លោកហ្សេឡេនស្គី ព្យាយាមប្រកូកប្រកាសរកជំនួយថវិកាដើម្បីបន្តប្រយុទ្ធ ខណៈសមរភូមិនៅទ្រឹង
លោកប្រធានាធិបតីអ៊ុយក្រែន វ្លូឌីមៀរ ហ្សេឡេនស្គី បានធ្វើដំណើរទៅដល់ទីក្រុងអូស្លូ រដ្ឋធានីន័រវេស នៅព្រឹកថ្ងៃពុធ ទី១៣ធ្នូ។ ជាដំណើរទៅ ដើម្បីជួបជាមួយថ្នាក់ដឹកនាំប្រទេសស្កង់ឌីណាវទាំង៥ ដែលមានន័រវែស ណាណឺម៉ាក ហ្វាំងឡង់ អ៊ីសឡង់ និងស៊ុយអែត ដែលក្រុមប្រទេសទាំង៥នេះ សុទ្ធតែជាសម្ព័ន្ធមិត្តជួយផ្នែកថវិកាយ៉ាងច្រើនដល់អ៊ុយក្រែន។ លោកហ្សេឡេនស្គី កំពុងតែព្យាយាមកៀងគរ ឲ្យការគាំទ្រអ៊ុយក្រែនកម្រើកខ្លាំងឡើងវិញ ព្រោះអ៊ុយក្រែនបារម្ភអំពីបញ្ហាខ្វះថវិកានិងគ្រឿងសព្វាវុធ ដើម្បីបន្តការប្រយុទ្ធ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:២៩
មុននឹងជួបប្រជុំរួមគ្នា ជាមួយថ្នាក់ដឹកនាំក្រុមប្រទេសស្កង់ឌីណាវទាំង៥ លោកប្រធានាធិបតីហ្សេឡេនស្គី បានជួបពិភាក្សជាមួយលោកនាយករដ្ឋមន្ត្រីន័រវែស Jonas Gahr Store។ ផ្អែកតាមលិខិតប្រកាស មុនលោកហ្សេឡេនស្គីទៅដល់ លោកនាយករដ្ឋមន្ត្រីន័រវែសបានអះអាងថា ន័រវែសនឹងបន្តជួយអ៊ុយក្រែនជានិច្ច នៅក្នុងការប្រយុទ្ធការពារជាតិ ទល់នឹងការឈ្លានពានរបស់រុស្ស៊ី។
គួរបញ្ជាក់ថា សមរភូមិប្រយុទ្ធនៅអ៊ុយក្រែន ហាក់នៅទ្រឹង មិនបានលទ្ធផលជោគជ័យ ដូចដែលអ៊ុយក្រែនចង់បាននោះទេ។ សង្គ្រាមកាន់តែអូសបន្លាយ បានធ្វើការគាំទ្រអ៊ុយក្រែនពីសំណាក់ក្រុមប្រទេសសម្ព័ន្ធមិត្ត កាន់តែចុះខ្សោយ។ អ៊ុយក្រែនបានខំប្រឹងអំពាវនាវ ថាខ្លួនត្រូវការថវិកា នឹងគ្រឿងសព្វាវុធបន្ថែមទៀត ដើម្បីអាចបន្តប្រយុទ្ធ។
បន្ទាប់ពីទៅអាហ្សង់ទីន ក្នុងពេលប្រធានាធិបតីថ្មីស្បថចូលកាន់តំណែង លោកហ្សេឡេនស្គី បានបន្តដំណើរទៅកាន់ទីក្រុងវ៉ាស៊ីនតោន កាលពីថ្ងៃអង្គារទី១២ធ្នូ ដើម្បីជំរុញឲ្យសហរដ្ឋអាមេរិក សម្រេចផ្តល់កញ្ចប់ថវិកាថ្មី ចំនួន៦១ពាន់លានដុល្លារ។ បច្ចុប្បន្នគម្រោងថវិកានេះ នៅជាប់គាំងនៅឡើយ ដោយសភាខុសហ្ក្រេសមិនព្រមបោះឆ្នោតអនុម័ត។ ក្នុងពេលធ្វើសន្និសីទកាសែតជាមួយលោកហ្សេឡេនស្គី លោកចូ បៃដិនបានធានាប្រាប់ថា រដ្ឋបាលលោកប្តេជ្ញាបន្តជួយអ៊ុយក្រែន ក្នុងការប្រយុទ្ធដើម្បីសេរីភាព។ ក្នុងន័យដាក់សំពាធទៅលើសភាខុនហ្រ្កេស លោកបៃដិន បានលើកឡើងថា ប្រវត្តិសាស្ត្រនឹងវិនិច្ឆ័យទោស អ្នកដែលសម្រេចចិត្តបែរខ្នងដាក់អ៊ុយក្រែននាពេលនេះ។
ចេញពីវ៉ាស៊ីនតោនដែលមិនសូវមានសង្ឃឹមថាបានប្រាក់ លោកហ្សេឡេនស្គីបានបន្តដំណើរទៅអូស្លូភ្លាម ដើម្បីជួបជាមួយថ្នាក់ដឹកនាំក្រុមប្រទេសស្កង់ឌីណាវទាំង៥ និយាយអំពីជំនួយថវិកាបន្ថែមទៀត។ គួរបញ្ជាក់ដែរថា ន័រវែសនិងដាណឺម៉ាក ធ្លាប់បានផ្តល់រថក្រោះ កាណុង និងគ្រាប់កាំភ្លើងទៅឲ្យអ៊ុយក្រែន។ ប្រទេសទាំង២នេះ បានសន្យាផងដែរ ថានឹងផ្តល់យន្តហោះចម្បាំង F-16 ទៅឲ្យអ៊ុយក្រែន។
កាលពីដើមឆ្នាំនេះ ន័រវែសបានសន្យាថានឹងជួយ រវាង២០២៣ដល់២០២៧ ទាំងផ្នែកស៊ីវីលនិងកងទ័ព ក្នុងទំហំទឹកប្រាក់ ចំនួន៦៨០០លានអឺរ៉ូ។ ចំណែក ស៊ុយអែតវិញ បានប្រកាសថា នឹងផ្តល់ជាសម្ភារៈយោធា ក្នុងទឹកប្រាក់ប្រមាណ១៩០លានអឺរ៉ូ។ ស៊ុតអែតបញ្ជាក់ផងដែរ ថាកំពុងពិចារណា រឿងប្រគល់យន្តហោះចម្បាំង ប្រភេទGripen ទៅឲ្យអ៊ុយក្រែន។
សូមបញ្ជាក់ដែរថា សហភាពអឺរ៉ុបនឹងប្រជុំនៅថ្ងៃទី១៤ធ្នូ ដើម្បីសម្រេចអំពីកញ្ចប់ថវិកាថ្មីជួយអ៊ុយក្រែន។ នៅក្នុងសន្និសីទកាសែតនៅអូស្លូ ក្រោយជួបលោកនាយករដ្ឋមន្ត្រីន័រវែស លោកហ្សេឡេនស្គី បានថ្លែងរន្ធាន់សុំឲ្យសម្ព័ន្ធមិត្តទាំងអស់ មិនថាអឺរ៉ុប មិនថាអាមេរិក ត្រូវតែបន្តជួយអ៊ុយក្រែន ព្រោះអ៊ុយក្រែនម្នាក់ឯង មិនអាចយកឈ្នះរុស្ស៊ីបានឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ