រុស្ស៊ី គំរាម ប្រទេសសេដ្ឋកិច្ចជឿនលឿនទាំង៧ ពីការបញ្ចប់កិច្ចព្រមព្រៀងនាំចេញគ្រាប់ធញ្ញជាតិ
នៅថ្ងៃអាទិត្យ រុស្ស៊ី គំរាមពីការបញ្ចប់កិច្ចព្រមព្រៀងនាំចេញគ្រាប់ធញ្ញជាតិ ពីតំបន់ច្រកសមុទ្រខ្មៅ។ នោះជាកិច្ចព្រមព្រៀងដែលប្រទេសរុស្ស៊ី និងអ៊ុយក្រែន បានព្រមព្រៀងគ្នាជាមួយ អង្គការសហប្រជាជាតិ កាលពីឆ្នាំទៅមិញ និងដែលជិតផុតកំណត់នៅពាក់កណ្តាលខែឧសភាខាងមុខនេះ។ ការគំរាមរបស់ថ្នាក់ដឹកនាំរុស្ស៊ី នៅពេលនេះ គឺបន្ទាប់ពីមានដំណឹងលេចឮពីសារព័ត៌មានជប៉ុននិងអាមេរិក ថាប្រទេសសេដ្ឋកិច្ចនាំមុខទាំង៧ ក្នុងកិច្ចប្រជុំនៅជប៉ុន បង្ហាញចេតនាថាចង់ឈប់នាំចេញទំនិញទៅកាន់ប្រទេសរុស្ស៊ី។
ចុះផ្សាយនៅថ្ងៃ៖
ស្តាប់ - ០១:៥៥
អនុប្រធានក្រុមប្រឹក្សាសន្តិសុខជាតិរុស្ស៊ី និងជា អតីតនាយករដ្ឋមន្ត្រី លោក Dmitri Medvedev គូសបង្ហាញថា ជាការដ៏ឆោតល្ងង់ ដែលប្រទេសសេដ្ឋកិច្ចនាំមុខទាំង៧ បង្ហាញចេតនាចង់ឈប់នាំចេញទំនិញគ្រប់ប្រភេទមករុស្ស៊ី។ បើពិតជាដូច្នេះមែន រុស្ស៊ី នឹងវាយបកដូចគ្នា ដោយឈប់នាំចេញទំនិញទៅកាន់ប្រទេសពួកគេទាំងនោះ រាប់តាំងពីប្រភេទទំនិញដែលប្រទេសហ្សេ៧ ត្រូវការចាំបាច់បំផុតផង។ ឧទាហរណ៍ជានិមិត្តរូប គឺ ធញ្ញជាតិ ស្រូវសាលី។
តាមរយៈសំណេរក្នុងប្រព័ន្ធតេលេក្រាម មន្ត្រីជាន់ខ្ពស់វិមានក្រេមឡាំង រូបនេះ ក៏បានបង្ហើបពីការផ្តាច់កិច្ចព្រមពៀងនាំចេញ គ្រាប់ធញ្ញជាតិ ។ កិច្ចព្រមព្រៀងនេះ ធ្វើឡើងជាមួយ អ៊ុយក្រែន និងអង្គការសហប្រជាជាតិ ដោយសម្របសម្រួលពីតួកគីនៅខែកក្កដាឆ្នាំ២០២២ និងដែលត្រូវដល់ពេលផុតកំណត់ នៅថ្ងៃទី១៨ឧសភា ខាងមុខ។ មុនផុតកំណត់នេះ ប្រមុខការទូតរុស្ស៊ី លោក Sergueï Lavrov នឹងត្រូវអញ្ជើញទៅក្រុងញូវយក ដើម្បីជួបចរចាជាថ្មីជាមួយ អគ្គលេខាធិការអង្គការសហប្រជាជាតិ លោក Antonio Guterres ដើម្បីសម្រេចថា ត្រូវផ្តាច់កិច្ចព្រមព្រៀង ឬ ត្រូវពន្យារពេលបន្ថែម ឬក៏យ៉ាងណាទៀត។
បណ្តារដ្ឋមន្ត្រីកសិកម្ម នៃប្រទេសមានសេដ្ឋកិច្ចជឿនលឿន G7 ក្នុងកិច្ចប្រជុំថ្នាក់ នៅជប៉ុន បានអំពាវនាវឲ្យបន្តកិច្ចព្រមព្រៀងនេះតទៅទៀត ហើយចង់ឲ្យពង្រីកវិសាលភាពផង។ មិនតែប៉ុណ្ណោះ ក្នុងសេចក្តីថ្លែងការណ៍រួមរបស់រដ្ឋមន្ត្រីកសិកម្មប្រទេស G7 គឺបានបញ្ជាក់ជំហរជួយ អ៊ុយក្រែន នៅក្នុងការស្តារ និងសាងសង់វិស័យហេដ្ឋារចនាសម្ព័ន្ធកសិកម្ម និងជួយផ្តល់ជំនាញបច្ចេកទេសវិស័យកសិកម្មដល់អ៊ុយក្រែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ