អង់គ្លេស បញ្ឈប់តំណែងរដ្ឋមន្ត្រីម្នាក់ ដែលជាប្រធានគណបក្សកាន់អំណាច ព្រោះមូលហេតុគេចពន្ធ
ថ្ងៃអាទិត្យទី២៩មករា នាយករដ្ឋមន្ត្រីអង់គ្លេស បានបណ្តេញ រដ្ឋមន្ត្រីម្នាក់ ឲ្យចេញពីតំណែង។ រដ្ឋមន្ត្រីរូបនេះ គឺជា ប្រធានគណបក្សអភិរក្សនិយម ផង។ ការបញ្ឈប់តួនាទីរបស់បុគ្គលសំខាន់នៅក្នុងគណបក្សកាន់អំណាច ក៏ព្រោះតែជាប់ពាក់ព័ន្ធនឹងបញ្ហាលួចគេចពន្ធ។
ចុះផ្សាយនៅថ្ងៃ៖
ស្តាប់ - ០២:២៤
ជំនួសឲ្យការស្នើលាចុះពីតំណែងដោយខ្លួនឯង នាយករដ្ឋមន្ត្រី រីស៊ី ស៊ូណាក់ (Rishi Sunak) បានសម្រេចចិត្តបណ្តេញចេញ ពីសមាជិករាជរដ្ឋាភិបាលតែម្តង ចំពោះលោករដ្ឋមន្ត្រី ណាដហីម ហ្សាហាវី ( Nadhim Zahawi) ដែលជា ប្រធានគណបក្សអភិរក្សនិយម ផង។
បន្ទាប់ពីសាកល្បងការពាររដ្ឋមន្ត្រីរបស់ខ្លួនមួយរយៈមក នៅទីបំផុតទៅ នាយករដ្ឋមន្ត្រី បានស្នើឲ្យទីប្រឹក្សាទទួលបន្ទុកខាងត្រួតពិនិត្យផ្នែកក្រមសីលធម៌របស់មន្ត្រី បើកការស៊ើបអង្កេត និងដែលរកឃើញថា រដ្ឋមន្ត្រី ណាដហីម ហ្សាហាវី គ្មានតម្លាភាពក្នុងការបង់ពន្ធជូនរដ្ឋ ហើយនិងធ្លាប់បានបង់លុយពន្ធតិចជាងច្បាប់តម្រូវ ព្រមទាំងធ្វេសប្រហែសមិនបំពេញកាតព្វកិច្ចពន្ធ។ រដ្ឋមន្ត្រីរូបនេះ ក៏មានក្រុមហ៊ុនវិនិយោគ ចុះបញ្ជីនៅបរទេស និងដែលរកស៊ីជាមួយក្រុមគ្រួសារ។ នៅជំនាន់ គ្រាដែលធ្វើជារដ្ឋមន្ត្រីក្រសួងហិរញ្ញវត្ថុ ក្នុងអាណត្តិអតីតនាយករដ្ឋមន្ត្រី បូរីស ចនសុន គឺលោកបានដោះស្រាយ សម្របសម្រួលស្ងាត់ៗ ជាមួយមន្ត្រីប៉ូលីសខាងពន្ធទៀតផង។ តាមព័ត៌មានក្នុងស្រុកអង់គ្លេស រដ្ឋមន្ត្រីរូបនេះ បានគេចពន្ធ យ៉ាងហោច ៦ លានដុល្លារដែរ។
ចំណុចគ្មានតម្លាភាពទាំងនេះហើយ ដែល នាយករដ្ឋមន្ត្រី រីស៊ី ស៊ូណាក់ យល់ថាជា«កំហុសធ្ងន់ធ្ងរ»។ ធ្ងន់ធ្ងរព្រោះថា «គ្មានសេចក្តីថ្លៃថ្នូរ គ្មានវិជ្ជាជីវៈ និងគ្មានការទទួលខុសត្រូវ» ហើយនិងផ្ទុយប្រាសចាកពីក្រមសីលធម៌ដែលលោកធ្លាប់បានស្បថនៅពេលចូលដាច់ចង្កូតដឹកនាំប្រទេស។ នេះបើផ្អែកតាមសំបុត្រមួយច្បាប់របស់ រីស៊ី ស៊ូណាក់ ផ្ញើផ្ទាល់ទៅកាន់ លោក ណាដហីម ហ្សាហាវី។
លោក ណាដហីម ហ្សាហាវី មានកំណើតជាជនជាតិគួជ កើតអ៊ីរ៉ាក់ ហើយគេចពីមាតុប្រទេសកាន់របបផ្តាច់ការ មកកសាងជីវិតនៅអង់គ្លេស តាំងពីក្មេងវ័យប្រមាណអាយុ១១ឆ្នាំ សូម្បីភាសាអង់គ្លេស ក៏មិនចេះនិយាយផង។ លោកបានកែប្រែជីវិត ក្លាយជាអ្នករកស៊ីមានលុយកាក់ច្រើន មុននឹងប្រលូកជីវិតអ្នកនយោបាយ។
នៅក្នុងគេហទំព័ររដ្ឋាភិបាលអង់គ្លេស លោក រីស៊ី ស៊ូណាក់ ក៏បានលើករំឭកពីគុណបំណាច់របស់ លោក ណាដហីម ហ្សាហាវី ដែលបានរួមចំណែកដឹកនាំប្រទេស៥ឆ្នាំកន្លងទៅ និងជួយទប់ស្ងាត់ជំងឺឆ្លងកូវីដ ក្នុងប្រទេសអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ