កូវីដ១៩៖ទីភ្នាក់ងារឱសថអឺរ៉ុបអនុញ្ញាតឲ្យប្រើវ៉ាក់សាំង Pfizer ប្រភេទថ្មីប្រឆាំងនឹងមេរោគបំប្លែងខ្លួន
នៅថ្ងៃចន្ទ ទី១២ កញ្ញា ទីភ្នាក់ងារឱសថអឺរ៉ុបបានអនុញ្ញាតឲ្យប្រើវ៉ាក់សាំង Pfizer មួយប្រភេទទៀតដែលតម្រូវបង្ការនឹងការឆ្លងមេរោគបំប្លែងខ្លួនរបស់អូមីក្រុងដែលមានឈ្មោះ BA.4 និង BA.5។ កម្មវត្ថុរបស់ទីភ្នាក់ងារឱសថអឺរ៉ុប គឺអនុញ្ញាតឲ្យប្រទេសអឺរ៉ុបត្រៀមបើកយុទ្ធនាការចាក់វ៉ាក់សាំងដូសជំរុញនារដូវរងារខាងមុខដើម្បីបង្ការនឹងរលកឆ្លងថ្មីជាយថាហេតុ។ គួររម្លឹកថាសព្វថ្ងៃនេះ គេនិយាយច្រើនពីការឆ្លងកូវីដ១៩ ដោយមេរោគបំប្លែងខ្លួនរបស់អូមីក្រុង។
ចុះផ្សាយនៅថ្ងៃ៖
ស្តាប់ - ០១:៥២
ទីភ្នាក់ងារឱសថអឺរ៉ុបបានបញ្ជាក់នៅក្នុងសេចក្តីប្រកាសព័ត៌មានរបស់ខ្លួនថា វ៉ាក់សាំង Pfizer ប្រភេទថ្មីមានប្រសិទ្ធិភាពខ្ពស់ក្នុងការបង្ការនឹងការឆ្លងមេរោគ BA.4 និង BA.5 ដែលជាមេរោគបំប្លែងខ្លួនផ្សេងទៀតរបស់អូមីក្រុង។ តែទីភ្នាក់ងារឱសថអឺរ៉ុបមិនភ្លេចបញ្ជាក់ថា ក្រុមមនុស្សដែលអាចចាក់វ៉ាក់សាំង Pfizer ប្រភេទថ្មីនេះបាន គឺក្រុមមនុស្សដែលមានអាយុចាប់ពី ១២ឆ្នាំឡើង និងដែលពួកគេបានចាក់វ៉ាក់សាំងដើមបង្ការកូវីដ១៩ យ៉ាងតិចមួយដូស។ ការអនុញ្ញាតឲ្យប្រើវ៉ាក់សាំង Pfizer ប្រភេទថ្មីពីទីភ្នាក់ងារឱសថអឺរ៉ុបបានធ្លាក់មក ចំពេលដែលប្រទេសអឺរ៉ុបកំពុងបារម្ភពីរលកឆ្លងថ្មីជាយថាហេតុនារដូវរងារខាងមុខ។
សំណើរបស់ទីភ្នាក់ងារឱសថអឺរ៉ុបពេលនេះនឹងត្រូវបញ្ជូនទៅឲ្យគណៈកម្មការអឺរ៉ុបដែលជាអ្នកសម្រេចចុងក្រោយ។ គួររម្លឹកថានៅដើមខែកញ្ញានេះដែរ ទីភ្នាក់ងារឱសថអឺរ៉ុបបានបើកភ្លើងខៀវឲ្យប្រើវ៉ាក់សាំង Pfizer និង Moderna ប្រភេទថ្មីដែលសំដៅបង្ការនឹងការឆ្លងមេរោគបំប្លែងខ្លួនរបស់កូវីដ១៩ដែលគេស្គាល់ជាអូមីក្រុង និងមេរោគបំប្លែងខ្លួនរបស់អូមីក្រុងដែលមានឈ្មោះ BA.1។ មែនទែនទៅសព្វថ្ងៃ គឺមេរោគបំប្លែងខ្លួនរបស់អូមីក្រុង ពិសេសប្រភេទ BA.4 និង BA.5 ដែលកំពុងបន្តឆ្លងរាលដាលខ្លាំងនៅអឺរ៉ុប និងអាមេរិកនាប៉ុន្មានខែចុងក្រោយនេះ។
ដើម្បីប្រឈមទប់នឹងកំណើនរលកឆ្លងថ្មីជាយថាហេតុនៅរដូវរងារខាងមុខ អឺរ៉ុបបានជ្រើសយកយុទ្ធសាស្រ្តមានវ៉ាក់សាំងគ្រប់ប្រភេទក្នុងដៃដើម្បីឆ្លើយតបនឹងមេរោគកូវីដដើម រួមទាំងមេរោគកូវីដបំប្លែងខ្លួនគ្រប់ប្រភេទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ