សង្រ្គាមពាក្យសំដីរវាងអាមេរិកនិងរុស្ស៊ី នៅក្នុងរឿងប្រើអាវុធនុយក្លេអ៊ែរ
ប្រធានាធិបតីរុស្ស៊ី លោកពូទីន បានព្រមានពីការគំរាមកំហែងអាវុធនុយក្លេអ៊ែរដែលកាន់តែរីកធំឡើង ប៉ុន្តែ បញ្ជាក់ថា រុស្ស៊ីនឹងមិនមែនជាអ្នកចាប់ផ្តើមប្រើអាវុធនុយក្លេអ៊ែរមុនគេដាច់ខាត។ ប្រសាសន៍របស់ប្រមុខរដ្ឋរុស្ស៊ី នៅក្នុងកិច្ចប្រជុំក្រុមប្រឹក្សាសិទ្ធិមនុស្សរុស្ស៊ី កាលពីថ្ងៃពុធបានទាក់ទាញប្រតិកម្មបរិហារិះគន់ភ្លាមៗពីវ៉ាស៊ីនតោន។ នៅក្នុងសន្និសីទកាសែតកាលពីថ្ងៃពុធទី ៧ធ្នូ ២០២២ អ្នកនាំពាក្យក្រសួងការបរទេសអាមេរិក ចាត់ទុកការលើកឡើងរបស់លោកពូទីនថា គ្មានការទទួលខុសត្រូវ។
ចុះផ្សាយនៅថ្ងៃ៖
ស្តាប់ - ០២:០៧
លទ្ធភាពផ្ទុះសង្រ្គាមនុយក្លេអ៊ែរ ត្រូវបានគេលើកមកនិយាយកាន់តែច្រើន នៅរុស្ស៊ីធ្វើសង្រ្គាមឈ្លានពានអ៊ុយក្រែន និងការគំរាមតិចឬច្រើនរបស់មហាអំណាចនុយក្លេអ៊ែររុស្ស៊ី។ កាលពីខែ កញ្ញា កន្លងទៅ លោកប្រធានាធិបតីពូទីន ផ្ទាល់ធ្លាប់បានពន្លយ ពីការប្រើអាវុធនុយក្លេអ៊ែរតាក់ទិក ក្នុងសង្រ្គាមអ៊ុយក្រែន។
នៅក្នុងកិច្ចប្រជុំនៅទីក្រុងម៉ូស្គូ កាលពីថ្ងៃពុធ មេដឹកនាំរុស្ស៊ីបានបញ្ជាក់ថា ការគំរាមកំហែងនៃសង្រ្គាមនុយក្លេអ៊ែរកាន់តែរីកធំឡើងៗ ប៉ុន្តែ រុស្ស៊ីនឹងមិនប្រើអាវុធនុយក្លេអ៊ែរមុនគេនោះទេ។ រុស្ស៊ីនឹងប្រើអាវុធនុយក្លេអ៊ែរតែក្នុងករណីដែលមានការវាយប្រហារមកលើខ្លួនតែប៉ុណ្ណោះ។
សម្រាប់លោកពូទីន បើទោះបី មិនមែនជាអ្នកចាប់ផ្តើមប្រើអាវុធនុយក្លេអ៊ែរមុនគេ ប៉ុន្តែ រុស្ស៊ី ក៏មិនមែនជាប្រទេសទី២ដែលប្រើនុយក្លេអ៊ែរនោះដែរ ព្រោះថា ក្នុងកាលៈទេសៈសព្វថ្ងៃ លទ្ធភាពវាយប្រហារនុយក្លេអ៊ែរមកលើរុស្ស៊ី មានតិចតួចណាស់។
សម្រាប់Ned Price អ្នកនាំពាក្យរបស់ក្រសួងការបរទេសអាមេរិក ដោយយកការគំរាមកំហែងនុយក្លេអ៊ែរមកនិយាយលេងសើច មើលស្រាល ការលើកឡើងរបស់ប្រមុខដឹកនាំរុស្ស៊ី គឺគ្មានការទទួលខុសត្រូវ។ សម្រាប់អ្នកនាំពាក្យអាមេរិក ចាប់តាំងពីសង្រ្គាមត្រជាក់ មហាអំណាចនុយក្លេអ៊ែរក្នុងពិភពលោក ដូចជាចិន ឥណ្ឌា អាមេរិក និងរុស្ស៊ីបានដឹងច្បាស់ថា សង្រ្គាមនុយក្លេអ៊ែរមិនត្រូវកើតឡើងដាច់ខាត។
សង្រ្គាមរុស្ស៊ីឈ្លានពានអ៊ុយក្រែនបានបង្កឲ្យមានការភ័យព្រួយបារម្ភថា នឹងអាចបណ្តាលឲ្យកើតមានសង្រ្គាមនុយក្លេអ៊ែរ។ មន្រ្តីយោធាអាមេរិកធ្លាប់ខ្លាចថា រុស្ស៊ីនឹងប្រើអាវុធនុយក្លេអ៊ែរក្នុងករណីចាញ់សង្រ្គាមនៅអ៊ុយក្រែន។
ប៉ុន្តែ តាមនាយករដ្ឋមន្រ្តីអាល្លឺម៉ង់ ការគំរាមកំហែងប្រើអាវុធនុយក្លេអ៊ែររបស់រុស្ស៊ីបានចុះថយមកវិញ ដោយត្រូវអរគុណការដាក់សម្ពាធរបស់សហគមន៍អន្តរជាតិ ជាពិសេសប្រទេសចិន។ នៅក្នុងបទសម្ភាសន៍ ជាមួយកាសែតអាល្លឺម៉ង់ ចុះផ្សាយនៅថ្ងៃព្រហស្បតិ៍នេះ ប្រមុខរដ្ឋាភិបាលអាល្លឺម៉ង់បានបញ្ជាក់ថា រុស្សី ឈប់គំរាមកំហែងប្រើអាវុធនុយក្លេអ៊ែរ ព្រោះ រុស្ស៊ីបានដឹងពីខ្សែបន្ទាត់ក្រហម របស់សហគមន៍អន្តរជាតិ។ នាយករដ្ឋមន្រ្តីអាល្លឺម៉ង់មិនបានបញ្ជាក់ថា តើខ្សែក្រហមនោះគឺអ្វីទេ ប៉ុន្តែគ្រាន់តែថា អាទិភាពសព្វថ្ងៃនេះ គឺរុស្ស៊ី ត្រូវបញ្ចប់សង្រ្គាម និងដកទ័ពចេញពីអ៊ុយក្រែន។
នៅក្នុងកិច្ចប្រជុំជាមួយក្រុមប្រឹក្សាសិទ្ធិមនុស្សរុស្ស៊ី លោកពូទីនបានចោទប្រកាន់អាមេរិកថា មានជំហរពីរុស្ស៊ី នៅពេលដាក់ពង្រាយអាវុធនុយក្លេអ៊ែរនៅក្រៅទឹកដីអាមេរិក ដូចជានៅទឹកដីអឺរ៉ុប នៅតួកគី។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ