អ៊ុយក្រែនដណ្តើមបានភូមិ ៤ ក្នុងប្រតិបត្តិការវាយបកយកទឹកដីមកវិញ
កងកម្លាំងអ៊ុយក្រែន បានប្រកាស នៅព្រឹកថ្ងៃ ចន្ទទី ១២ មិថុនា២០២៣ ដណ្តើមកាន់កាប់ ភូមិថ្មីមួយទៀត នៅភាគអាគ្នេយ៍នៃប្រទេស។ ជាសរុប គិតមកទល់នឹងម៉ោងនេះ អ៊ុយក្រែនដណ្តើមបានភូមិចំនួនបួនមកវិញ ព្រោះកាលពីម្សិល ទាហានរំដោះបានភូមិចំនួនបី នៅក្នុងតំបន់ដូណេតស្ក៍។ នេះជាជោគជ័យដំបូង នៃប្រតិបត្តិការវាយបកយកទឹកដីមកវិញ។
ចុះផ្សាយនៅថ្ងៃ៖
ស្តាប់ - ០២:០០
អាជ្ញាធរអ៊ុយក្រែនបានបើកប្រតិបត្តិការដោយស្ងាត់ស្ងៀម និងបានណែនាំឱ្យពលរដ្ឋអ៊ុយក្រែន កុំផ្សព្វផ្សាយព័ត៌មានអ្វីទាំងអស់ទាក់ទងនឹងប្រតិបត្តិការវាយបកយកទឹកដី ភាគខាងត្បូងនិងភាគខាងកើត ដែលធ្លាក់ក្នុងកណ្តាប់ដៃរុស្ស៊ី មកវិញ។
ទើបតែនៅថ្ងៃនេះ ជាមួយសេចក្តីប្រកាសអរគុណ កងពលម៉ារីនទី ៣៥ដែលរំដោះបានភូមិមួយនៃ តំបន់ដូណេតស្ក៍ លោកអនុរដ្ឋមន្ត្រីក្រសួងការពារជាតិអ៊ុយក្រែនបានបង្ហោះរូបថតក្រុមយោធាអ៊ុយក្រែនកំពុងលើកគ្រវីទង់ជាតិ នៅក្នុងភូមិ Storojeve។ ម្សិលមិញ កងពលទី៦៨ ដណ្តើមបានមកវិញនូវ ភូមិចំនួនបី ដែលនៅប៉ែកខាងកើតនៃតំបន់ ក្នុងនោះមានភូមិមួយស្ថិតនៅជាប់តំបន់ហ្សាប៉ូរីចា។ នេះបើតាមលោកអនុរដ្ឋមន្ត្រីដដែល។ នៅក្នុងយុទ្ធនាការរំដោះទឹកដី ទាហានអ៊ុយក្រែនចាប់ខ្លួនទាហានរុស្ស៊ីពីរនាក់និងក្រុមផ្តាច់ខ្លួននិយមស្និទ្ធនឹងរុស្ស៊ីជាច្រើននាក់ទៀត។
ក្រៅពីសមរភូមិនៅតំបន់ដូណេតស្ក៍ នាយសេនាធិការនៃកងកម្លាំងយោធាអ៊ុយក្រែន ក៏បានជូនដំណឹងអំពីការសម្រុករបស់ទាហាន២៥កង នៅជិតក្រុងបាក់មូដ និងក្នុងតំបន់លូហានស្ក៍ ដោយអាចរុញច្រានទាហានរុស្ស៊ីបានប្រមាណ៧០០ម៉ែត្រ។
ជាលទ្ធផលស្តួចស្តើងទេ តែនេះគឺជាជោគជ័យ និងជាការដណ្តើមទឹកដីរបស់ខ្លួនបានខ្លះមកវិញ ជាលើកដំបូង នារយៈពេលប៉ុន្មានខែមកនេះ។ នេះក៏ជាសញ្ញាបញ្ជាក់ថា ប្រតិបត្តិការវាយបកយកដីវិញ ដែលអ៊ុយក្រែនត្រៀមតាំងពីយូរ និងដែលលោកប្រធានាធិបតី ហ្សេឡេស្គី ទើបបានព្រលយប្រាប់ដោយមិនលម្អិតកាលពីថ្ងៃសៅរ៍ បានចាប់ផ្តើមមែនហើយនិងកំពុងរុលទៅមុខ។
សូមរំលឹកថា រុស្ស៊ីបានប្រកាសចាត់ទុកថាជាបរាជ័យ តាំងពីដើមសប្តាហ៍មុន ដោយថែមទាំងបង្ហោះផ្សាយរូបភាពយានយន្ត រថក្រោះអ៊ុយក្រែន ផលិតនៅអាមេរិកនិងអាល្លឺម៉ង់ ត្រូវកម្ទេចបានដោយទ័ពរុស្ស៊ីផង។ កាលពីថ្ងៃសុក្រ ប្រធានាធិបតីពូទីន បានអះអាងថាប្រតិបត្តិការអ៊ុយក្រែនបានចាប់ផ្តើមមែនតែមិនសម្រេចដូចកម្មវត្ថុទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ