នាយក AIEA៖គេត្រូវព្យាយាមធ្វើឲ្យស្ថានការណ៍នៅមជ្ឈមណ្ឌលនុយក្លេអ៊ែរហ្សាប៉ូរីចាមានស្ថិរភាព
ប្រទេសអ៊ុយក្រែនបានប្រកាសក្នុងថ្ងៃសុក្រ ទី២៦ សីហានេះថា ខ្លួនកំពុងរៀបចំត ភ្ជាប់ឡើងវិញនូវបណ្តាញភ្លើងអគ្គិសនីពីមជ្ឈមណ្ឌលនុយក្លេអ៊ែរហ្សាប៉ូរីចាដែលបានដាច់ក្នុងថ្ងៃព្រហស្បតិ៍ ទី២៥ សីហា។ គួររម្លឹកថា មជ្ឈមណ្ឌលនុយក្លេអ៊ែរហ្សាប៉ូរីចាកំពុងស្ថិតក្រោមការកាន់កាប់របស់ទាហានរុស្ស៊ី ហើយអស់ជាច្រើនសប្តាហ៍ដែលរុស្ស៊ី និងអ៊ុយក្រែនបានចោទគ្នាទៅវិញ ទៅមកពីបទបានទម្លាក់គ្រាប់បែកសំដៅលើមជ្ឈមណ្ឌលនោះ។ ទង្វើនេះបានធ្វើឲ្យគេបារម្ភពីគ្រោះមហន្តរាយនុយក្លេអ៊ែរ។ អ្វីដែលគ្រប់គ្នាកំពុងរង់ចាំពេលនេះ គឺបេសកកម្មរបស់ទីភ្នាក់ងារថាមពលបរមាណូអន្តរជាតិ AIEA នៅហ្សាប៉ូរីចានាសប្តាហ៍ក្រោយ។ នៅក្នុងបទសម្ភាសន៍ឲ្យវិទ្យុបារាំងអន្តរជាតិ RFI នាយក AIEA លោករ៉ាហ្វាអែល ក្រូស៊ីបានលើកឡើងពីភាពចាំបាច់របស់បេសកកម្ម AIEA នៅនឹងកន្លែង។ តែលោកបានទទួលស្គាល់ជាបេសកកម្មស្មុគស្មាញ និងលំបាក។
ចុះផ្សាយនៅថ្ងៃ៖
ស្តាប់ - ០១:៣៣
« គឺជាបេសកកម្មមួយស្មុគស្មាញ។ ស្មុគស្មាញដែលមានតាំងពីការធ្វើដំណើរតាមផ្លូវទៅដល់ទីកន្លែង។ វាមិនមែនជារឿងងាយស្រួលទេ ព្រោះជាតំបន់សង្រ្គាម។ ខ្ញុំធ្លាប់ធ្វើដំណើរទៅកាន់អ៊ុយក្រែនចំនួនពីរដងហើយ។ លើកទី១ ទៅកាន់មជ្ឈមណ្ឌលនុយក្លេអ៊ែរឆែរណូប៊ីល និងលើកទី២ ទៅកាន់មជ្ឈមណ្ឌលនុយក្លេអ៊ែរមួយទៀតស្ថិតប៉ែកខាងត្បូងអ៊ុយក្រែន។ តែលើកនេះ អ៊ុយក្រែនកំពុងស្ថិតក្នុងសង្រ្គាមជាមួយរុស្ស៊ី។
ដូច្នេះ គេត្រូវធានាសន្តិសុខលើការធ្វើដំណើររបស់យើង ហើយការធានាសន្តិសុខនេះត្រូវធ្វើឡើងដោយមានការរួមសហការពីប្រទេសទាំងពីរអ៊ុយក្រែន និងរុស្ស៊ី។ នេះពិតជារឿងមួយមិនស្រួលទេនៅក្នុងកាលៈទេសៈសព្វថ្ងៃ។ បន្ទាប់មក គេត្រូវពឹងលើការជួយជ្រោមជ្រែងរបស់អង្គការសហប្រជាជាតិដោយត្រូវប្រើរថយន្តសន្តិសុខរបស់អង្គការសហប្រជាជាតិដើម្បីដឹកក្រុមការងាររបស់យើងទៅកាន់មជ្ឈមណ្ឌលនុយក្លេអ៊ែរហ្សាប៉ូរីចា។ នេះជារឿងឡូជីស្ទិក។
ក្រោយមក នៅមានរឿងបច្ចេកទេសដែលគេត្រូវកំណត់ពីរបៀបវារៈនៃបេសកកម្មដែលគេនឹងធ្វើ ហើយបើអាច រៀបចំឲ្យមានវត្តមានបន្តរបស់ទីភ្នាក់ងារនៅនឹងកន្លែង »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ