សង្គ្រាមអ៊ុយក្រែន ៖ អាល្លឺម៉ង់ព្រមបញ្ជូនរថក្រោះLeopard អាមេរិកឱ្យរថក្រោះAbrams ទៅអ៊ុយក្រែន
បន្ទាប់ពីរារែកអស់ពេញមួយសប្តាហ៍ អ្នកនាំពាក្យរដ្ឋាភិបាលអាល្លឺម៉ង់ បានប្រកាសនៅព្រឹកថ្ងៃពុធទី ២៥មករានេះ ព្រមបញ្ជូនរថក្រោះឡេអូប៉ា ទៅឱ្យអ៊ុយក្រែនហើយ។ ចំណែកសហរដ្ឋអាមេរិកក៏កំពុងជូនដំណឹងជាផ្លូវការ នៅថ្ងៃនេះដែរ ជុំវិញការផ្តល់រថក្រោះប្រមាណ៣០គ្រឿង ទៅឱ្យកៀវ។
ចុះផ្សាយនៅថ្ងៃ៖
ស្តាប់ - ០២:០៦
សម្ព័ន្ធមិត្តអ៊ុយក្រែនបានប្រើពេលយូរបន្តិចទម្រាំអារកាត់សេចក្តី ថា ព្រម។ រថក្រោះប្រយុទ្ធជាច្រើនគ្រឿងនឹងបញ្ជូនឱ្យកងកម្លាំងអ៊ុយក្រែន នាខែខាងមុខ ដើម្បីតតាំងនិងកាច់បំបាក់កម្លាំងរបស់កងកម្លាំងរុស្ស៊ី ដែលអាចកម្រើកឡើងខ្លាំងនៅពេលរដូវផ្ការីកចូលមកដល់។
ដូចមានការចុះផ្សាយក្នុងសារព័ត៌មានអាល្លឺម៉ង់ នៅថ្ងៃពុធនេះ អ្នកនាំពាក្យរដ្ឋាភិបាលអាល្លឺម៉ង់បានចេញសេចក្តីថ្លែងការណ៍ ប្រកាសជាផ្លូវការព្រមឱ្យប្រទេសផ្សេងៗ ជាពិសេសប្រទេសប៉ូឡូញ និងហ្វាំងឡង់ បញ្ជូនរថក្រោះប្រភេទឡេអូប៉ា២ ទៅឱ្យអ៊ុយក្រែន។ ជាមួយនឹងកម្មវត្ថុបង្កើតកងពលរថក្រោះចំនួនកងឱ្យឆាប់រហ័ស អាល្លឺម៉ង់ខ្លួនឯង ក៏ផ្តល់រថក្រោះឡេអូប៉ា2 A6 ចំនួន១៤គ្រឿងដ៏ទំនើបបំផុត ឱ្យក្រុងកៀវដែរ ក្នុងចំណោមរថក្រោះក្នុងឃ្លាំងសរុបប្រមាណ៣២០របស់អាល្លឺម៉ង់។ ការបំពាក់បំប៉នកងទ័ពអ៊ុយក្រែនត្រូវចាប់ផ្តើមក្នុងពេលឆាប់ៗបំផុតនៅអាល្លឺម៉ង់។ នេះបើតាមសេចក្តីថ្លែងការណ៍របស់រដ្ឋាភិបាលអាល្លឺម៉ង់ដដែល។ លោកនាយករដ្ឋមន្ត្រីអាល្លឺម៉ង់ អូឡាហ្វ ស្ហុលស៍ ដែលរងសម្ពាធពីសម្ព័ន្ធមិត្តអឺរ៉ុប និងដៃគូក្នុងរដ្ឋាភិបាលចម្រុះផ្ទាល់ បានគូសបញ្ជាក់ក្នុងសេចក្តីថ្លែងការណ៍ថា ជាសេចក្តីសម្រេចចិត្តស្របតាមជំហរនយោបាយអាល្លឺម៉ង់តាំងពីដើមមក ក្នុងការគាំទ្រអ៊ុយក្រែនយ៉ាងពេញទំហឹង។
អាល្លឺម៉ង់ឆ្លើយព្រមថ្ងៃនេះ បន្ទាប់ពីសហរដ្ឋអាមេរិក ដែលរារែកខ្លាំងដែរតាំងពីជាងមួយសប្តាហ៍មកនោះ បានបង្ហាញឆន្ទៈសាមគ្គីភាពដោយត្រូវប្រកាសជាផ្លូវការដែរថ្ងៃពុធទី ២៥មករា បញ្ជូនរថក្រោះ ប្រភេទAbrams M1 ចំនួនប្រមាណ៣០គ្រឿង ឱ្យក្រុងកៀវ។ បើតាមកាសែត Wall Street Journal ប្រធានាធិបតីអាមេរិក ចូ បៃដិន ទំនងជាបានធ្វើសេចក្តីសម្រេចចិត្ត ក្រោយពីបានជួបជជែកតាមទូរស័ព្ទជាមួយលោកនាយករដ្ឋមន្ត្រីអាល្លឺម៉ង់ អូឡាហ្វ ស្ហុលស៍ កាលពីថ្ងៃ១៧មករា។
គ្រាន់តែបានទទួលការព្រមព្រៀងពីអាល្លឺម៉ង់ ដែលជាប្រទេសអ្នកផលិតរថក្រោះឡេអូប៉ាភ្លាម ការអបអរសរសើរបានធ្លាក់មកជាបន្ទាប់ ពីអង់គ្លេស ពីបារាំង ប៉ូឡូញ ... ថាជាសេចក្តីសម្រេចចិត្តដ៏ត្រឹមត្រូវ និងជាការពង្រឹងសមត្ថភាពយោធាអ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ