ដាណឺម៉ាក បោះទុនវិនិយោគវិស័យការពារជាតិជាង៥ពាន់លានអឺរ៉ូ
សង្គ្រាមរុស្ស៊ីចូលឈ្លានពានអ៊ុយក្រែន បានធ្វើឱ្យទស្សនវិស័យការពារជាតិនៃបណ្តាប្រទេសនៅអឺរ៉ុបប្តូរផ្លាស់។ បន្ទាប់ពីបានបង្កើនចំណាយយោធានៅឆ្នាំ២០២២ ពីពេលនេះទៅ១០ឆ្នាំខាងមុខ ដាណឺម៉ាក នឹងប្រឹងធ្វើទំនើបកម្ម វិស័យការពារជាតិរបស់ខ្លួន ដោយត្រូវចំណាយទុនវិនិយោគ ប្រមាណ៣៨ពាន់លានគួរោន (រូបិយបណ្ណដាណឺម៉ាក) ឬត្រូវជា៥,០៩ពាន់លានអឺរ៉ូ។
ចុះផ្សាយនៅថ្ងៃ៖
ស្តាប់ - ០១:៤២
២១ពាន់លានគួរោន សម្រាប់ធ្វើទំនើបកម្មសម្ភារៈបរិក្ខារយោធា អាគារ បច្ចេកវិទ្យាព័ត៌មានវិទ្យា និងបុគ្គលិក។ ១១ពាន់លានគួរោនទៀត ជាទុនវិនិយោគថ្មីសម្រាប់វិស័យការពារជាតិ។ នេះបើតាមសេចក្តីថ្លែងការណ៍លម្អិតរបស់ក្រសួងការពារជាតិដាណឺម៉ាក ដោយបញ្ជាក់ថា ស្ថានភាពភូមិសាស្ត្រនយោបាយបច្ចុប្បន្នជាអ្នកជំរុញឱ្យរដ្ឋាភិបាលដាណឺម៉ាកមានធនធានច្រើនជាងមុន ដើម្បីធានារ៉ាប់រងវិស័យការពារជាតិ។
លោកTroels Lund Poulsen រដ្ឋមន្ត្រី ក្រសួងការពារជាតិបានពន្យល់ទៀតថា ស្ថានភាពនយោបាយសន្តិសុខ ក្នុងរយៈពេលជាច្រើនឆ្នាំកន្លងមកនេះ បានក្លាយជាបន្ទុកធ្ងន់ណាស់សម្រាប់ចំណាយយោធាប្រទេសនាពេលនេះ។ ប៉ុន្តែ ការសម្រេចចិត្ត របស់អ្នកនយោបាយមុនៗ សុទ្ធតែពឹងលើសម្មតិកម្មដែលមិនត្រឹមត្រូវ ទើបពេលនេះដាណឺម៉ាក ត្រូវប្រឈមនឹងដោះស្រាយបញ្ហាដ៏ធ្ងន់ធ្ងរ។ គឺត្រូវស្តារមូលដ្ឋានគ្រឹះនៃវិស័យការពារជាតិសិនមុននឹងចាប់ផ្តើមការងារពង្រឹង។
សេចក្តីប្រកាសធ្វើវិនិយោគនិងទំនើបកម្មវិស័យការពារជាតិនេះ ធ្វើឡើងក្រោយពីកងកម្លាំងយោធាដាណឺម៉ាកធ្វើសវនកម្មដើម្បីត្រៀមលក្ខណៈចរចារកកញ្ចប់ថវិកាចាប់ពីឆ្នាំ២០២៤ទៅ មកប្តូរផ្លាស់គ្រឿងបរិក្ខារ បន្ទាយ ដែលចាស់រិចរិល និងរត់តាមបច្ចេកវិទ្យាសម័យឌីជីថល។ សម្រាប់ប្រមុខយោធា ដាណឺម៉ាកក៏ត្រូវការជ្រើសរើសទាហានថ្មីបន្ថែមជាច្រើនខ្លាំងដែរ។ តែបញ្ហានេះមិនអាចដោះស្រាយបានដោយប្រើពេលខ្លីត្រឹមពីរបីឆ្នាំ បានទេ។
សូមបញ្ជាក់ថា បន្ទាប់ពី បានប្រកាសដំឡើងចំណាយយោធា កាលពីឆ្នាំ២០២២ នៅពេលឃើញរុស្ស៊ីចូលឈ្លានពានអ៊ុយក្រែនមក ដាណឺម៉ាក បានគូសបញ្ជាក់ថាអំពី គម្រោងចំណាយយោធាឱ្យឡើងដល់២%នៃផលិតផលសរុបក្នុងស្រុក តាមកម្មវត្ថុកំណត់ដោយអូតង់ ចាប់ពីឆ្នាំ២០៣០ទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ