បន្ទាប់ពីបានចរចាអស់រយៈពេល ២១ខែ ប្រទេសអង់គ្លេសចូលរួមជាមួយដៃគូដោះដូរសេរីភាពអន្តរប៉ាស៊ីហ្វិក
នៅថ្ងៃសុក្រ ទី៣១ មីនា ប្រទេសអង់គ្លេសបានប្រកាសឲ្យដឹងពីការសម្រេចបានកិច្ចព្រមព្រៀងមួយដើម្បីចូលរួមជាមួយដៃគូដោះដូរសេរីអន្តរប៉ាស៊ីហ្វិក ឬហៅកាត់ CPTPP។ ទំរាំទទួលបានកិច្ចព្រមព្រៀងមួយនេះ រដ្ឋាភិបាលក្រុងឡុងដ៏បានប្រើពេលចរចាជាមួយប្រទេសដៃគូសមាជិក CPTPP រយៈពេលជិត ២ឆ្នាំ។ នេះពិតជាដំណឹងល្អសម្រាប់អង់គ្លេស ព្រោះតាំងពីបានចាកចេញពីគ្រួសារសហភាពអឺរ៉ុប និងពីទីផ្សាររួមសហភាពអឺរ៉ុបមក ក្រុងឡុងដ៏បានព្យាយាមស្វែងរកកិច្ចព្រមព្រៀងពាណិជ្ជកម្មជាមួយអ្នកផ្សេង។
ចុះផ្សាយនៅថ្ងៃ៖
ស្តាប់ - ០២:៣៩
បូកបន្ថែមប្រទេសអង់គ្លេសមួយទៀត ដៃគូដោះដូរសេរីអន្តរប៉ាស៊ីហ្វិក CPTPPនឹងមានសមាជិកសរុបចំនួន ១២ប្រទេស។ តែអង់គ្លេសជាប្រទេសអឺរ៉ុបទី១ ដែលបានចូលរួមជាមួយ CPTPP។ បូកបន្ថែមប្រទេសអង់គ្លេសមួយទៀត CPTPP នឹងមានចំនួនប្រជាជនសរុបប្រមាណ ៥០០លាននាក់ និងមានផលិតផលសរុប ១៥% នៃផលិតផលសរុបក្នុងលោក។ ក្នុងនាមជាសមាជិក CPTPP ការនាំចេញសេវា និងទំនិញអង់គ្លេសជាង ៩៩% ទៅកាន់ប្រទេសសមាជិក CPTPP ទទួលបានការលើកលែងពន្ធ។ យោងតាមការប៉ាន់ប្រមាណក្នុងរយៈពេលខ្លី អង់គ្លេសនឹងទទួលបានផលសេដ្ឋកិច្ចពី CPTPP គិតជាទឹកប្រាក់ចំនួន ២ ៤៥០លានអឺរ៉ូ។
នាយករដ្ឋមន្រ្តីអង់គ្លេសលោករីស៊ី ស៊ូណាក់បានសាទរ និងបញ្ជាក់ថា ការចូលរួមរបស់អង់គ្លេសជាមួយ CPTPP ជាការបញ្ចូលអង់គ្លេសទៅក្នុងក្រុមសេដ្ឋកិច្ចប៉ាស៊ីហ្វិកដ៏មានសក្តានុពល និងកំពុងមានកំណើនសេដ្ឋកិច្ច។ ការសាទរក៏មានពីរដ្ឋមន្រ្តីពាណិជ្ជកម្មអង់គ្លេសលោកស្រីឃេមី បាដឺណុកដែលប្រមើលមើលថា ការចូលរួមជាមួយ CPTPP នឹងចូលរួមបង្កើតការងារនៅអង់គ្លេស និងធ្វើអង់គ្លេសទទួលបានទីផ្សារកាន់តែទូលំទូលាយនៅតំបន់ឥណ្ឌូប៉ាស៊ីហ្វិក។ តាមលោកស្រី បាដឺណុក កំណើនសេដ្ឋកិច្ចមួយភាគធំត្រូវបានគេរង់ចាំពីតំបន់ឥណ្ឌូប៉ាស៊ីហ្វិក។
នៅអង់គ្លេសដែរ សហជីពកសិកម្មដ៏សំខាន់ជាងគេក៏បានសាទរដោយចាត់ទុកការចូលរួមជាមួយ CPTPP របស់អង់គ្លេសថាជាឱកាសថ្មីសម្រាប់វិស័យនាំចេញរបស់អង់គ្លេស។ តែក៏បានសម្តែងក្តីបារម្ភពីកំណើននាំទំនិញពីប្រទេសសមាជិក CPTPP ផ្សេងចូលប្រទេសអង់គ្លេសដែរ។ គេយ៉ាងណាក៏ដោយគេអាចនិយាយបានជារួមថា ដំណឹងទទួលបានការចូលរួមជាមួយ CPTPP របស់អង់គ្លេសជាដំណឹងល្អ ព្រោះតាំងពីក្រោយចាកចេញពីគ្រួសារសហភាពអឺរ៉ុប និងពីទីផ្សាររួមសហភាពអឺរ៉ុបក្នុងថ្ងៃទី១ មករា ២០២១ មក អង់គ្លេសបានព្យាយាមស្វែងរកដៃគូពាណិជ្ជកម្មជាមួយអ្នកផ្សេង។
ក្រៅពីជាមួយសហភាពអឺរ៉ុប និងប្រទេសអឺរ៉ុបមួយចំនួន អង់គ្លេសបានចុះកិច្ចព្រមព្រៀងពាណិជ្ជកម្មជាមួយអូស្រា្តលី នូវែលហ្សេឡង់ ឬសិង្ហបុរី ហើយសព្វថ្ងៃកំពុងបន្តចរចាជាមួយឥណ្ឌា ឬប្រទេសកាណាដា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ