អាល្លឺម៉ង់ត្រៀមបញ្ជូនទ័ព៤ពាន់នាក់ទៅប្រចាំការនៅលីទុយអានី ដើម្បីពង្រឹងព្រំដែនអូតង់
ដោយពុំអាចយល់អំពីមូលហេតុនៃការទទួលមេក្រុមទាហានស៊ីឈ្នួលវ៉ាក់ណែ លោក ព្រីហ្គោហ្ស៊ីន ឱ្យនៅប្រទេសបេឡារុស សមាជិកអង្គការអូតង់ ដូចយ៉ាងលីទុយអានី ដែលមានព្រំដែនជាមួយរុស្ស៊ីនិងបេឡារុស ចាប់ផ្តើមគិតគូរពង្រឹងព្រំដែន។ ក្រោយការអំពាវនាវរបស់លីទុយអានី រដ្ឋមន្ត្រីក្រសួងការពារជាតិអាល្លឺម៉ង់ បានប្រកាសនៅថ្ងៃចន្ទទី ២៦មិថុនានេះ គម្រោងបញ្ជូនទ័ពបួនពាន់នាក់ទៅជួយពង្រឹងវត្តមានកងទ័ពនៅតាមបណ្តោយព្រំដែនខាងកើតបំផុតរបស់អូតង់។
ចុះផ្សាយនៅថ្ងៃ៖
ស្តាប់ - ០១:៥៧
អាល្លឺម៉ង់ គ្រោងនឹងបញ្ជូនកងទ័ពមួយកងពលតូច ដ៏រឹងមាំ និងជាប្រចាំនៅក្នុងប្រទេសលីទុយអានី ស្របតាមលក្ខខណ្ឌនៃការពង្រាយរចនាសម្ព័ន្ធយោធា មានជាអាទិ៍បន្ទាយនិងឃ្លាំង នៅផ្ទាល់កន្លែងផង និងស្របតាមផែនការរបស់អូតង់ផង។ នេះបើតាមសេចក្តីប្រកាសរបស់រដ្ឋមន្ត្រីក្រសួងការពារជាតិអាល្លឺម៉ង់ ទៅកាន់លីទុយអានី។ លោករដ្ឋមន្ត្រី បានបញ្ជាក់ទៀតថា កងពលអាល្លឺម៉ង់មានរូបរាងពេញលេញបន្តិចម្តង នៅពេលណារចនាសម្ព័ន្ធរៀបចំរួច។
គិតមកទល់ពេលនេះ អាល្លឺម៉ង់មានទាហានប្រយុទ្ធមួយក្រុម ប្រចាំការនៅលីទុយអានីក្នុងក្របខ័ណ្ឌអូតង់ និងមានទ័ពនៅផ្ទាល់កន្លែងប្រមាណ ចំនួន ៨០០នាក់។ អាល្លឺម៉ង់មានមួយកងពលតូចទៀត ឈរជើងនៅអាល្លឺម៉ង់ទេ តែត្រៀមជាស្រេចនឹងចេញធ្វើប្រតិបត្តការរហ័សនៅលីទុយអានី។ តែនៅថ្ងៃខាងមុខ ដើម្បីជួយពង្រឹងព្រំដែនខាងកើតបំផុតអូតង់ ទាហានអាល្លឺម៉ង់នឹងឡើងដល់ចំនួនដល់៤០០០នាក់។
កាលពីថ្ងៃអាទិត្យទី ២៥មិថុនា ប្រធានាធិបតីលីទុយអានី បានអំពាវនាវឱ្យអូតង់ ពង្រឹងព្រំដែនប៉ែកខាងកើតបំផុត ប្រសិនបើបេឡារុស ទទួលមេក្រុមទាហានស៊ីឈ្នួល វ៉ាក់ណែ លោក ព្រីហ្គោហ្ស៊ីន ដូចសេចក្តីប្រកាសរបស់វិមានក្រេមឡាំងមែន។ សម្រាប់លោកប្រធានាធិបតីលីទុយអានី Gitanas Nauseda ប្រសិនបើលោក ព្រីហ្គោហ្ស៊ីន និងក្រុមនាយទាហានវ៉ាក់ណែ មកបេឡារុស ដោយគ្មានកម្មវត្ថុ និងផែនការច្បាស់លាស់ យើងត្រូវតែពង្រឹងសន្តិសុខតាមព្រំដែនខាងកើត មិនមែនដើម្បីតែប្រទេសលីទុយអានីទេ តែដើម្បីធានាសុវត្ថិភាពអូតង់ទាំងមូល។ លោក ណូសេដា បានគូសបញ្ជាក់ទៀតថា លីទុយអានី នឹងចំណាយមធ្យោបាយចារកិច្ចធំជាងមុន ដើម្បីវាយតម្លៃទិដ្ឋភាពនយោបាយនិងសន្តិសុខនៅបេឡារុស។ លីទុយអានី មានព្រំប្រទល់ជាប់រុស្ស៊ីផង និងបេឡារុសផង ហើយត្រូវទទួលរៀបចំជំនួបកំពូលអូតង់នៅខែក្រោយ តែលីទុយអានីមិនប្តូរផ្លាស់វិធានការសន្តិសុខថ្ងៃរៀបចំព្រឹត្តិការណ៍ ដោយហេតុតែការបះបោរមិនសម្រេចរបស់ទាហានវ៉ាក់ណែនៅរុស្ស៊ីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ