ប្រធានាធិបតីបារាំងថា ឯកអគ្គរដ្ឋទូតបារាំងនៅនីហ្សេត្រូវបានរបបសឹកចាប់ជាចំណាប់ខ្មាំង
ប្រធានាធិបតីបារាំងលោកម៉ាក្រុងបានថ្លែងក្នុងថ្ងៃសុក្រ ទី១៥ កញ្ញាថា ឯកអគ្គរដ្ឋទូតបារាំងលោក Sylvain Itté រួមទាំងមន្រ្តីទូតផ្សេងទៀតនៅក្នុងប្រទេសនីហ្សេត្រូវបានរបបសឹកចាប់ជាចំណាប់ខ្មាំងនៅក្នុងស្ថានទូត។ តាមលោកម៉ាក្រុង ពួកគេត្រូវបានរបបសឹកផ្តល់របបអាហារឲ្យ និងលែងមានលទ្ធភាពដើម្បីចេញក្រៅបានឡើយ។ គួរបញ្ជាក់ថា តាំងពីក្រោយក្រុមយោធាធ្វើរដ្ឋប្រហារទម្លាក់ប្រធានាធិបតីស្របច្បាប់លោកម៉ូហាម៉េដ បាហ្ស៊ូមក្នុងថ្ងៃទី២៦ កក្កដាមក របបសឹកបានចេញបញ្ជាបណ្តេញឯកអគ្គរដ្ឋទូតបារាំងនាដំណាច់ខែសីហា។ តែបារាំងមិនព្រមធ្វើតាម។
ចុះផ្សាយនៅថ្ងៃ៖
ស្តាប់ - ០២:១៩
ដំណឹងនៃការចាប់ឯកអគ្គរដ្ឋទូតបារាំងលោក Sylvain Itté រួមទាំងមន្រ្តីទូតផ្សេងទៀតនៅប្រទេសនីហ្សេធ្វើជាចំណាប់ខ្មាំងពីសំណាក់របបសឹកត្រូវបានលោកម៉ាក្រុងប្រាប់នៅក្នុងឱកាសដែលលោកធ្វើដំណើរទៅកាន់តំបន់ប៉ែកកណ្តាលឈាងខាងកើតប្រទេសបារាំងនាថ្ងៃសុក្រ ទី១៥ កញ្ញា។ នៅពេលអ្នកកាសែតសួរថា តើនឹងអាចមានការធ្វើមាតុភូមិនិវត្តន៍របស់លោក Sylvain Itté មកកាន់បារាំងវិញទេ?។ លោកម៉ាក្រុងបានឆ្លើយថា លោកនឹងធ្វើអ្វីដែលលោកយល់ស្របជាមួយប្រធានាធិបតីនីហ្សេលោកម៉ូហាម៉េដ បាហ្ស៊ូមព្រោះលោកបាហ្ស៊ូមជាអ្នកមានអំណាចស្របច្បាប់។
ចំណែករដ្ឋមន្រ្តីការបរទេសបារាំងលោកស្រី Catherine Colonna បានថ្លែងនៅទូរទស្សន៍ LCI ក្នុងយប់ថ្ងៃសុក្រ ទី១៥ កញ្ញាថា ដរាបណាលោកម៉ាក្រុងចង់បាន លោក Sylvain Itté ធ្វើការ និងនៅកាន់តំណែងជាឯកអគ្គរដ្ឋទូតបារាំងប្រចាំប្រទេសនីហ្សេ។ តាមលោកស្រី Catherine Colonna ការសម្រេចចិត្តណាមួយអាស្រ័យលើប្រធានាធិបតីលោកម៉ាក្រុង។ គួរបញ្ជាក់ថា រឿងរ៉ាវរវាងបារាំង និងនីហ្សេបានកើតមានឡើងនៅក្រោយក្រុមយោធាធ្វើរដ្ឋប្រហារទម្លាក់លោកម៉ូហាម៉េដ បាហ្ស៊ូមក្នុងថ្ងៃទី២៦ កក្កដា។ រដ្ឋប្រហារនេះបានទទួលការថ្កោលទោសខ្លាំងពីបស្ចិមលោក ក្នុងនោះក៏មានបារាំងមួយដែរ។
ក្រុងប៉ារីសបានទាមទារឲ្យរបបសឹកប្រគល់អំណាចទៅឲ្យលោកបាហ្ស៊ូមវិញ។ បន្ទាប់មកនៅដំណាច់ខែសីហា របបសឹកនីហ្សេបានបញ្ជាឲ្យបណ្តេញឯកអគ្គរដ្ឋទូតបារាំងលោក Sylvain Itté ចេញពីនីហ្សេ។ តែបារាំងមិនព្រមធ្វើតាមដោយពន្យល់ហេតុផលថា របបសឹកគ្មានអំណាចអ្វីក្នុងការបណ្តេញលោក Sylvain Itté ទេ។ សម្រាប់បារាំង លោកម៉ូហាម៉េដ បាហ្ស៊ូមជា និងនៅជាប្រធានាធិបតីស្របច្បាប់របស់ប្រទេសនីហ្សេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ