សីតុណ្ហភាពក្តៅខ្លាំងនារដូវក្តៅឆ្នាំ២០២២ សម្លាប់មនុស្សជាង៦ម៉ឺននាក់នៅអឺរ៉ុប
រដូវក្តៅឆ្នាំ២០២២ ជារដូវដែលមានសីតុណ្ហភាពឡើងក្តៅខ្លាំងជាងគេបំផុត មិនដែលធ្លាប់ជួបប្រទះពីមុនមកទេ នៅអឺរ៉ុប។ ក្តៅចម្លែកជាងរដូវក្តៅមុនៗហើយ រដូវក្តៅ២០២២ កំណាចនិងសម្លាប់មនុស្សអស់ច្រើនជាពិសេសជាងគេជាងឯងទៅទៀត។ នេះបើតាមការសិក្សាទើបចេញផ្សាយនៅថ្ងៃចន្ទទី១០កក្កដា ដែលអំពាវនាវឱ្យអាជ្ញាធរប្រឹងប្រែងគិតគូរទ្វេឡើងរកវិធីប្រឈមនឹងការឡើងកម្តៅសីតុណ្ហភាពក្តៅហួតហែងខ្លាំងនាពេលអនាគត។
ចុះផ្សាយនៅថ្ងៃ៖
ស្តាប់ - ០២:៤៦
ដោយហេតុតែការប្រែប្រួលអាកាសធាតុ ទ្វីបអឺរ៉ុបរងរលកកម្តៅខ្លាំងជាច្រើនសា កាលពីឆ្នាំ២០២២ និងមានសីតុណ្ហភាពឡើងខ្ពស់បំបែកកំណត់ត្រាចាស់ៗទៀត។ ការិយាល័យស្ថិតិអឺរ៉ុប ក៏ធ្លាប់បានលើកឡើងរួចមកហើយអំពីផលវិបាកនៃការឡើងកម្តៅនេះថានាំឱ្យមានអត្រាមរណៈឡើងខ្ពស់ខុសប្រក្រតី គ្រាន់តែមិនបញ្ជាក់ថាប៉ុន្មានឱ្យប្រាកដ។ ប៉ុន្តែនៅថ្ងៃនេះ អ្នកវិទ្យាសាស្ត្រនៃវិទ្យាស្ថានសុខាភិបាលជាតិបារាំង និងវិទ្យាស្ថានសុខាភិបាលបាសឺឡោនទទួលបានទិន្នន័យសីតុណ្ហភាព និងអត្រាមរណៈ ពីឆ្នាំ២០១៥-២០២២ មកពី៨២៣តំបន់ក្នុង៣៥ប្រទេសនៅអឺរ៉ុប ដែលមានប្រជាជនសរុបជាង៥៤៣លាននាក់ សម្រាប់មកវិភាគរកអត្រាមរណៈពាក់ព័ន្ធនឹងកម្តៅសីតុណ្ហភាព តាមតំបន់នីមួយៗ រាល់គ្រប់មួយសប្តាហ៍ម្តងៗ ពេញមួយរដូវក្តៅ។
ការវិភាគបានរកឃើញថា នៅរវាងពីថ្ងៃទី៣០ឧសភា ដល់ថ្ងៃទី ៤កញ្ញាឆ្នាំ២០២២ កម្តៅសីតុណ្ហភាពខ្ពស់បានសម្លាប់មនុស្ស៦១៦៧២នាក់នៅអឺរ៉ុប។ ហើយពីថ្ងៃទី ១៨ដល់២៤កក្កដា ដែលកម្តៅឡើងខ្លាំងហួសហេតុនោះ មានមនុស្ស១១៦៣៧នាក់បានស្លាប់។ នេះជាឥទ្ធិពលនៃការឡើងកម្តៅសីតុណ្ហភាពជាមធ្យមនៅអឺរ៉ុប ក្នុងកំរិតមួយអង្សា តែបើលម្អិតតាមប្រទេសមួយៗវិញ នៅបារាំងសីតុណ្ហភាពមធ្យមប្រចាំរដូវបានឡើង ២,៤៣អង្សាបើប្រៀបនៅសីតុណ្ហភាពមធ្យមក្នុងអំឡុងពេលពីឆ្នាំ១៩៩១-២០២០ ស្វីស២,៣០អង្សា អ៊ីតាលី២,២៨អង្សា ហុងគ្រី២,១៣អង្សា និងអេស្ប៉ាញ២,១១អង្សា។ ឯចំនួនអ្នកស្លាប់វិញ ឡើងខ្ពស់ខ្លាំងជាងគេនៅប្រទេសអ៊ីតាលី គឺ ១៨០១០នាក់ អេស្ប៉ាញ១១៣២៤នាក់ និងជាង៨ពាន់នៅអាល្លឺម៉ង់។
ផ្សាយក្នុងទស្សនាវដ្តី Nature Medecine ការសិក្សាបានបញ្ជាក់ថា អ្នកស្លាប់បាត់បង់ជីវិតដោយកម្តៅឡើងខ្លាំង ភាគច្រើនជាមនុស្សចាស់ អាយុលើស៨០ឆ្នាំនិង៦៣%ជាស្ត្រី។ សម្រាប់ អ្នកវិទ្យាសាស្ត្រ ការសិក្សានេះបានឆ្លុះឱ្យឃើញអំពីភាពបន្ទាន់នៃការការពារប្រជាងាយរងគ្រោះ និងជាការចង្អុលបង្ហាញអំពីយុទ្ធសាស្ត្រការពារជីវិតពីការឡើងកម្តៅសីតុណ្ហភាព ដែលត្រូវបញ្ចូលកត្តាអាយុនិងភេទចូលផង។ ប្រសិនបើអឺរ៉ុបគ្មានវិធានការសមស្របទេ នោះអត្រាមរណៈក្នុងរដូវក្តៅ នឹងឡើងលើសធម្មតាជាមធ្យមជាង៦៨០០០នាក់ នៅឆ្នាំ២០៣០ និងជាង៩៤០០០នាក់នៅឆ្នាំ២០៤០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ