អូតង់សន្យាជួយកម្តៅអ៊ុយក្រែនក្នុងរដូវរងារ ខណៈដែលរុស្ស៊ីយករដូវរងារធ្វើជាអាវុធដើម្បីធ្វើបាបពលរដ្ឋអ៊ុយក្រែន
នៅថ្ងៃអង្គារ ទី២៩ វិច្ឆិកា អង្គការអូតង់បានបើកកិច្ចប្រជុំថ្នាក់រដ្ឋមន្រ្តីការបរទេសនៅក្នុងទីក្រុងប៊ុយការ៉េស ប្រទេសរូម៉ានី។ មានប្រធានបទសំខាន់ចំនួនពីរដែលកិច្ចប្រជុំបានលើកយកទៅជជែក ទី១ ជួយអ៊ុយក្រែនឲ្យឆ្លងផុតរដូវរងារ និងទី២ បន្តពិនិត្យលើសំណើសុំចូលអូតង់របស់ប្រទេសហ្វាំងឡង់ និងប្រទេសស៊ុយអែត។ គួរបញ្ជាក់ថានារយៈពេលចុងក្រោយនេះ រុស្ស៊ីបានប្រើមីស៊ីលវាយប្រហារលើហេដ្ឋារចនាសម្ព័ន្ធស៊ីល ពិសេសថាមពលរបស់អ៊ុយក្រែនដែលបានធ្វើឲ្យពលរដ្ឋអ៊ុយក្រែនភាគច្រើនគ្មានភ្លើងអគ្គិសនី និងទឹកស្អាតប្រើប្រាស់។
ចុះផ្សាយនៅថ្ងៃ៖
ស្តាប់ - ០២:១០
ថ្លែងនៅក្នុងកិច្ចប្រជុំ ប្រមុខអង្គការអូតង់លោកយែន ស្តុលទែនប៊ែរបានបរិហាររុស្ស៊ីពីការប្រើរដូវរងារជាអាវុធដោយបានវាយប្រហារលើហេដ្ឋារចនាសម្ព័ន្ធស៊ីវិល ពិសេសហេដ្ឋារចនាសម្ព័ន្ធថាមពលរបស់អ៊ុយក្រែន។ តាមលោកយែន ស្តុលទែនប៊ែរ ទង្វើរបស់រុស្ស៊ីរបៀបនេះជាទង្វើចេតនាដើម្បីកាត់ផ្តាច់បណ្តាញភ្លើងអគ្គិសនី និងបណ្តាញទឹកស្អាតក្នុងគោលដៅធ្វើបាបពលរដ្ឋអ៊ុយក្រែន ខណៈដែលសីតុណ្ហភាពកំពុងធ្លាក់ចុះខ្លាំងក្នុងរដូវរងារ។ ប្រមុខអង្គការអូតង់បានបន្ថែមថា គេត្រូវជួយអ៊ុយក្រែនឲ្យបានច្រើនថែមទៀត ក្នុងនោះមានទាំងជំនួយប្រព័ន្ធការពារដែនអាកាស។
គេនៅមិនទាន់ដឹងពីទំហំនៃជំនួយហិរញ្ញវត្ថុរបស់អូតង់ក្នុងរឿងថាមពលចំពោះអ៊ុយក្រែនទេ។ ពីខាងអាមេរិក អ្នកទទួលខុសត្រូវជាន់ខ្ពស់ម្នាក់ដែលមិនបញ្ចេញឈ្មោះបានបញ្ជាក់ថា ជំនួយហិរញ្ញវត្ថុរបស់អាមេរិកសម្រាប់ថាមពលអ៊ុយក្រែនមានច្រើនសម្បើម។ តែលោកមិនព្រមប្រាប់តួលេខ និងបានត្រឹមរម្លឹកថា ប្រធានាធិបតីអាមេរិកលោកបៃដិនបានត្រៀមលុយចំនួន ១ ១០០លានដុល្លារសម្រាប់ជួយថាមពលនៅអ៊ុយក្រែន និងនៅម៉ុលដាវី។ ចំណែកសហភាពអឺរ៉ុបបានស្នើឲ្យប្រើយន្តការគាំពារស៊ីវិលដើម្បីបញ្ជូនឲ្យអ៊ុយក្រែននូវម៉ាស៊ីនភ្លើងប្រមាណ ៥០០គ្រឿង និងជម្រកទប់ទល់នឹងរដូវរងារប្រមាណ ២០០០ជម្រក។
គួររម្លឹកថានាដើមខែតុលា រុស្ស៊ីបានផ្តើមយុទ្ធនាការវាយប្រហារដោយមីស៊ីលលើហេដ្ឋារចនាសម្ព័ន្ធថាមពលអ៊ុយក្រែន។ តាមតួលេខរបស់រដ្ឋាភិបាលអ៊ុយក្រែន មានហេដ្ឋារចនាសម្ព័ន្ធថាមពលចន្លោះពី ២៥% ទៅ ៣០% បានរងការខូចខាតដោយគ្រាប់មីស៊ីលរុស្ស៊ី។ ក្រៅពីសង្រ្គាមអ៊ុយក្រែន កិច្ចប្រជុំថ្នាក់រដ្ឋមន្រ្តីការបរទេសអូតង់ក៏បានបន្តពិនិត្យលើសំណើសុំចូលជាសមាជិកអូតង់របស់ប្រទេសហ្វាំងឡង់ និងស៊ុយអែត។ សំណើមួយនេះត្រូវបានសមាជិក ២៨ប្រទេសក្នុងចំណោមសមាជិកទាំង ៣០ប្រទេសរបស់អូតង់ឲ្យសច្ចាប័នរួចហើយ។ គេនៅរង់ចាំភ្លើងខៀវតែពីប្រទេសតួកគី និងហុងគ្រីប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ