចប់សង្រ្គាមត្រជាក់។ តាមស៊ីព្រី ក្រោយពីមានការធ្លាក់ចុះតិចតួចក្នុងឆ្នាំ ២០២១ មក ចំនួនអាវុធនយក្លេអ៊ែរនឹងចាប់កើនឡើងជាថ្មីនៅទសវត្សរ៍ខាងមុខ។
កំណើនអាវុធនុយក្លេអ៊ែរលើលោកនៅទសវត្សរ៍ខាងមុខត្រូវបានស៊ីព្រីទម្លាក់កំហុសលើសង្រ្គាមរុស្ស៊ីឈ្លានពានអ៊ុយក្រែនដែលប្រធានាធិបតីរុស្ស៊ីលោកពូទីនបានគំរាមពីការប្រើអាវុធនុយក្លេអ៊ែរ។ លោកម៉ាត់ ករដា សហអ្នកសរសេររបាយការណ៍ស៊ីព្រីបានថ្លែងថា សង្រ្គាមរុស្ស៊ីឈ្លានពានអ៊ុយក្រែន និងការគំរាមប្រើអាវុធនុយក្លេរអ៊ែររបស់លោកពូទីនបានជំរុញឲ្យមហាអំណាចនុយក្លេអ៊ែរផ្សេងចាប់ផ្តើមគិតគូរលើផែនការធ្វើទំនើបកម្ម ឬបង្កើនការផលិតអាវុធនុយក្លេអ៊ែររបស់ខ្លួន ដូចយ៉ាងចិន និងអង់គ្លេស។ តាមស៊ីព្រី ចិនកំពុងបង្កើនការផលិតអាវុធនុយក្លេអ៊ែរ ហើយបើផ្អែកតាមក្រសួងការពារជាតិអាមេរិក ចិនអាចនឹងមានក្បាលនុយក្លេអ៊ែរចំនួន ៧០០គ្រាប់នៅឆ្នាំ ២០២៧៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ