ប្រទេសផលិតប្រេងរក្សាជំហរដដែល ទោះត្រូវប្រឈមនឹងអនាគតមិនច្បាស់លាស់ក្តី
បើទោះបីជាប្រឈមមុខនឹងអនាគតតម្លៃប្រេងមិនច្បាស់លាស់ក៏ដោយ ក៏ក្រុមបណ្តាប្រទេសអ្នកផលិតប្រេង នៅតែសម្រេចរក្សា«ជំហរនៅទ្រឹងដដែល» ស្របតាមវិធានការណ៍ដែលបានដាក់ចេញកាលពីតុលា។ នេះគឺជាការសម្រេចចិត្ត នៅថ្ងៃអាទិត្យ ទី៤ធ្នូ ក្នុងកិច្ចប្រជុំជាបន្ទាន់មួយ នៅក្រុងវីយែន ប្រទេសអូទ្រីស។ ការជួបប្រជុំគ្នាជាប្រញាប់នេះ គឺបន្ទាប់ពីប្រទេសអ្នកមានសេដ្ឋកិច្ចជឿនលឿន G7 និងអូស្ត្រាលី ដាក់ទណ្ឌកម្មកំណត់កម្រិតតម្លៃប្រេងរុស្ស៊ី ឲ្យត្រឹមតែ ៦០ដុល្លារក្នុងមួយបារីល។
ចុះផ្សាយនៅថ្ងៃ៖
ស្តាប់ - ០២:៣២
អង្គការក្រុមប្រទេសផលិតប្រេង ហៅកាត់ថា Opep បានសម្រេចក្នុងសំឡេងតែមួយ ដោយជ្រើសរើសអនុវត្តសេចក្តីសម្រេចរបស់ខ្លួនកាលពីខែតុលាកន្លងទៅ ពោលគឺ រក្សាកម្រិតកំហិតកាត់បន្ថយផលិតប្រេង ចំនួន ២ លានបារីលក្នុងមួយថ្ងៃ រហូតដល់ ដាច់ឆ្នាំ២០២៣។ នេះបើតាមប្រភពពីអ្នកតំណាងប្រទេស ចំនួន ២ ដែលបានចូលរួមក្នុងកិច្ចប្រជុំ នៅក្រុងវីយែន។ កិច្ចប្រជុំនេះ មានអ្នកតំណាងប្រទេសផលិតប្រេង ១៣ ដឹកនាំដោយរាជធានីរីយ៉ាដ បូកទាំងសម្ព័ន្ធមិត្ត ១០ទៀត ញាក់ខ្សែដោយរដ្ឋបាលក្រុងម៉ូស្កូ។
ទោះជាយ៉ាងណាក្តី អង្គការប្រទេសផលិតប្រេង បញ្ជាក់ថាអាចនឹងផ្លាស់ប្តូរការសម្រេចចិត្តដែរ ប្រសិនបើមានករណីចាំបាច់។
អ្នកវិភាគមើលឃើញថា ការសម្រេចចិត្ត រក្សាស្ថានភាពចង្វាក់ផលិតកម្មប្រេងដដែល ពីសំណាក់អង្គការក្រុមប្រទេសផលិតប្រេង គឺស្តែងឲ្យឃើញជាក់ពី ភាពមិនច្បាស់លាស់នៃតម្លៃប្រេងរុស្ស៊ី។
គួរបញ្ជាក់ថា តម្លៃប្រេងឆៅពិភពលោក ធ្លាក់ចុះពី ១៣០ ដុល្លារក្នុងមួយធុងបារីល នៅខែមីនា គឺក្រោយពីផ្ទុះសង្គ្រាមនៅអ៊ុយក្រែន ហើយវាធ្លាក់ចុះទៀត មកត្រឹម ៨០-៨៥ដុល្លារ ដែលជាហេតុធ្វើឲ្យប្រទេសផលិតប្រេង ផ្អាកនិងកាត់បន្ថយចំនួនផលិត ដើម្បីឲ្យតម្លៃនៅលើទីផ្សារងើបឡើងវិញ។
សហភាពអឺរ៉ុប បានដាក់ទណ្ឌកម្មរុស្ស៊ី ដោយកំណត់តម្លៃប្រេងឆៅរុស្ស៊ី ឲ្យនៅត្រឹមតែ ៦០ ដុល្លារ ក្នុងមួយបារីស ឬថោកជាងនេះ សម្រាប់ការដឹកជញ្ចូនតាមសមុទ្រ។ បំរាមកំណត់តម្លៃនេះ ត្រូវចូលជាធរមាន នៅថ្ងៃច័ន្ទ ៥ធ្នូ។ ជាមួយគ្នានេះ ក្រុមប្រទេសអ្នកមានសេដ្ឋកិច្ចជឿនលឿន ទាំង៧ បូកនិងអូស្ត្រាលី យល់ព្រមអនុម័តសម្រេចអនុវត្តតាមដែរ កាលពីថ្ងៃ សុក្រកន្លងទៅ។
ប្រទេសបច្ចិមលោក បញ្ជាក់ថា ការសម្រេចវិធានទាំងនេះ ជាទណ្ឌកម្ម បន្ថែមលើទណ្ឌកម្មផ្សេងទៀត ដាក់សង្កត់ករដ្ឋបាលក្រុងម៉ូស្កូ ដើម្បីកាត់បន្ថយប្រភពចំណូលសេដ្ឋកិច្ចរុស្ស៊ី។ រុស្ស៊ី ដែលបច្ចិមប្រទេស ចោទប្រកាន់ថាបានយកលុយចំណេញពីការលក់ប្រេងនិងឧស្ម័ន ទៅបំពាក់បំប៉ន់ម៉ាស៊ីនធ្វើសង្គ្រាមឈ្លានពានអ៊ុយក្រែន។
រុស្ស៊ី របស់លោក ពូទីន បានព្រមានវិញដែរថា ឈប់លក់ប្រេងឲ្យប្រទេសណាដែលចូលដៃអនុវត្តវិធានការណ៍កំណត់តម្លៃប្រេងរុស្ស៊ីនោះ ហើយនិងថា បស្ចិមលោកនឹងទទួលរកផលវិបាកធ្ងន់ធ្ងរ ពីអស្ថិរភាពទីផ្សារប្រេង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ