អ្នកជំនាញ៖គណបក្សប្រឆាំងពិបាកទាញបានផលចំណេញពីការចុះពីតំណែងប្រធានបក្សអភិរក្សនិយមរបស់លោកបូរីស ចនសុន
នៅថ្ងៃព្រហស្បតិ៍ ទី៧ កក្កដា នាយករដ្ឋមន្រ្តីអង់គ្លេសលោកបូរីស ចនសុនបានប្រកាសលាចុះពីតំណែងប្រធានគណបក្សអភិរក្សនិយម និងបញ្ជាក់ថា លោកបន្តអង្គុយកៅអីនាយករដ្ឋមន្រ្តីរហូតដល់មានការតែងតាំងប្រធានថ្មីរបស់គណបក្ស និងនាយករដ្ឋមន្រ្តីថ្មី។ តាមលោកចនសុន ការតែងតាំងប្រធានថ្មីរបស់បក្ស និងនាយករដ្ឋមន្រ្តីថ្មីជាឆន្ទៈចង់បានរបស់គណបក្សអភិរក្សនិយម។ គួរបញ្ជាក់ថាមានអាយុ ៥៨ឆ្នាំ និងក្រោយពីបានកាន់តំណែងរយៈពេល ៣ឆ្នាំ លោកចនសុនបានប្រឈមនឹងរឿងអាស្រូវជាច្រើនដែលបានធ្វើឲ្យសមាជិកក្នុងរដ្ឋាភិបាលរបស់លោកសម្រេចចិត្តលាចុះពីតំណែងជាបន្តបន្ទាប់នារយៈប៉ុន្មានថ្ងៃចុងក្រោយនេះ។ នៅក្នុងសង្កថាថ្លែងទៅកាន់ប្រជាជាតិ លោកចនសុនបានសម្តែងការសោកស្តាយពីការបោះបង់ការងារដែលលោកចាត់ទុកជាការងារដ៏ល្អបំផុតលើលោក។ តើការចាកចេញរបស់លោកចនសុនពេលនេះនឹងផ្តល់ឱកាសឲ្យគណបក្សពលករដែលជាបក្សប្រឆាំងដែរ ឬទេ?។ ប្រហែលជាពិបាកបន្តិច ព្រោះគណបក្សពលករគ្មានសំឡេងភាគច្រើននៅក្នុងសភាទេ នេះជាចម្លើយរបស់លោកអូរ៉េលៀង អង់ទ័ន នាយកនៃ ក្រុមអ្នកសង្កេតការណ៍ Brexit។
ចុះផ្សាយនៅថ្ងៃ៖
ស្តាប់ - ០១:៤៤
« សព្វថ្ងៃនេះ គណបក្សពលករគ្មានលទ្ធភាពដើម្បីដឹកនាំប្រទេសទេ ព្រោះគណបក្សនេះគ្មានសំឡេងភាគច្រើននៅក្នុងសភា។ ដូច្នេះ គណបក្សពលករនឹងត្រូវរង់ចាំការបោះឆ្នោតនៅពេលខាងមុខដែលនឹងអាចធ្វើឡើងតាមពីរផ្លូវ ឬមួយនៅក្រោយការរំលាយសភា ឬមួយនៅពេលចប់អាណត្តិសភារយៈពេល ៥ឆ្នាំជាផ្លូវការនៅឆ្នាំ ២០២៤។ ទោះបីត្រូវធ្វើឡើងក្នុងផ្លូវណាមួយក៏ដោយ គណបក្សពលករអាចទាញបានផលចំណេញពីស្ថានការណ៍ពេលនេះ។
តែដើម្បីអាចទាញបានប្រយោជន៍ពីស្ថានការណ៍មួយនេះ គណបក្សពលករត្រូវឈានទៅគូសវាសខ្សែបន្ទាត់នយោបាយ និងកំណត់ដៃគូរបស់ខ្លួនឲ្យបានច្បាស់លាស់ជាមុនសិន។ ត្រង់ចំណុចនេះមានការលើកឡើងពីការរំកិលរកក្រុមអ្នកសេរីប្រជាធិបតេយ្យនៅក្នុងមណ្ឌលមួយចំនួន។ នៅក្នុងការបោះឆ្នោតសភាមួយភាគកន្លងទៅនេះ ក្រុមអ្នកសេរីប្រជាធិបតេយ្យទទួលបានសំឡេងគាំទ្រគួរឲ្យកត់សម្គាល់។ តែគេក៏ត្រូវដឹងផងដែរថា គណបក្សពលករខ្លួនឯងក៏មានការបែកបាក់ផ្ទៃក្នុងដែរ។
គេឃើញមានវត្តមានក្រុមអ្នកឆ្វេងកណ្តាលនិយមសល់ពីគណបក្សសហភាពឡាបួរនៅក្នុងគណបក្សពលករ។ បន្ទាប់មក គេក៏ឃើញមានវត្តមានក្រុមអ្នកគាំទ្រលោក Jeremy Corbyn ដែលជាអ្នកឆ្វេងនិយមខ្លាំង និងក៏ជាអ្នកបំបែកបំបាក់ខ្លាំងដែរ។ ត្រង់ចំណុចនេះក៏អ៊ីចឹងដែរ ការផ្សះផ្សា វាមិនច្បាស់ថាលោក Keir Starmer ដែលជាប្រធានគណបក្សពលករទទួលបានជោគជ័យពេញលេញទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ