អូតង់ព្រួយបារម្ភ និងទាមទារឲ្យរុស្ស៊ី ត្រលប់មកគោរពសន្ធិសញ្ញាកាត់បន្ថយអាវុធនុយក្លេអ៊ែរ
បីថ្ងៃក្រោយអាមេរិក និងរុស្ស៊ីនិយាយច្រានទម្លាក់កំហុសដាក់គ្នាទៅវិញ ទៅមក ក្នុងរឿងមិនគោរពសន្ធិសញ្ញាកាត់បន្ថយអាវុធនុយក្លេអ៊ែរ អង្គការអាត្លង់ទិក អូតង់បានចេញមុខ កាន់ជើងអាមេរិក ដោយទាមទារឲ្យរុស្ស៊ីត្រលប់មកគោរពសន្ធិសញ្ញា ដែលមានគោលដៅ កាត់បន្ថយអាវុធនុយក្លេអ៊ែររបស់មហាអំណាចទាំងពីរ រុស្ស៊ី អាមេរិក។ កាលពីថ្ងៃសុក្រទី ៣ កុម្ភៈ អង្គការអូតង់ ដែលនាំមុខដោយសហរដ្ឋអាមេរិក បានសំដែងក្តីបារម្ភដែលសង្កេតឃើញថា រុស្ស៊ីមិនបានគោរពកាតព្វកិច្ចដែលមានចែង នៅក្នុងសន្ធិសញ្ញា ដែលគេហៅជាភាសាអង់គ្លេសថា « New START »។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣៧
នៅក្នុងសេចក្តីថ្លែងការណ៍ កាលពីថ្ងៃសុក្រ អង្គការសម្ព័ន្ធអាត្លង់ទិក អូតង់ទទួលស្គាល់ថា សន្ធិសញ្ញាកាត់បន្ថយអាវុធនុយក្លេអ៊ែរចូលរួមសំខាន់ នៅក្នុងស្ថិរភាពពិភពលោក តាមរយៈការកំណត់អាវុធនុយក្លេអ៊ែរយុទ្ធសាស្រ្តរបស់មហាអំណាច អាមេរិក និងរុស្ស៊ី។ ប៉ុន្តែ ដូចអាមេរិក អូតង់ដែលសង្កេតឃើញ រុស្ស៊ី ខកខានមិនបានគោរពកាតព្វកិច្ចផ្លូវច្បាប់ ដែលមានចែងនៅក្នុងសន្ធិសញ្ញា បានអំពាវនាវឲ្យរុស្ស៊ីត្រលប់មកគោរពសន្ធិសញ្ញាNew Start ឡើងវិញ។
នៅថ្ងៃពុធ ក្រសួងការបរទេសអាមេរិកបានទម្លាក់កំហុសលើរុស្ស៊ី ដែលបានប្រកាសផ្អាកការចូលទៅត្រួតពិនិត្យសព្វាវុធនុយក្លេអ៊ែរ នៅទឹកដីរុស្ស៊ី ដែលជាប្រតិបត្តិការត្រួតពិនិត្យគ្នាទៅវិញ ទៅមក ដូចមានចែងក្នុងសន្ធិសញ្ញា កាត់បន្ថយអាវុធនុយក្លេអ៊ែរ « New START »។ លើសពីនោះ រុស្ស៊ីបានលើកពេល ដោយគ្មានកំណត់ កិច្ចប្រជុំគណៈកម្មការទេ្វភាគី ដែលផ្តោតសំខាន់លើសន្ធិសញ្ញា និងដែលត្រូវប្រព្រឹត្តទៅ នៅខែវិច្ឆិកាឆ្នាំមុន នៅប្រទេសអេហ្ស៊ីប។
ទោះស្តីបន្ទោសរុស្ស៊ី ដែលបានផ្អាក ហាមមិនឲ្យអ្នកជំនាញអាមេរិកចូលត្រួតពិនិត្យសព្វាវុធនុយក្លេអ៊ែរ និងផ្អាកកិច្ចប្រជុំទ្វេភាគី ប៉ុន្តែអាមេរិកមិនបានចោទប្រកាន់រុស្ស៊ី ថា ពង្រាយក្បាលគ្រាប់នុយក្លេអ៊ែរបន្ថែម លើសចំនួនដែលមានកំណត់ក្នុងសន្ធិសញ្ញានោះទេ។
នៅថ្ងៃពុធ ម៉ូស្គូតាមរយៈអ្នកនាំពាក្យរបស់ប្រធានាធិបតីរុស្ស៊ី លោក ឌីមីទ្រី ប៉េស្កូវ បានចោទប្រកាន់ អាមេរិកថា ជាអ្នកបំផ្លាញ ក្របខ័ណ្ឌផ្លូវច្បាប់ ដើម្បីត្រួតពិនិត្យអាវុធនុយក្លេអ៊ែររបស់ប្រទេសទាំងពីរ។ ប៉ុន្តែ ម៉ូស្គូនៅតែគិតថា សន្ធិសញ្ញាកាត់បន្ថយអាវុធនុយក្លេអ៊ែរសំខាន់។
ក្នុងបរិបទនៃសង្គ្រាមអ៊ុយក្រែន និងទណ្ឌកម្មពីសំណាក់លោកខាងលិច រុស្ស៊ីបានប្រកាស កាលពីខែសីហាឆ្នាំមុន ផ្អាកមិនឲ្យអាមេរិកចូលទៅត្រួតពិនិត្យសព្វាវុធនុយក្លេអ៊ែរក្នុងទឹកដីរុស្ស៊ី ដែលជាប្រតិបត្តិការត្រួតពិនិត្យធម្មតា តាមការចែងរបស់សន្ធិសញ្ញា។ តាមឯកអគ្គរដ្ឋទូតរុស្ស៊ីប្រចាំទីក្រុងវ៉ាស៊ីនតោន រុស្ស៊ីធ្លាប់រំលឹកប្រាប់អាមេរិករួចហើយថា ការត្រួតពិនិត្យសព្វាវុធនុយក្លេអ៊ែរ មិនអាចកាត់ផ្តាច់ចេញពីតថភាពជាក់ស្តែងនៃភូមិសាស្រ្តនយោបាយបានឡើយ។ ដោយមើលទៅលើកាលៈទេសៈបច្ចុប្បន្ន រុស្ស៊ីយល់ថា វាមិនសមរម្យ និងមិនគប្បីទាល់តែសោះ ដែលត្រូវអនុញ្ញាតឲ្យទាហានអាមេរិក ចូលមើលទីតាំងយុទ្ធសាស្រ្តនុយក្លេអ៊ែររបស់រុស្ស៊ី។
នៅក្រោយចុះហត្ថលេខា និងផ្តល់សច្ចាប័នដោយភាគីអាមេរិក និងរុស្ស៊ី នៅឆ្នាំ ២០១០សន្ធិសញ្ញាស្តីពីការកាត់បន្ថយអាវុធនុយក្លេអ៊ែរ New START ចូលជាធរមាន នៅឆ្នាំ២០១១ សម្រាប់រយៈពេល ១០ឆ្នាំ និងត្រូវផុតនៅឆ្នាំ២០២១ ក៏ប៉ុន្តែ ត្រូវបានពន្យារសុពលភាព រហូតដល់ឆ្នាំ២០២៦។ សន្ធិសញ្ញា New START មានចែងពីការដាក់កម្រិតឲ្យភាគីរុស្ស៊ី និងអាមេរិក អាចដាក់ពង្រាយក្បាលគ្រាប់នុយក្លេអ៊ែររយៈចម្ងាយឆ្ងាយ បានយ៉ាងច្រើនបំផុត ត្រឹម ១ ៥៥០គ្រាប់ប៉ុណ្ណោះ សម្រាប់ប្រទេសនីមួយៗ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ