តើអនាគតនាយករដ្ឋមន្ត្រីអង់គ្លេសថ្មី លោក រីឈី ស៊ូណាក់ ជានរណា ?
ដើមកំណើតឥណ្ឌា អាយុ៤២ឆ្នាំ លោក រីឈី ស៊ូណាក់ Rishi Sunak នឹងក្លាយជានាយករដ្ឋមន្ត្រីអង់គ្លេសថ្មី បន្តពីលោកស្រី លីស ត្រាស្ស ដែលបានលាលែងចេញពីតំណែង។ ជាអតីតរដ្ឋមន្ត្រីក្រសួងហិរញ្ញវត្ថុ លោកស៊ូណាក់ ជាបេក្ខជនតែម្នាក់គត់ដែលប្រមូលហត្ថលេខាគាំទ្របានគ្រប់គ្រាន់សម្រាប់ការបោះឆ្នោតផ្ទៃក្នុងបក្ស ឱ្យធ្វើប្រធានគណបក្សអភិរក្សនិយម ដែលកាន់អំណាចនៅអង់គ្លេសតាំងពី១២ឆ្នាំមក នៅថ្ងៃចន្ទទី ២៤តុលា២០២២។ បេក្ខជនពីររូបទៀត គឺលោក បូរីស ចនសុន បានបោះបង់ការប្រកួត ឯលោកស្រី ផែននី ម័រដូនត៍ រកហត្ថលេខាគាំទ្រមិនបាន។
ចុះផ្សាយនៅថ្ងៃ៖
ស្តាប់ - ០២:១១
នៅឆ្នាំ២០១៥ លោក ស៊ូណាក់ បានក្លាយជាតំណាងសភា និងឡើងប្រជាប្រិយភាពយ៉ាងលឿនរហ័ស។ បង្ហាញជំហរគាំទ្រBrexitយ៉ាងមុតមាំតាំងពីឆ្នាំ២០១៦ លោក ស៊ូណាក់ បានក្លាយជារដ្ឋមន្ត្រីក្រសួងហិរញ្ញវត្ថុរបស់រដ្ឋាភិបាលលោកបូរីស ចនសុន នៅឆ្នាំ២០២០ ក្នុងវ័យមិនទាន់៤០ឆ្នាំស្រួលបួលផង តែក៏ជារដ្ឋមន្ត្រីដំបូងគេម្នាក់ដែលលាលែងចេញពីរដ្ឋាភិបាលដដែលនោះ នៅខែកក្កដា ២០២២ ពោលគឺថ្ងៃមុនការលាលែងពីតំណែងនាយករដ្ឋមន្ត្រីរបស់លោកបូរីសចនសុន។
លោកស៊ូណាក់ បានស្គាល់បរាជ័យលើកដំបូង តែមួយភ្លែត គឺពេលគណបក្សអភិរក្សនិយមអង់គ្លេស ជ្រើសរើសលោកស្រី លីសត្រាស្ស ជានាយករដ្ឋមន្ត្រី ទាំងលោកស៊ូណាក់មានសមាជិកសភាគាំទ្រច្រើនជាង។ កាលណោះ លោកបានព្រមានក្រុមអ្នកអភិរក្សនិយមថា កម្មវិធីនយោបាយលោកស្រី លីស ត្រាស្សមិនអាចទៅរួចទេ។
ជាកូនរបស់គ្រួសារអន្តោប្រវេសន៍ ដើមកំណើតឥណ្ឌា មកដល់អង់គ្លេសនៅឆ្នាំ១៩៦០ លោក រីឈី ស៊ូណាក់ បានពន្យល់ថាឪពុកម្តាយបានលះបង់គ្រប់យ៉ាងដើម្បីឱ្យលោកបានចូលរៀន នៅសាលាដ៏ល្បីៗបំផុត គឺ Winchester College - Oxford និងStanford ទីដែលលោកបានជួបរៀបអាពាហ៍ពិពាហ៍ជាមួយនាង Akshata Murty កូនស្រីមហាសេដ្ឋីក៏កំពូលម្នាក់របស់ឥណ្ឌា។
លោក ស៊ូណាក់ បានផ្តើមអាជីពការងារនៅក្នុងវិស័យធនាគារGoldman Sachs ក្នុងនាមជាអ្នកវិភាគវ័យក្មេង និងបន្តអាជីពក្នុងមូលនិធិវិនិយោគជាច្រើន។ ការងារល្អនិងគ្រួសារកូនអ្នកមានទៀត ទ្រព្យសម្បត្តិរបស់លោកស៊ូណាក់ និងភរិយា បានកើនឡើងយ៉ាងលឿនដល់ជាង៨៤០លានអឺរ៉ូ។ ខ្សែជីវិតជោគជ័យដែលលោកស៊ូណាក់ កាន់តែមានជំនឿថាក្នុងផ្នែកសេដ្ឋកិច្ចជាតិ ត្រូវធ្វើកំណែទម្រង់សេរីនិយម ផ្តល់អាទិភាពដល់ក្រុមហ៊ុនសហគ្រាស និងការធ្វើទំនើបកម្ម។
ប៉ុន្តែ កាលពីខែមេសា២០២២ នៅពេលលោកជារដ្ឋមន្ត្រីក្រសួងហិរញ្ញវត្ថុ កាសែត The Independance បានរិះគន់ថាភរិយាលោកមានអស្រ័យដ្ឋានពន្ធនៅក្រៅអង់គ្លេស អាចចំណេញប្រាក់ច្រើនពីការបង់ពន្ធ។ ក្រៅអំពីរងការរិះគន់ជីវិតបែបហ៊ឺហា ក៏មានដែរការវាយប្រហារបែបអើសអើងសម្បុរស្បែកមិនស។ លោក ស៊ូណាក់ គឺជានាយករដ្ឋមន្ត្រីអង់គ្លេសដំបូងគេបង្អស់ដែលមានដើមកំណើតជាឥណ្ឌា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ