ប្រធានាធិបតីអាមេរិក ទៅបំពេញទស្សនកិច្ចដោយឥតព្រៀងទុក នៅក្រុងកៀវ
លោក ចូ បៃដិន ប្រធានាធិបតីអាមេរិកបានអញ្ជើញទៅដល់ទីក្រុងកៀវ នៅព្រឹកថ្ងៃចន្ទទី ២០កុម្ភៈ២០២៣ ជាលើកទីមួយ គិតចាប់ពីផ្ទុះជម្លោះយោធារុស្ស៊ីចូលឈ្លានពានអ៊ុយក្រែនថ្ងៃទី ២៤កុម្ភៈ២០២២មក។ ពីទីក្រុងកៀវ និងបន្ថែមពីលើឆន្ទៈគាំទ្រដោយឥតងាករេរបស់អាមេរិក លោក ចូ បៃដិន ប្រកាសបញ្ជូនអាវុធជំនួយថ្មីទៀតទៅឱ្យអ៊ុយក្រែន ។
ចុះផ្សាយនៅថ្ងៃ៖
ស្តាប់ - ០២:១០
លោក ចូ បៃដិន កំពុងស្ថិតនៅក្នុងទីក្រុងកៀវ ! ជាទស្សនកិច្ចដ៏គួរឱ្យភ្ញាក់ផ្អើល ! ព្រោះជាផ្លូវការ នៅថ្ងៃចន្ទទី ២០កុម្ភៈនេះ លោកប្រធានាធិបតីអាមេរិក ត្រូវអញ្ជើញទៅក្រុងវ៉ាសូវី ប្រទេសប៉ូឡូញទេ ប៉ុន្តែលោកបានឆៀងចូលជួប ហ្សេឡេនស្គី ប្រធានាធិបតីអ៊ុយក្រែន ដល់ផ្ទះតែម្តង។ ទស្សនកិច្ចនេះ មានតម្លៃជានិម្មិតរូបបញ្ជាក់អំពីការគាំទ្រដ៏សំខាន់របស់អាមេរិកចំពោះអ៊ុយក្រែន។ នេះជាប្រសាសន៍របស់លោកហ្សេឡេនស្គី ដែលទទួលស្វាគមន៍ភ្ញៀវយ៉ាងរីករាយ។
អញ្ជើញទៅដល់ក្រុងកៀវតែបួនថ្ងៃមុនខួបមួយឆ្នាំនៃប្រតិបត្តិការយោធារុស្ស៊ីចូលឈ្លានពានអ៊ុយក្រែន និងមួយថ្ងៃមុនលោកប្រធានាធិបតីរុស្ស៊ីពូទីនថ្លែងសុន្ទរកថាចង្អុលកម្មវត្ថុសង្គ្រាមឆ្នាំទីពីរ លោកប្រធានាធិបតីអាមេរិកចូបៃដិន បានប្រកាសបញ្ជូនសព្វាវុធបន្ថែមទៅឱ្យអ៊ុយក្រែន។ ជំនួយបន្ថែមមានទំហំ៥០០លានដុលលារ និងមានជាអាទិ៍ គ្រាប់រំសេវសម្រាប់កាំភ្លើងធំ ប្រព័ន្ធពាសដែក ប្រព័ន្ធរ៉ាដាការពារដែនអាកាសដើម្បីរក្សាសុវត្ថិភាពជូនប្រជាពលរដ្ឋអ៊ុយក្រែន ពីគ្រាប់ផ្លោងតាមអាកាសរបស់រុស្ស៊ី។ នេះបើតាមការលម្អិតរបស់លោក បៃដិន ដោយបញ្ជាក់ថា អាមេរិកនៅក្បែរអ៊ុយក្រែនជានិច្ចនិងរហូត។
ទស្សនកិច្ចរបស់លោកចូ បៃដិន ដែលប្រព្រឹត្តទៅក្រោយការការពារសុវត្ថិភាពខ្ពស់បំផុត មិនបានប្រកាសឱ្យដឹងជាមុនទេ។ តែបើតាមអ្នកសារព័ត៌មាននៅផ្ទាល់នឹងកន្លែង ក្នុងអំឡុងពេលដែលប្រមុខរដ្ឋទាំងពីរចេញពីវិហារកាតូលិក ស្នូរស៊ីរ៉ែនអាសន្នខ្ពស់បំផុតមានគ្រាប់មីស៊ីលបានលាន់ឮឡើងពេញទីក្រុងកៀវ។ តែគ្មានសញ្ញាបាញ់មីស៊ីលឬការវាយប្រហារដោយដ្រូន លេចឡើងនៅកន្លែងណាមួយទេ ក្នុងពេលភ្លាមៗនេះ។
បន្ទាប់ពីកៀវ លោកប្រធានាធិបតីអាមេរិក ត្រូវបន្តដំណើរដូចមានចែងក្នុងកម្មវិធីផ្លូវការ ទៅកាន់ប្រទេសប៉ូឡូញ ដែលមានភារៈស្នូលក្នុងការចាត់ចែងជំនួយបស្ចិមលោកទៅឱ្យកៀវ។ លោកបៃដិន ត្រូវមានជំនួបជាមួយសមភាគីប៉ូឡូញនៅថ្ងៃអង្គារស្អែក បន្តដោយជំនួបជាមួយប្រមុខដឹកនាំប្រទេសនៅអឺរ៉ុបខាងកើតចំនួន ៩ប្រទេសផ្សេងទៀត ដែលដូចប៉ូឡូញ ជាសមរភូមិជួរមុខរបស់អូតង់ នោះគឺ លេតូនី លីទុយអានី ប៊ុលហ្ការី ហុងគ្រី សាធារណរដ្ឋឆែក រូម៉ានី និងស្លូវ៉ាគី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ