អាមេរិក-អង់គ្លេស៖លោកបៃដិនបំពេញទស្សនកិច្ចនៅតំបន់អៀរឡង់ខាងជើងដែលកំពុងជាប់គាំងនយោបាយ
នៅថ្ងៃពុធ ទី១២ មេសានេះ ប្រធានាធិបតីអាមេរិកលោកចូ បៃដិនផ្តើមទស្សនកិច្ចនៅតំបន់អៀរឡង់ខាងជើងក្នុងប្រទេសអង់គ្លេស និងប្រទេសអៀរឡង់ដែលជាសមាជិករបស់សហភាពអឺរ៉ុប។ អ្វីជាការកត់សម្គាល់ ទស្សនកិច្ចរបស់លោកបៃដិននៅប្រទេសអៀរឡង់មានលក្ខណៈផ្លូវការជាងនៅតំបន់អៀរឡង់ខាងជើង។ កម្មវត្ថុរបស់លោកបៃដិននៅតំបន់អៀរឡង់ខាងជើង គឺដើម្បីសាទរកិច្ចព្រមព្រៀងសន្តិភាពចុះហត្ថលេខាកាលពី ២៥ឆ្នាំមុន និងលើកទឹកចិត្តឲ្យមានកិច្ចសន្ទនារវាងភាគីជម្លោះផ្ទៃក្នុង។
ចុះផ្សាយនៅថ្ងៃ៖
ស្តាប់ - ០២:១៥
ទីក្រុងប៊ែលហ្វាស់របស់តំបន់អៀរឡង់ខាងជើងជាជំហានទី១ នៃដំណើរទស្សនកិច្ចរបស់ប្រធានាធិបតីអាមេរិកលោកបៃដិនក្នុងប្រទេសអង់គ្លេស។ វត្តមានរបស់លោកបៃដិននៅតំបន់អៀរឡង់ខាងជើងធ្វើឡើង ចំខួប ២៥ឆ្នាំនៃកិច្ចព្រមព្រៀងសន្តិភាពរវាងក្រុមអ្នកបង្រួបបង្រួមនិយមអៀរឡង់ខាងជើងដែលកាន់សាសនានិកាយប្រូតេស្តង់ និងក្រុមអ្នកសាធារណរដ្ឋអៀរឡង់ខាងជើងដែលភាគច្រើនជាអ្នកកាន់សាសនាកាតូលិក។ កិច្ចព្រមព្រៀងសន្តិភាពចុះហត្ថលេខាកាលពីថ្ងៃទី១០ មេសា ឆ្នាំ ១៩៩៨ បានបិទបញ្ចប់សង្រ្គាមហែកហួរផ្ទៃក្នុងរយៈពេល ៣ទសវត្សរ៍ដែលបានបណ្តាលឲ្យស្លាប់មនុស្សប្រមាណ ៣ ៥០០នាក់។
២៥ឆ្នាំក្រោយមក និងបន្ទាប់ពីប្រទេសអង់គ្លេសបានចាកចេញពីសហភាពអឺរ៉ុប កិច្ចព្រមព្រៀងសន្តិភាពមួយនេះហាក់កំពុងបន្តផុយស្រួយខ្លាំង។ ស្ថាប័នស្វយ័តរបស់អៀរឡង់ខាងជើងកំពុងជាប់គាំងដោយសារការបដិសេធមិនចូលរួមរបស់គណបក្សបង្រួបបង្រួមនិយមអៀរឡង់ខាងជើង។ នៅក្នុងបរិបទតានតឹងនេះ ប្រធានាធិបតីអាមេរិកលោកបៃដិនមានគម្រោងជួបថ្នាក់ដឹកនាំគណបក្សនយោបាយសំខាន់ៗទាំង ៥រូបនៅតំបន់អៀរឡង់ខាងជើង។ គោលដៅរបស់លោកបៃដិន គឺជួយផ្តល់សន្ទុះកិច្ចចរចាឡើងវិញដើម្បីបន្តរក្សាទុកនូវកិច្ចព្រមព្រៀងសន្តិភាពដែលមានស្រាប់។
បន្ទាប់មក នាឱកាសវត្តមានរយៈពេលខ្លីក្នុងទឹកដីអង់គ្លេស លោកបៃដិនក៏នឹងឆ្លៀតចូលជួបនាយករដ្ឋមន្រ្តីអង់គ្លេសលោករីស៊ី ស៊ូណាក់ដែរ។ បន្ទាប់មកទៀតនារសៀលថ្ងៃពុធ ទី១២ មេសាដដែល លោកបៃដិនដែលមានដើមកំណើតជាជនជាតិអៀរឡង់បន្តដំណើរទៅកាន់ប្រទេសអៀរឡង់ដែលជាសមាជិករបស់សហភាពអឺរ៉ុប។ នៅក្នុងទឹកដីកំណើត ការទទួលលោកបៃដិនអាចមានភាពកក់ក្តៅ និងអធិកអធមជាងនៅអៀរឡង់ខាងជើង។ កំណត់សម្គាល់មួយទៀត ទស្សនកិច្ចរយៈពេល ២ថ្ងៃរបស់លោកបៃដិននៅប្រទេសអៀរឡង់មានលក្ខណៈផ្លូវការជាង ព្រោះលោកត្រូវមានជំនួបជាលក្ខណៈទ្វេភាគី និងត្រូវឡើងថ្លែងសុន្ទរកថានៅក្នុងសភាអៀរឡង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ