អ៊ុយក្រែនវាយយកបានទីក្រុងយុទ្ធសាស្រ្តក្នុងតំបន់ដូណែតស៍ ដែលរុស្ស៊ីទើបកាត់យកជាដែនដីរុស្ស៊ី
កងទ័ពអ៊ុយក្រែនបានប្រកាសកាលពីថ្ងៃ សៅរ៍ម្សិលមិញថា បានវាយរំដោះយកបានមកវិញ ទីក្រុងយុទ្ធសាស្រ្ត លីម៉ាន់ Lyman ក្នុងតំបន់ដូនែតស្ក នៅមួយថ្ងៃក្រោយ ដែលតំបន់នៅភាគខាងកើតរបស់អ៊ុយក្រែនមួយនេះ ត្រូវបានរុស្ស៊ីសម្រេចកាត់យកជាផ្លូវការជាមួយ តំបន់អ៊ុយក្រែន ចំនួន៣ របស់អ៊ុយក្រែន ទៅដាក់បញ្ចូលក្នុងដែនដីរុស្ស៊ី។ ក្រសួងការពារជាតិរុស្ស៊ីបានបញ្ជាក់ ការដកកងទ័ពចេញពីទីក្រុងលីម៉ាន់ នៅក្នុងសេចក្តីប្រកាសព័ត៌មាន នៅល្ងាចថ្ងៃសៅរ៍។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីប្រកាសឡោមព័ទ្ធ នៅព្រឹកថ្ងៃសៅរ៍ កងទ័ពអ៊ុយក្រែនបានអះអាងនៅប៉ុន្មានម៉ោងក្រោយថា បានវាយសម្រុកចូលក្នុងទីក្រុងយុទ្ធសាស្រ្ត លីម៉ាន់ ក្នុងតំបន់ដូនែត ដែលប្រធានាធិបតីរុស្ស៊ី ទើបប្រកាសដាក់បញ្ចូលជាផ្លូវការក្នុងទឹកដីរុស្ស៊ី។
រូបភាពវីដេអូបង្ហោះផ្សាយដោយរដ្ឋមន្រ្តីការពារជាតិអ៊ុយក្រែន បានបង្ហាញ ទាហានអ៊ុយក្រែន២នាក់ គ្រវី និងដោតទង់ជាតិរុស្ស៊ី នៅផ្លូវចូលទីក្រុងលីម៉ាន់។
លីម៉ាន់ ជាទីក្រុងយុទ្ធសាស្រ្ត ដែលកងទ័ពរុស្ស៊ីប្រើប្រាស់ជាមូលដ្ឋានភស្តុភារ និងដឹកជញ្ជូន សម្រាប់ប្រតិបត្តិការកងទ័ពនៅភាគខាងជើងតំបន់ដូនែត។ ការវាយដណ្តើមយកបានទីក្រុងលីម៉ាន់ ជាជ័យជំនះធំមួយរបស់កងទ័ពអ៊ុយក្រែន ដែលវាយដណ្តើមយកទឹកដីកាន់តែច្រើនរបស់ខ្លួន ពីកងទ័ពរុស្ស៊ី។ ការបោះជំហានទៅមុខ របស់កងទ័ពអ៊ុយក្រែន នៅតំបន់ដុនបាស់ ភាគខាងកើតអ៊ុយក្រែនជាហេតុផលជំរុញឲ្យរុស្ស៊ី របស់លោកពូទីន ប្រញាប់ប្រកាសភ្ជាប់យកទឹកដីភាគខាងកើត និងខាងត្បូងអ៊ុយក្រែន ជាកម្មសិទ្ធិផ្លូវការរបស់រុស្ស៊ី កាលពីថ្ងៃសុក្រ។
តាមអ្នកនាំពាក្យរបស់ក្រសួងការពារជាតិអ៊ុយក្រែន នៅប៉ុន្មានថ្ងៃចុងនេះ កងទ័ពរុស្ស៊ី ប្រមាណ ពី ៥០០០ ទៅ ៥៥០០នាក់ មានវត្តមាន នៅទីក្រុងលីម៉ាន់ ប៉ុន្តែ ទ័ពរុស្ស៊ីអាចថយចុះ ចំនួន នៅថ្ងៃប្រយុទ្ធ។
នៅប៉ុន្មាននាទីក្រោយការប្រកាសរបស់កងទ័ពអ៊ុយក្រែន ក្រសួងការពារជាតិបានលើកឡើងពីការដកកងទ័ពរុស្ស៊ី ចេញ ទីក្រុងលីម៉ាន់។ នៅក្នុងសេចក្តីថ្លែងការណ៍ ក្រសួងការពារជាតិរុស្ស៊ី បានអះអាងថា គំរាមកំហែងដោយការឡោមព័ទ្ធ កងទ័ពសម្ព័ន្ធមិត្តត្រូវបានដកចេញ ពីលីម៉ាន់ដើម្បី ទៅប្រចាំការនៅជួរសមរភូមិដែលមានអំណោយផលល្អប្រសើរ។
ប្រតិកម្មទៅនឹងបរាជ័យរបស់កងទ័ពរុស្ស៊ី នៅលីម៉ាន់ ប្រធានតំបន់ឆេឆេនី លោកRamzan Kadirov បាននិយាយថា ម៉ូស្គូគួរប្រើអាវុធនុយក្លេអ៊ែរកម្រិតខ្សោយ នៅអ៊ុយក្រែន។ នៅក្នុងសារតេឡេក្រាម ដែលនិយាយពីបរាជ័យរបស់កងទ័ពរុស្ស៊ី នៅលីម៉ាន់ ប្រធានតំបន់ឆេឆេនី និយាយថា រុស្ស៊ីគួរប្រើចាត់វិធានការខ្លាំង ដូចជាការអនុវត្តច្បាប់អាជ្ញាសឹក នៅតំបន់ជាប់ព្រំដែន និងការប្រើអាវុធនុយក្លេអ៊ែរ កម្រិតទាប។
នៅពេលប្រកាសកេណ្ឌទ័ពបម្រុងមួយភាគ កាលពីសប្តាហ៍មុន ប្រធានាធិបតីរុស្ស៊ី ធ្លាប់បានគំរាមនឹងប្រើប្រាស់គ្រប់មធ្យោបាយ ដើម្បីការពារដែនដីដែលត្រូវកាត់បញ្ចូលមកជាកម្មសិទ្ធិរុស្ស៊ី។ អតីតប្រធានាធិបតីរុស្ស៊ី លោកមេដវេឌេវ បានបញ្ជាក់ថា គ្រប់មធ្យោបាយដែលលោកពូទីនចង់សំដៅ មានផងដែរការប្រើប្រាស់អាវុធនុយក្លេអ៊ែរ។ ប៉ុន្តែ នេះជាលើកដំបូង ដែលថ្នាក់ដឹកនាំសំខាន់របស់រុស្ស៊ីម្នាក់ទាមទារឲ្យគេប្រើអាវុធនុយក្លេអ៊ែរ វាយប្រហារអ៊ុយក្រែន។
គួរបញ្ជាក់ថា រុស្ស៊ី ជាប្រទេសដែលមានអាវុធនុយក្លេអ៊ែរច្រើនជាងគេនៅក្នុងលោក (នាំមុខអាមេរិក) និងសំបូរអាវុធយុទ្ធសាស្រ្តនុយក្លេអ៊ែរ ដែលមានកម្រិតបំផ្លាញក្នុងទ្រង់ទ្រាយតូច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ