អ៊ុយក្រែនទទួលបានប្រព័ន្ធការពារមីស៊ីលថ្មីពីបស្ចិមលោក
នៅថ្ងៃចន្ទទី៧ វិច្ឆិកា ២០២២នេះ អ៊ុយក្រែនបានទទួលប្រព័ន្ធការពារអាកាសថ្មីពីបស្ចិមលោក ដើម្បីទប់ទល់នឹងមីស៊ីលរបស់រុស្ស៊ី ដែលបាញ់ប្រសាចមកលើក្រុងជាច្រើនរបស់អ៊យក្រែន។ តាំងពីដើមខែតុលាមក មីស៊ីលរុស្ស៊ីបានបំផ្លាញហេដ្ឋារចនាសម្ព័ន្ធជាច្រើន រាប់ទាំងបណ្តាញទឹកស្អាតនិងអគ្គិសនី អស់ប្រមាណ៤០%។ នេះបើតាមអាជ្ញាធរអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០០
ឆ្លើយតបទៅនឹងការទទូចរបស់លោកប្រធានាធិបតីអ៊ុយក្រែន សុំជំនួយពីបណ្តាប្រទេសលោកខាងលិច ឱ្យបង្កើតប្រព័ន្ធខែលការពារហេដ្ឋារចនាសម្ព័ន្ធជាតិនានា ដែលរុស្ស៊ីដៅបំផ្លាញ នៅថ្ងៃចន្ទទី ៧ វិច្ឆិកា អ៊ុយក្រែនបានទទួលប្រព័ន្ធការពារប្រឆាំងនឹងមីស៊ីលអាកាស Nasams Aspide ពីសហរដ្ឋអាមេរិក អេស្ប៉ាញ និងន័រវែស។ អាវុធនេះអាចនឹងជួយពង្រឹងសមត្ថភាពយោធា និងការពារដែនអាកាសអ៊ុយក្រែនបានប្រសើរជាងមុន។ នេះបើតាមសាររបស់រដ្ឋមន្ត្រីក្រសួងការពារជាតិអ៊ុយក្រែន លោក Oleksiï Reznikov។
សូមបញ្ជាក់ថាមុនទទួលប្រព័ន្ធខែលមីស៊ីលថ្មីនេះ អ៊ុយក្រែនក៏បានទទួលផងដែរនូវប្រព័ន្ធការពារមីស៊ីលអាល្លឺម៉ង់ Iris-Tជំនាន់ក្រោយបង្អស់ ឬប្រព័ន្ធមីស៊ីលបារាំង Crotale និងប្រព័ន្ធការពារមីស៊ីលរបស់អង់គ្លេសAmraam។
បស្ចិមលោកសង្ឃឹមថានឹងអាចបំពាក់ឱ្យអ៊ុយក្រែននូវប្រព័ន្ធខែលការពារអាកាស Patchwork តាមរយៈបរិក្ខារដែលខ្លះទំនើបខ្លាំងនិងខ្លះជារបស់ជំនំ។
បើតាមអាជ្ញាធរអ៊ុយក្រែន តាំងពីដើមខែតុលាមក រុស្ស៊ីបានបើកការវាយប្រហារយ៉ាងច្រើននិង បានបំផ្លាញរចនាសម្ព័ន្ធថាមពលអ៊ុយក្រែនអស់ប្រមាណ៤០% ដោយប្រើជាពិសេសដ្រូនអត្តឃាតផលិតនៅអ៊ីរ៉ង់។ ប្រជាពលរដ្ឋអ៊ុយក្រែនជាច្រើនសិបពាន់នាក់គ្មានអគ្គិសនីប្រើប្រាស់ ចំណែកប្រព័ន្ធផ្គត់ផ្គង់ថាមពលអ៊ុយក្រែនរងសម្ពាធយ៉ាងខ្លាំង។ ការវាយប្រហារដោយដ្រូន និងមីស៊ីល លើក្រុងកៀវ នៅថ្ងៃទី ៣១ខែតុលា បានផ្តាច់បណ្តាញទឹកស្អាតរបស់រដ្ឋធានីអស់ប្រមាណ៨០% ផ្ទះសម្បែងជាង៣៥ម៉ឺនខ្នង ដាច់ចរន្តអគ្គីសនី មុននឹងអាចជួសជុលស្តារបានឡើងវិញបានខ្លះ។ ក្នុងរយៈពេល២៤ម៉ោងចុងក្រោយ កងកម្លាំងរុស្ស៊ី បានបាញ់មីស៊ីលបួន និងវាយប្រហារផ្លូវអាកាសទម្លាក់គ្រាប់ចំនួន២៤ នៅទូទាំងប្រទេស។ នេះបើតាមយោធាអ៊ុយក្រែន ដែលបញ្ជាក់ថាមានជនអ៊ុយក្រែនយ៉ាងហោចណាស់ម្នាក់បានស្លាប់ក្នុងការទម្លាក់គ្រាប់បែកនោះ លើតំបន់ហ្សាប៉ូរីចា ម្នាក់នៅតំបន់ប៉ែកខាងជើង។ តែស្ថានភាពយ៉ាងស្ងប់ស្ងាត់ខ្លាំងនៅថ្ងៃចន្ទនេះ។ អ្នកនាំពាក្យវិមានក្រេមឡាំងបានអះអាងជាថ្មីថាមូស្គូព្រមផ្តល់លទ្ធភាពចរចាជាមួយក្រុងកៀវហើយតែលោក ហ្សេឡេនស្គី បែរជានៅតែបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ