អ្នកជំនាញ៖ទណ្ឌកម្មរបស់ G៧ លើមាសរុស្ស៊ីនឹងធ្វើឲ្យរុស្ស៊ីពិបាករកអតិថិជនថ្មីដើម្បីទិញមាសខ្លួន
ថ្ងៃចន្ទ ទី២៧ មិថុនាជាថ្ងៃទី២ នៃកិច្ចប្រជុំកំពូលប្រចាំឆ្នាំរបស់ក្រុមប្រទេស G៧ នៅក្នុងប្រទេសអាល្លឺម៉ង់។ សង្រ្គាមរុស្ស៊ីឈ្លានពានអ៊ុយក្រែនជាប្រធានបទដែលបានគ្របដណ្តប់ខ្លាំងនៅកិច្ចប្រជុំកំពូលឆ្នាំនេះ។ ដើម្បីបន្តដាក់គំនាបលើរុស្ស៊ី ក្រុមប្រទេស G៧ បានបន្តប្រើទណ្ឌកម្មដើម្បីខ្ទប់ដង្ហើមសេដ្ឋកិច្ចរុស្ស៊ី។ បន្ទាប់ពីដាក់ទណ្ឌកម្មលើវិស័យប្រេង ឧស្ម័ន និងផ្តាច់រុស្ស៊ីចេញពីប្រព័ន្ធហិរញ្ញវត្ថុអន្តរជាតិ G៧ ត្រៀមឈប់នាំចូលមាសរបស់រុស្ស៊ី។ គួរបញ្ជាក់ថា រុស្ស៊ីជាប្រទេសជង្រុករ៉ែមាសដ៏សំខាន់មួយដែលការនាំមាសចេញក្នុងឆ្នាំ ២០២១ មានទឹកប្រាក់ជិត ១៥ ០០០លានអឺរ៉ូ។ លោកបាំងហ្សាម៉ាំង លូវ៉េ អ្នកជំនាញមាសបានបញ្ជាក់ថា ទណ្ឌកម្មរបស់ G៧ លើមាសរុស្ស៊ីនឹងធ្វើឲ្យរុស្ស៊ីកាន់តែឯកោបន្ថែមទៀតនៅលើទីផ្សារអន្តរជាតិ ហើយរុស្ស៊ីនឹងជួបការលំបាកក្នុងការរកម៉ូវថ្មីដើម្បីទិញមាសរបស់ខ្លួន។
ចុះផ្សាយនៅថ្ងៃ៖
ស្តាប់ - ០១:៤០
« វាអាចថារុស្ស៊ីត្រូវសំឡឹងរកទីផ្សារផ្សេងទៀតដើម្បីបញ្ចេញមាសរបស់ខ្លួន ពិសេសនាំទៅកាន់ក្រុមប្រទេសដែលមិនមែនជាសមាជិករបស់ G៧។ គេអាចគិតថាមានប្រទេសចិន និងប្រទេសឥណ្ឌា ព្រោះសព្វថ្ងៃ ប្រទេសទាំងពីរនេះជាអ្នកដែលបានប្រើប្រាស់មាសច្រើនជាងគេ។ ចិន និងឥណ្ឌាបានស្រូបយកដល់ទៅ ៥០% នៃទីផ្សារមាសក្នុងលោក។
ពិតណាស់ រុស្ស៊ីមានឆន្ទៈក្នុងការនាំមាសរបស់ខ្លួនទៅកាន់ប្រទេសទាំងពីរនេះ។ តែវាមិនមែនជារឿងងាយស្រួលទេ ព្រោះគេត្រូវការពេលវេលាច្រើន។ ចូរកុំភ្លេចថា ទីផ្សារនៅក្នុងទីក្រុងឡុងដ៏ជាទីផ្សារដ៏សំខាន់ជាងគេលើលោកក្នុងការទិញ លក់មាស។ ដូច្នេះច្បាស់លាស់ វាជារឿងលំបាកខ្លាំងណាស់សម្រាប់រុស្ស៊ីក្នុងការងាកទៅរកទីផ្សារផ្សេង។
មួយវិញទៀតគេត្រូវដឹងថាពេលនេះ ផ្ទាំងស៊ីបរបស់ក្រុមប្រទេស G៧ គឺទីផ្សារនៅក្នុងទីក្រុងឡុងដ៏ដែលជាទីផ្សារមាសមួយដ៏សំខាន់របស់រុស្ស៊ី។ តែក្នុងពេលជាមួយគ្នា ក្រុមប្រទេស G៧ បានបញ្ជៀសការដាក់ទណ្ឌកម្មលើរ៉ែលោហៈផ្សេងទៀតរបស់រុស្ស៊ី ព្រោះរុស្ស៊ីក៏ជាប្រទេសជង្រុករ៉ែលោហៈនីកែល និងរ៉ែលោហៈប៉ាល្លាឌីយ៉ូមដែរ។ ទាក់ទងនឹងរ៉ែលោហៈទាំងពីរនេះ បើយើងត្រូវដាក់កំហិតលើការនាំចូលពីរុស្ស៊ី គឺយើងទេតើដែលនឹងជួបបញ្ហាច្រើនជាងរុស្ស៊ី។
ដូច្នេះគេសំដៅតែលើលោហៈមាសរបស់រុស្ស៊ីដែលមិនសូវមានប្រយោជន៍ប៉ុន្មានសម្រាប់ប្រើនៅក្នុងវិស័យឧស្សាហកម្ម។ ចំណែកផលវិបាកសម្រាប់យើងវិញក៏មានកម្រិតតិចតួចដែរ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ