ប្រែប្រួលអាកាសធាតុ ៖ កម្តៅសីតុណ្ហភាពនៅអឺរ៉ុបឡើងលឿនខ្លាំងជាងគេ ពីរដង
នៅឆ្នាំ២០២២ សីតុណ្ហភាពនៅអឺរ៉ុបបានឡើងក្តៅលើសធម្មតា ជាមធ្យម ២,៣អង្សា។ នេះបើតាមរបាយការណ៍របស់អង្គការឧតុនិយមពិភពលោក និងអង្គការឧតុនិយមអឺរ៉ុប Copernicus ចេញផ្សាយនៅថ្ងៃចន្ទទី ១៩ មិថុនា២០២៣។ ជាមួយនឹងការឡើងកម្តៅសីតុណ្ហភាព ក្នុងល្បឿនលើសមធ្យមភាគពិភពលោក ដល់ទ្វេដង ទើបទ្វីបអឺរ៉ុបត្រូវជួបគ្រោះរាំងស្ងួតនិងក្តៅខ្លាំង យ៉ាងចម្លែក។
ចុះផ្សាយនៅថ្ងៃ៖
ស្តាប់ - ០២:០៨
២០២២ ជាឆ្នាំដែលក្តៅជាងគេលំដាប់ទី២ សម្រាប់ទ្វីបអឺរ៉ុបជាទូទៅ ដែលមានកំណើនសីតុណ្ហភាពលើសីតុណ្ហភាពមធ្យមសម័យមុនឧស្សាហកម្ម (១៨៥០-១៩០០) ដែលគេប្រើជាគោលក្នុងកិច្ចព្រមព្រៀងអាកាសធាតុ ដល់ទៅ២,៣អង្សា ឬ០,៥អង្សា លើសសីតុណ្ហភាពមធ្យមពីឆ្នាំ១៩៩១-២០២០។ ប៊ែលហ្សិក បារាំង អាល្លឺម៉ង់ អៀរឡង់ អ៊ីតាលី លុចសំបួរ ព័រទុយហ្កាល់ អេស្ប៉ាញ ស្វីស និងអង់គ្លេស ជាក្រុមប្រទេសដែលរងរលកកម្តៅខ្លាំងជាងគេមិនធ្លាប់ប្រទះពីមុនមក។
ការឡើងកម្តៅនេះបានបង្កឱ្យអឺរ៉ុបជួបគ្រោះរាំងស្ងួត ខ្លាំងនិងជាទូទៅ ព្រមទាំងមានភ្លើងឆេះព្រៃនិងការខូចខាតសេដ្ឋកិច្ចគិតជាប្រាក់ ប្រមាណ២ពាន់លានដុល្លារ។ បើតាមទិន្នន័យអឺរ៉ុបដដែល រលកកម្តៅខ្លាំងហួសហេតុ បានសម្លាប់ជីវិតមនុស្ស ១៦៣៦៥នាក់ និងអ្នករងគ្រោះផ្ទាល់ ១៥៦០០០នាក់ នៅឆ្នាំ២០២២។
ដូចធ្លាប់ប្រកាសកាលពីខែវិច្ឆិកា២០២២ម្តងថា តាំងពីឆ្នាំ១៩៩០មក អឺរ៉ុបឡើងកម្តៅកន្លះអង្សា ក្នុងមួយទសវត្សៗ អង្គការឧតុនិយមពិភពលោកអង្គការសហប្រជាជាតិ បានរំលឹកថា អឺរ៉ុប គឺជាតំបន់ដែលឡើងកម្តៅលឿនជាងគេ ក្នុងល្បឿន២ដងលើសសីតុណ្ហភាពមធ្យមនៃ៥ទ្វីបផ្សេងទៀត។ កម្តៅផ្ទៃទឹកមហាសមុទ្ទអាត្លង់ទិកខាងជើង ក៏ឡើងក្តៅខ្លាំងពុំមានពីមុនមក។ ផ្ទាំងទឹកកកលើកំពូលជួរភ្នំ ក៏បានរលាយនិងរួមតូចយ៉ាងខ្លាំងបំផុត។ រដូវក្តៅ សីតុណ្ហភាពខ្ពស់ខ្លាំងហើយ រដូវរងារពុំសូវមានព្រិលធ្លាក់ទៀត នៅទីបំផុតភ្នំទឹកកកអឺរ៉ុប បានបាត់បង់មាឌអស់៨៨០គីឡូម៉ែត្រគូប គិតតាំងពីឆ្នាំ១៩៩៧មក។
ហេតុអ្វីអឺរ៉ុបឡើងកម្តៅខ្លាំងនិងលឿនជាងទ្វីបដទៃ ? មានកត្តាជាច្រើនរួមផ្សំគ្នា។ ជាទូទៅតំបន់អាកទិក និងតំបន់ភ្នំឡើងកម្តៅលឿនជាងគេ ហើយអឺរ៉ុបមួយផ្នែកធំ ជាតំបន់ភ្នំមានរយៈកម្ពស់ខ្ពស់។ អឺរ៉ុប មានទីតាំងភូមិសាស្ត្រស្ថិតនៅចន្លោះចរន្តខ្យល់កំណាចពីរ នៃអឌ្ឍគោលខាងជើង និងអឌ្ឍគោលខាងត្បូង Double jet stream ទំនងជាដើមហេតុនាំឱ្យអឺរ៉ុបខាងលិចងាយរងគ្រោះក្តៅ និងភាពរាំងស្ងួតខ្លាំង។
ប៉ុន្តែ២០២២ មិនមែនជាករណីក្តៅចម្លែក ឬជាករណីទោលឡើយ។ បើតាមប្រសាសន៍របស់លោកនាយកស្ថានីយ៍តាមដានការប្រែប្រួលអាកាសធាតុអឺរ៉ុប Copernicus ដោយបញ្ជាក់ថាសីតុណ្ហភាពកំណាចហួសហេតុ នឹងមានកាន់តែញាប់ និងកាន់តែធ្ងន់ធ្ងរពេញគ្រប់តំបន់។ ជាចុងក្រោយ របាយការណ៍បានលើកឡើងអំពីក្តីសង្ឃឹមដ៏កម្រមួយ គឺនៅឆ្នាំ២០២២ អឺរ៉ុបបានផលិតអគ្គីសនីដោយថាមពលកើតឡើងវិញ (២២,៣%) ច្រើនជាងផលិតថាមពលដោយឧស្ម័នផូស៊ីល (២០%)និងធ្យូងថ្ម (១៦%)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ