បារាំង៖ប្រធានាធិបតីលោកម៉ាក្រុងប្រកាសបន្ថែមលុយចំនួន ៥០០លានអឺរ៉ូដើម្បីអភិវឌ្ឍវិស័យបញ្ញាសិប្បនិម្មិត
នៅក្នុងប្រទេសបារាំង ប្រធានាធិបតីលោកម៉ាក្រុងបានប្រកាសពីផែនការគាំទ្រ និងផ្តល់សន្ទុះនៅក្នុងវិស័យបញ្ញាសិប្បនិម្មិត។ ការប្រកាសរបស់លោកម៉ាក្រុងបានធ្វើឡើងនៅថ្ងៃពុធ ទី១៤ មិថុនានាឱកាសពិព័រណ៌អឺរ៉ុប VivaTech ស្តីពីបច្ចេកវិទ្យា និងនវានុវត្តន៍រៀបចំក្នុងទីក្រុងប៉ារីស។ ថ្លែងនៅចំពោះមុខអ្នកចូលរួមនាឱកាសនោះ លោកម៉ាក្រុងបានប្រកាសចេញនូវផែនការទី២ ដើម្បីបង្កើនការវិនិយោគនៅក្នុងវិស័យបញ្ញាសិប្បនិម្មិត។ នៅក្នុងផែនការទី២ នេះ លោកម៉ាក្រុងបានប្រកាសដាក់លុយបន្ថែមចំនួន ៥០០លានអឺរ៉ូ។ គួរបញ្ជាក់ថា នៅក្នុងផែនការទី១ ក្នុងឆ្នាំ ២០១៨ រដ្ឋាភិបាលបានដាក់លុយវិនិយោគចំនួន ១ ៥០០លានអឺរ៉ូ។ តាមលោកម៉ាក្រុង បារាំង និងអឺរ៉ុបបានដើរយឺតជាងអាមេរិក និងចិនឆ្ងាយណាស់នៅក្នុងវិស័យបញ្ញាសិប្បនិម្មិតនេះ។
ចុះផ្សាយនៅថ្ងៃ៖
ស្តាប់ - ០១:១៧
« ខ្ញុំគិតថានៅអឺរ៉ុប បារាំងក៏ជាប្រទេសមួយឈានមុខដែរនៅក្នុងវិស័យបញ្ញាសិប្បនិម្មិត។ តែអ្វីដែលច្បាស់ អាមេរិកបានឈានមុខដាច់ឆ្ងាយណាស់នៅក្នុងវិស័យនេះ ហើយសូម្បីតែចិនដែលស្ថិតនៅពីក្រោយអាមេរិកក៏កំពុងបោះជំហានទៅមុខដែរ។ អ្វីដែលរឹតតែច្បាស់ជាងនេះ អាមេរិក និងចិនធ្វើដំណើរលឿនជាងបារាំង និងអឺរ៉ុប។ អាទិភាពសម្រាប់ខ្ញុំ គឺត្រូវបន្តបង្កើនការវិនិយោគឲ្យបានលើសពីអ្វីដែលយើងបានធ្វើនៅក្នុងផែនការទី១។
អ្វីដែលយើងត្រូវបង្កើន គឺត្រូវពន្លឿនវគ្គបណ្តុះបណ្តាល។ នៅបារាំង យើងសម្បូរអ្នកមានទេពកោសល្យ និងអ្នកមានសមត្ថភាពជាមូលដ្ឋានដែលយើងត្រូវការ។ យើងមានស្ថាប័នស្រាវជ្រាវ និងសកលវិទ្យាល័យល្អៗ។ តែយើងត្រូវធ្វើឲ្យបានលើសពីនេះ។ ដូច្នេះកម្មវត្ថុរបស់យើង គឺបង្កើនវគ្គបណ្តុះបណ្តាលទ្វេដង ហើយក្នុងពេលជាមួយគ្នា បង្កើត clusters បញ្ញាសិប្បនិម្មិតពី ៥ ទៅ ១០ ដោយប្រើថវិកាចំនួន ៥០០លានអឺរ៉ូក្នុងគោលដៅបង្កើតឲ្យបានយ៉ាងតិចនូវប៉ូលបញ្ញាសិប្បនិម្មិតពី ២ ទៅ ៣ ប៉ូលដែលមានខ្នាតអន្តរជាតិ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ