លោកពូទីនបញ្ជាឲ្យកងទ័ពផ្អាកប្រយុទ្ធ៣៦ម៉ោងសម្រាប់បុណ្យណូអែលនៅរុស្ស៊ី
នៅប៉ុន្មានថ្ងៃមុនបុណ្យឆ្លងឆ្នាំថ្មីនៅរុស្ស៊ី ពាក្យអំពាវនាវឲ្យមានបទឈប់បាញ់ នៅក្នុងសង្រ្គាមអ៊ុយក្រែនមានកាន់តែច្រើន។ នៅក្រោយប្រមុខសាសនារុស្ស៊ីអំពាវនាវឲ្យភាគីជម្លោះផ្អាកប្រយុទ្ធគ្នា ប៉ុន្មានថ្ងៃដើម្បីបើកផ្លូវឲ្យទាហានរុស្ស៊ី និងអ៊ុយក្រែនអាចប្រារព្ធពិធីបុណ្យឆ្លងឆ្នាំថ្មី នៅថ្ងៃទី ៧មករាខាងមុខ ប្រធានាធិបតីរុស្ស៊ីបានបញ្ជាឲ្យកងទ័ពរុស្ស៊ីផ្អាកប្រយុទ្ធ១ថ្ងៃកន្លះ គិតចាប់ពីថ្ងៃសុក្រទី ៦មករា។ ប៉ុន្តែ អ៊ុយក្រែនទាត់ចោលបទឈប់បាញ់របស់រុស្ស៊ី។ នៅថ្ងៃព្រហស្បតិ៍ម្សិលមិញ ប្រធានាធិបតីរុស្ស៊ីបាននិយាយប្រាប់សមភាគីតួកគីថា រុស្ស៊ីត្រៀមខ្លួនចរចាមែនទែន ជាមួយអ៊ុយក្រែន។ ប៉ុន្តែ អ៊ុយក្រែនត្រូវទទួលយកលក្ខខណ្ឌ ពីរុស្ស៊ី។
ចុះផ្សាយនៅថ្ងៃ៖
ស្តាប់ - ០២:១៨
មួយឆ្នាំ នៃសង្រ្គាមឈ្លានពាន អ៊ុយក្រែន ប្រធានាធិបតីរុស្ស៊ី លោកពូទីនបាននិយាយថា រុស្ស៊ី ត្រៀមខ្លួនចរចាមែនទែន ជាមួយអ៊ុយក្រែន ប៉ុន្តែ នៅក្នុងលក្ខខណ្ឌដែលអ៊ុយក្រែនយល់ព្រម ទទួលស្គាល់តថភាពថ្មីនៃដែនដីដែលកើតឡើងនៅក្រោយ ប្រតិបត្តិការកងទ័ពពិសេសរបស់រុស្ស៊ី នៅអ៊ុយក្រែន។
នៅខែ កញ្ញាឆ្នាំមុន ម៉ូស្គូបានកាត់យកមកគ្រប់គ្រង តំបន់ចំនួន ៤របស់អ៊ុយក្រែន ភាគខាងជើង និងខាងត្បូង ដែលកងទ័ពរុស្ស៊ីបានវាយចូលកាន់កាប់ តាំងពីដើមដំបូងនៃសង្រ្គាមឈ្លានពានអ៊ុយក្រែន។
“រុស្ស៊ីត្រៀមខ្លួនចរចាជាមួយអ៊ុយក្រែន” នេះជាការឆ្លើយតបរបស់លោកពូទីន ទៅកាន់សមភាគី តួកគី លោករេសេប អ៊ែរដូហ្កាន ដែលបានទាមទារឲ្យរុស្ស៊ី អនុវត្តបទឈប់បាញ់ដោយឯកតោភាគី។ នៅក្នុងកិច្ចសន្ទនាតាមទូរស័ព្ទជាមួយប្រធានាធិបតីរុស្ស៊ី កាលពីថ្ងៃព្រហស្បតិ៍ មេដឹកនាំតួកគី បាននិយាយថា ការអំពាវនាវឲ្យមានសន្តិភាព និងការចរចារវាងរុស្ស៊ី និងអ៊ុយក្រែន គួរតែមានអមដោយបទឈប់បាញ់ឯកតោភាគី។
ជាសមាជិករបស់អូតង់ ដែលបដិសេធមិនដាក់ទណ្ឌកម្មលើរុស្ស៊ី តាមប្រទេសលោកខាងលិច តួកគីដែលមានទំនាក់ទំនងល្អជាមួយអ៊ុយក្រែន និងរុស្ស៊ី បានព្យាយាមសម្របសម្រួល ជំរុញឲ្យភាគីជម្លោះចូលតុចរចា។ ការចរចាសន្តិភាព រវាងរុស្ស៊ី និងអ៊ុយក្រែន បានជាប់គាំងរហូតមក ប៉ុន្តែ តួកគីជាមួយ អង្គការសហប្រជាជាតិបានជោគជ័យសម្របសម្រួលឲ្យរុស្ស៊ីបើកផ្លូវឲ្យមានការនាំចេញស្រូវសាលីអ៊ុយក្រែន។
នៅក្នុងកិច្ចសន្ទនាតាមទូរស័ព្ទជាមួយប្រធានាធិបតីតួកគី លោកពូទីនបានឆ្លៀតរិះគន់ផងដែរក្រុមប្រទេសលោកខាងលិចថា បានដើរតួជាអ្នកបំផ្លិចបំផ្លាញ នៅក្នុងជម្លោះអ៊ុយក្រែន។ តាមលោកពូទីន បស្ចិមលោកបានចាក់បញ្ច្រកអ៊ុយក្រែន តាមរយៈ ការបញ្ជូនផ្គត់ផ្គង់អាវុធទំនើបៗ និងការផ្តល់ព័ត៌មានទាក់ទងនឹងទីតាំងយុទ្ធសាស្រ្តរបស់កងទ័ពរុស្ស៊ី។
លោកពូទីននិយាយថា រុស្ស៊ីត្រៀមខ្លួនចរចាជាមួយអ៊ុយក្រែន ប៉ុន្តែ លោកប្រធានាធិបតីអ៊ុយក្រែន លោកហ្សេឡេនស្គី បាននិយាយហើយថា លោកមិនចរចាជាមួយរុស្ស៊ី ដែលស្ថិតក្រោមការដឹកនាំរបស់លោកពូទីន និងថា អ៊ុយក្រែន នឹងវាយដណ្តើមយកទឹកដីទាំងអស់របស់ខ្លួនមកគ្រប់គ្រងវិញ។ នៅក្នុងផែនការសន្តិភាព ដែលលោកបានប្រកាសកាលពីខែវិច្ឆិកាឆ្នាំមុន លោកហ្សេឡេនស្គីបានបញ្ជាក់ថា គេមិនអាចចរចាពីដែនអធិបតេ្យភាពរបស់អ៊ុយក្រែន ប៉ុន្តែ ម៉ូស្គូឆ្លើយតបវិញថា រុស្ស៊ីនឹងមិនប្រគល់ទឹកដីដែលរុស្ស៊ីបានកាត់យកពីអ៊ុយក្រែនដាច់ខាត។
ការលើកឡើងពីជំហរត្រៀមខ្លួនចរចារបស់រុស្ស៊ី ធ្វើឡើងនៅប៉ុន្មានថ្ងៃក្រោយ កងទ័ពរុស្ស៊ីស្លាប់នៅក្នុងការវាយប្រហាររបស់មីស៊ីលអ៊ុយក្រែន នៅយប់ថ្ងៃបុណ្យឆ្លងឆ្នាំសកល បានកើនឡើងដល់ចំនួន ៨៩នាក់ គិតត្រឹមថ្ងៃពុធទី ៤មករា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ