អង្គការបរិស្ថានរិះគន់ បារាំង ថាឋិតក្រោមឥទ្ធិពលរុស្ស៊ីក្នុងសំណុំបញ្ហាថាមពលបរមាណូ
ថ្ងៃសៅរ៍ អង្គការបរិស្ថាន Greenpeace ចេញរបាយការណ៍ ថ្កោលទោសរដ្ឋាភិបាលបារាំង ថា ឋិតក្រោមឥទ្ធិពលរុស្ស៊ីក្នុងសំណុំបញ្ហាថាមពលបរមាណូស៊ីវិល។ នេះក៏ព្រោះតែចង្វាក់ផលិតកម្មនិងដឹកជញ្ជូនសារធាតុអ៊ុយរ៉ានីញ៉ូម ដល់ទៅជាង៤០% ត្រូវឆ្លងកាត់កំពង់ផែរុស្ស៊ី។ ការចេញរបាយការណ៍អង្គការ Greenpeace នេះ គឺនៅមុនពេលតែ២ថ្ងៃប៉ុណ្ណោះ ដែលរដ្ឋសភាបារាំង ត្រូវបើកកិច្ចពិភាក្សាតស៊ូមតិ ជុំវិញសំណើច្បាប់ថ្មី ស្តីពីការបង្កើតនិងបង្កើនថាមពលនុយក្លេអ៊ែរ។
ចុះផ្សាយនៅថ្ងៃ៖
ស្តាប់ - ០១:៥១
«វិស័យថាមពលបរមាណូរបស់បារាំង គឺនៅពឹងពាក់ឥទ្ធិពលរុស្ស៊ី ពីព្រោះក្រុមហ៊ុនរុស្ស៊ីបានគ្រប់គ្រង់ដល់ទៅប្រមាណ ៤៣% នៃសារធាតុអ៊ុយរ៉ានីញ៉ូម សម្រាប់ដឹកចូលប្រទេសបារាំង។» នេះបើតាមរបាយការណ៍របស់អង្គការការពារបរិស្ថានអាកាសធាតុ Greenpeace និងដែលបញ្ជាក់ទៀតថា «សារធាតុអ៊ុយរ៉ានីញ៉ូម នាំចូលស្រុកបារាំង ជាង១ភាគ៣ គឺមកពីប្រទេស Kazakhstan និង Ouzbékistan ដែលត្រូវឆ្លងកាត់តាមកំពង់ផែរុស្ស៊ី Saint-Pétersbourg និងដឹកជញ្ជូនដោយក្រុមហ៊ុន Rosatom របស់រុស្ស៊ី។ អង្គការ Greenpeace បានរិះគន់ទៀតថា អាស្រ័យដោយហេតុដូច្នេះហើយ ទើបអាជ្ញាធរបារាំង ហាក់ដូចជាមានជំហរមិនច្បាស់លាស់ចំពោះការដាក់ទណ្ឌកម្មទៅលើក្រុមហ៊ុន Rosatom របស់រុស្ស៊ី។
តាមរបាយការណ៍ដដែល នៅឆ្នាំ២០២២ បារាំងបាននាំចូលសារធាតុអ៊ុយរ៉ានីញ៉ុមចម្រាញ់រួច ពីរុស្ស៊ី ក្នុងបរិមាណ១ភាគ៣នៃការប្រើប្រាស់ក្នុងមជ្ឈមណ្ឌលផលិតថាមពលរបស់បារាំង។
អង្គការ Greenpeace យល់ឃើញថា ការបន្តរកស៊ីវិស័យខាងថាមពលក្រុមហ៊ុនរុស្ស៊ីនិងចំណាត់ការផ្នែកសារធាតុអ៊ុយរ៉ានីញ៉ុមរបស់បារាំង ដែលឋិតក្រោមឥទ្ធិពលរបស់រុស្ស៊ីនេះ គឺនាំឲ្យល្អក់កកដល់ការដាក់ទណ្ឌកម្មជាលក្ខខណ្ឌអន្តរជាតិ និងថា នេះជារឿងអាស្រូវមួយផង ដែលវាផ្ទុយពីការដាក់ទណ្ឌកម្មតែលើវិស័យប្រេងនិងឧស្ម័នរុស្ស៊ី ហើយបែរជាមិនដាក់ពិន័យខាងអ៊ុយរ៉ានីញ៉ុម ផង។
នៅប្រទេសបារាំង ក្រុមហ៊ុន Orano ទទួលសិទ្ធិចម្រាញ់សារធាតុអ៊ុយរ៉ានីញ៉ុម សម្រាប់មជ្ឈមណ្ឌលថាមពលបរមាណូបារាំង។ ក៏ប៉ុន្តែ ថ្ងៃសៅរ៍ទី១១មីនា ទីភ្នាក់ងារព័ត៌មានបារាំង អាអែហ្វប៉េ ទាក់ទងសុំការបំភ្លឺពី Orano មិនបាន ហើយចំណែក អាជ្ញាធរថាមពលអគ្គិសនីបារាំង EDF ព្រមទាំងក្រសួងបរិស្ថាន ក៏គ្មានប្រតិកម្មដែរ ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ