បារាំង៖ប្រធានាធិបតីបានប្រកាសឲ្យប្រើច្បាប់សោធននិវត្តន៍ដ៏ចម្រូងចម្រាស
នៅក្នុងប្រទេសបារាំង ប្រធានាធិបតីលោកម៉ាក្រុងបានប្រកាសដាក់ឲ្យប្រើប្រាស់នូវច្បាប់សោធននិវត្តន៍ដ៏ចម្រូងចម្រាស។ ការប្រកាសនេះបានធ្វើឡើងនៅប៉ុន្មានម៉ោងក្រោយក្រុមប្រឹក្សាធម្មនុញ្ញបានឲ្យសុពលភាពលើផ្នែកសំខាន់ៗនៅក្នុងគម្រោងច្បាប់សោធននិវត្តន៍ ពិសេសការដំឡើងអាយុចូលនិវត្តន៍ពី ៦២ឆ្នាំទៅ ៦៤ឆ្នាំ។ ទោះជាយ៉ាងនេះក្តី ក្រុមសហជីពដែលបានដឹកនាំការប្រឆាំងនឹងគម្រោងច្បាប់មួយនេះតាំងពីច្រើនសប្តាហ៍បានប្រកាសបន្តធ្វើបាតុកម្មនាពេលខាងមុខទៀត។
ចុះផ្សាយនៅថ្ងៃ៖
ស្តាប់ - ០២:៣១
នៅក្នុងជម្រើសរវាងសម្រាក និងបន្តដំណើរឲ្យដល់គោលដៅ ប្រធានាធិបតីបារាំងលោកម៉ាក្រុងបានជ្រើសយកផ្លូវដើរឲ្យកាន់តែលឿនដើម្បីឲ្យឆាប់ដល់គោលដៅ។ នៅប៉ុន្មានម៉ោងក្រោយការសម្រេចឲ្យសុពលភាពរបស់ក្រុមប្រឹក្សាធម្មនុញ្ញនាល្ងាចថ្ងៃសុក្រ ទី១៤ មេសា លោកម៉ាក្រុងក៏បានប្រញិបប្រញាប់ប្រកាសដាក់ឲ្យប្រើច្បាប់នេះនៅយប់ថ្ងៃសុក្រ ទី១៤ ឆ្លងចូលថ្ងៃសៅរ៍ ទី១៥ មេសា។ ជម្រើសប្រញិបប្រញាប់របស់លោកម៉ាក្រុងនេះ គឺផ្ទុយនឹងសំណើសុំរបស់ក្រុមសហជីពដែលបានស្នើលោកកុំឲ្យប្រកាសដាក់ឲ្យប្រើច្បាប់ដ៏ចម្រូងចម្រាសមួយនេះនៅក្រោយការឲ្យសុពលភាពរបស់ក្រុមប្រឹក្សាធម្មនុញ្ញ។
គួរបញ្ជាក់ថា ក្រុមប្រឹក្សាធម្មនុញ្ញមិនបានឲ្យសុពលភាពទៅលើគម្រោងច្បាប់ចូលនិវត្តន៍ទាំងស្រុងរបស់រដ្ឋាភិបាលទេ ពោលបានឲ្យសុពលភាពទៅលើតែផ្នែកសំខាន់ៗប៉ុណ្ណោះ ពិសេសការដំឡើងអាយុចូលនិវត្តន៍ពី ៦២ឆ្នាំទៅ ៦៤ឆ្នាំ។ នេះហើយជាចំណុចចម្រូងចម្រាសខ្លាំងរវាងរដ្ឋាភិបាល និងក្រុមសហជីព ព្រោះអ្វីដែលក្រុមសហជីពបានទាមទារតាំងពីដំបូង គឺឲ្យដកការដំឡើងអាយុចូលនិវត្តន៍នេះចេញវិញ។ ប្រភពរដ្ឋាភិបាលបានឲ្យដឹងថា លោកម៉ាក្រុងនឹងថ្លែងទៅកាន់ប្រជាជាតិតាមទូរទស្សន៍នៅដើមសប្តាហ៍ក្រោយ និងរួមប្រជុំក្រុមសមាជិកសភាសំឡេងភាគច្រើន។
ចំណែកនាយករដ្ឋមន្រ្តីលោកស្រីអេលីហ្សាប៊ែត ប៊នបានអំពាវនាវឲ្យមានភាពស្ងប់ស្ងាត់ដោយបញ្ជាក់ថា គ្មានអ្នកឈ្នះ និងអ្នកចាញ់ទេ។ ទន្ទឹមគ្នានេះ លោកស្រីប៊នចង់បន្តកិច្ចសន្ទនាជាមួយក្រុមដៃគូសង្គមជាបន្តទៀតដើម្បីស្វែងរកភាពសម្របសម្រួល។ តែទោះជាយ៉ាងនេះក្តី ក្រុមសហជីព និងក្រុមប្រឆាំងមិនបញ្ឈប់ការ តវ៉ានៅត្រឹមនេះទេ។ ក្រោយពីបានធ្វើកូដកម្ម និងបាតុកម្មចំនួន ១២ថ្ងៃមក ក្រុមសហជីពគ្រោងរៀបចំបាតុកម្មធំនៅថ្ងៃទី១ ឧសភាដែលជាថ្ងៃទិវាពលកម្មអន្តរជាតិ។ ទន្ទឹមគ្នានេះ ក្រុមសហជីពបានបដិសេធមិនជួបលោកម៉ាក្រុងនៅមុនថ្ងៃទី១ ឧសភាតាមសំណើរបស់លោកម៉ាក្រុងឡើយ។
ឃើញថា ទោះមិនទាន់បាន ឬបានប្រកាសដាក់ឲ្យប្រើជាផ្លូវការក៏ដោយក៏ច្បាប់ចូលនិវត្តន៍ដ៏ចម្រូងចម្រាសមួយនេះហាក់នៅមិនទាន់ស្ងប់ស្ងាត់នៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ