អង្គការWWF ៖ មានការបាត់បង់សត្វព្រៃជាមធ្យមជិត៧០% ចាប់ពីឆ្នាំ១៩៧០មក
ក្នុងអំឡុងពេល៥០ឆ្នាំកន្លងមកនេះ ផែនដីបានបាត់បង់ បរិមាណ សត្វព្រៃ ជាមធ្យម ជិត៧០%។ នេះបើតាមការរបាយការណ៍របស់អង្គការមូលនិធិពិភពលោកដើម្បីធម្មជាតិ WWF ចេញផ្សាយនៅថ្ងៃព្រហស្បតិ៍ទី ១៣តុលា២០២២។ សម្រាប់WWF មូលហេតុនៃការបាត់បង់ជីវៈចម្រុះ មានពាក់ព័ន្ធកាន់តែខ្លាំងឡើងៗនឹងការប្រែប្រួលអាកាសធាតុ។
ចុះផ្សាយនៅថ្ងៃ៖ កែប្រែថ្ងៃទី៖
ពីឆ្នាំ១៩៧០មកទល់នឹងឆ្នាំ២០១៨ សត្វព្រៃដូចជា ត្រី សត្វស្លាប សត្វចិញ្ចឹមកូនដោយទឹកដោះ សត្វរស់ក្នុងទឹកផងនិងលើគោកផង ព្រមទាំងពពួកសត្វល្មូន ចំនួនប្រមាណ៦៩% បានបាត់បង់ ពីភពផែនដី។ នេះបើតាមរបាយការណ៍វាស់សន្ទទស្សន៍នៃជីវិតសត្វនៅលើផែនដី របស់អង្គការWWF ដែលចេញផ្សាយជារៀងរាល់ពីរឆ្នាំម្តង។
បើតាមរបាយការណ៍ដដែល អាមេរិកឡាទីន ដែលល្បីល្បាញខាងជីវៈចម្រុះ និងជាអ្នកទ្រទ្រង់អាកាសធាតុ បានបាត់បង់សត្វព្រៃជាមធ្យមដល់ទៅ៩៤%។ អាហ្វ្រិក៦៦% តែចំនួនសត្វស្វាGorilles នៅវាលទំនាបបានធ្លាក់ចុះអស់៨០%។ ចំណែកនៅអឺរ៉ុប ចំនួនសត្វព្រៃថយចុះអស់ជាមធ្យមតែ១៨%ទេ ប៉ុន្តែការបាត់បង់បរិមាណជីវៈចម្រុះយ៉ាងហួសហេតុនិងជាប្រវត្តិសាស្ត្របានកើតឡើងនៅមុនអង្គការចាប់ផ្តើមសិក្សា។
របាយការណ៍បានចង្អុលបង្ហាញអំពីមូលហេតុជាច្រើនដែលនាំឱ្យមានការបាត់បង់សត្វព្រៃនេះ។ មូលហេតុចម្បង គឺគេការបំផ្លិចបំផ្លាញជម្រកធម្មជាតិ ដើម្បីធ្វើកសិកម្ម បន្តដោយការ ទាញយកប្រយោជន៍ហួសហេតុនិងប្រម៉ាញ់។ ការប្រែប្រួលអាកាសធាតុ ជាកត្តាទីបី ប៉ុន្តែមានតួនាទីពន្លឿនការបាត់បង់លឿនខ្លាំងណាស់។ នេះបើតាមការបញ្ជាក់របស់លោក Marco Lambertini អគ្គនាយកអង្គការWWF។ បន្ទាប់មកទៀតគឺមូលហេតុ ខ្យល់ ទឹក និងដីពុល ព្រមទាំងការបណ្តុះពូជសត្វសាយកូន។
នៅក្នុងសន្និសីទកាសែតអន្តរជាតិ អគ្គនាយកWWF បានអះអាងថា របាយការណ៍បានទាញសញ្ញាអាសន្នខ្ពស់បំផុតសម្រាប់ពិភពលោក និងមនុស្សជាតិ នៅចំពេលយើងចាប់ផ្តើមយល់ច្បាស់ថាប្រព័ន្ធអេកូសាស្ត្រមាននិរន្តរភាព ជីវៈចម្រុះសម្បូរបែប អាកាសធាតុថេរ (មិនឡើងកម្តៅ) ជាការចាំបាច់ក្នុងការធានាអនាគតរុងរឿង មានសមភាពខ្ពស់ និងមានសុវត្ថិភាពប្រាកដ សម្រាប់យើងផងនិងកូនចៅជំនាន់ក្រោយៗផង។ ក្នុងន័យនេះ ដើម្បីទប់ស្កាត់ការបាត់បង់សត្វព្រៃ និងទប់កុំឱ្យអាកាសធាតុប្រែប្រួលខ្លាំង របាយការណ៍WWFដដែលនេះ បានទទូចឱ្យបង្កើនការខិតខំប្រឹងប្រែងអភិរក្សសត្វព្រៃ ស្តារហើយផលិតនិងបរិភោគចំណីអាហារដែលស្ថិតស្ថេរយូរអង្វែង និងឈប់បញ្ចេញឧស្ម័នកាបូនិកឱ្យបានលឿនបំផុតលើគ្រប់វិស័យសេដ្ឋកិច្ច។
អង្គការWWF បានអំពាវនាវឱ្យរដ្ឋាភិបាលឆក់យកឱកាសចុងក្រោយ ព្រមអនុម័តកិច្ចព្រមព្រៀងពិភពលោកសង្គ្រោះសត្វព្រៃ ប្រកបដោយមហិច្ឆតាបំផុត ក្នុងជំនួបកំពូលជីវៈចម្រុះអន្តរជាតិCOP15 នៅទីក្រុងម៉ុងរ៉េអាល់ នាខែធ្នូខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ