ស៊ុយអែត៖នាយករដ្ឋមន្រ្តីបង្ហាញសមានចិត្តចំពោះពលរដ្ឋអ៊ីស្លាមក្រោយពីមានការដុតគម្ពីរសាសនាអ៊ីស្លាម
នៅក្នុងប្រទេសស៊ុយអែត នាយករដ្ឋមន្រ្តីលោកអ៊ុលហ្វ គ្រីស្ទ័រសុនបានបញ្ចេញប្រតិកម្មក្នុងថ្ងៃអាទិត្យ ទី២២ មករាទៅលើទង្វើដុតគម្ពីរសាសនាអ៊ីស្លាមកាលពីថ្ងៃសៅរ៍ ទី២១ មករា។ ការដុតគម្ពីរសាសានាអ៊ីស្លាមនេះបានធ្វើឡើងនៅក្នុងក្បួនបាតុកម្មមួយក្នុងទីក្រុងស្តុកខុល។ តាមលោកអ៊ុលហ្វ គ្រីស្ទ័រសុន ការដុតគម្ពីរសាសនាអ៊ីស្លាមជាទង្វើគ្មានការគោរព និងបានសម្តែងសមានចិត្តចំពោះពលរដ្ឋអ៊ីស្លាម។ ប្រតិកម្មជុំវិញការដុតគម្ពីរសាសនាអ៊ីស្លាមនេះក៏មានពីពិភពលោកអ៊ីស្លាមក្នុងលោកដែរ។
ចុះផ្សាយនៅថ្ងៃ៖
ស្តាប់ - ០២:០៣
« សេរីភាពនៃការបញ្ចេញមតិជាផ្នែកមួយដ៏សំខាន់នៃលទ្ធិប្រជាធិបតេយ្យ។ តែទង្វើស្របច្បាប់មិនមែនសុទ្ធសឹងជាទង្វើសមរម្យទេ។ សម្រាប់មនុស្សជាច្រើន ការដុតសៀវភៅដែលជាគម្ពីរវិសុទ្ធជាទង្វើដែលគ្មានការគោរព ហើយខ្ញុំចង់សម្តែងសមានចិត្តចំពោះពលរដ្ឋអ៊ីស្លាមទាំងអស់ដែលបានប្រឆាំងនឹងអ្វីដែលបានកើតមាននៅក្នុងទីក្រុងស្តុកខុលកាលពីថ្ងៃសៅរ៍ ទី២១ មករា » នេះជាសាររបស់លោកអ៊ុលហ្វ គ្រីស្ទ័រសុននៅក្នុងទំព័រធ្វីតធ័ររបស់លោក។ គួរបញ្ជាក់ថានារសៀលថ្ងៃសៅរ៍ ទី២១ មករា ប៉ូលិសស៊ុយអែតបានអនុញ្ញាតឲ្យមានការរៀបចំក្បួនបាតុកម្មមួយក្បែរស្ថានទូតតួកគីក្នុងទីក្រុងស្តុកខុល។
នាឱកាសនោះ ជនស្តាំនិយមជ្រុលស៊ុយអែតម្នាក់បានដុតគម្ពីរសាសនាអ៊ីស្លាមក្នុងគោលដៅបរិហារលើការចរចារវាងស៊ុយអែត និងតួកគីស្តីពីការសុំចូលអង្គការអូតង់របស់ស៊ុយអែត។ តែសម្រាប់តួកគី ទង្វើដុតគម្ពីរសាសនាអ៊ីស្លាមជាឧក្រិដ្ឋកម្មនៃការស្អប់ខ្ពើម និងបានលុបចោលទស្សនកិច្ចរបស់រដ្ឋមន្រ្តីស៊ុយអែតនៅតួកគីនាសប្តាហ៍ក្រោយ។ ដូច្នេះចង់ ឬមិនចង់ ការដុតគម្ពីរសាសនាអ៊ីស្លាមនៅក្បែរស្ថានទូតតួកគីក្នុងក្រុងស្តុកខុលនឹងជះផលវិបាកបន្ថែមទៀតដល់ការសុំចូលអង្គការអូតង់របស់ស៊ុយអែតដែលកំពុងរាំងខ្ទប់ដោយតួកគី។
ក្រៅពីតួកកី ទង្វើរបស់ជនជ្រុលនិយមស៊ុយអែតក៏បានរងការប្រឆាំង និងថ្កោលទោសពីបណ្តាប្រទេសអ៊ីស្លាមផ្សេងទៀត រួមមានម៉ារ៉ុក ឥណ្ឌូណេស៊ី អារ៉ាប៊ីសាអូឌីត អេមីរ៉ាតអារ៉ាប់រួម ក្រុមប្រឹក្សានៃកិច្ចសហប្រតិបត្តិការឈូងសមុទ្រពែក្ស ឬមួយអង្គការនៃកិច្ចសហប្រតិបត្តិការអ៊ីស្លាម។ ម៉ារ៉ុកបានសម្តែងការភ្ញាក់ផ្អើលដែលរដ្ឋអំណាចស៊ុយអែតបានអនុញ្ញាតឲ្យមានទង្វើមិនអាចទទួលយកបាន និងអាក្រក់កើតមាននៅពីមុខកម្លាំងប៉ូលិសស៊ុយអែត។ ចំណែកឥណ្ឌូណេស៊ីយល់ថា សេរីភាពនៃការបញ្ចេញមតិត្រូវធ្វើឡើងដោយមានការទទួលខុសត្រូវ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ