រុស្ស៊ី កោះហៅទូតហ្វាំងឡង់ ក្រោយពីប្រទេសនេះចុះកិច្ចព្រមព្រៀងយោធាជាមួយសហរដ្ឋអាមេរិក
ថ្ងៃអង្គារ ទី១៩ ខែធ្នូ រដ្ឋធានីម៉ូស្គូ បានកោះហៅទូតហ្វាំងឡង់ប្រចាំនៅរុស្ស៊ី ដើម្បីសម្តែងការតវ៉ា ជំទាស់នឹង កិច្ចព្រមព្រៀងថ្មី ស្តីអំពីការការពារ ចុះហត្ថលេខា រវាង រដ្ឋបាលក្រុងហែលស៊ីនគី និងរដ្ឋបាលក្រុងវ៉ាស៊ីនតោន។ ក្រសួងការបរទេសរុស្ស៊ី បានថ្លែងប្រតិកម្មខឹងសម្បារថា កិច្ចព្រមព្រៀងនេះ បើកទូលាយឲ្យ សហរដ្ឋអាមេរិក ចូលទៅក្នុងតំបន់នៅតាមបណ្តោយព្រំដែនដ៏វែង នៃប្រទេស រុស្ស៊ី តែម្តង។
ចុះផ្សាយនៅថ្ងៃ៖
ស្តាប់ - ០២:៣១
មួយឆ្នាំក្រោយការលុកលុយរបស់រុស្ស៊ីចូលអ៊ុយក្រែន គឺប្រទេសហ្វាំងឡង់ បានសម្រេចសុំចូលជាសមាជិកបក្សសម្ព័ន្ធ អូតង់ ជាផ្លូវការ។ មិនត្រឹមតែប៉ុណ្ណេះ នៅថ្ងៃចន្ទ ទី១៨ ធ្នូ រដ្ឋបាលក្រុងហែលស៊ីនគី ក៏បានចុះកិច្ចព្រមព្រៀងថែមទៀត ដើម្បីពង្រឹងសហប្រតិបត្តិការយោធា ជាមួយសហរដ្ឋអាមេរិក។ មុនការប្រកាសចុះហត្ថលេខា ពួកមន្ត្រីទទួលខុសត្រូវហ្វាំងឡង់ បានថ្លែងបន្លឺឡើងដែរថា កិច្ចព្រមព្រៀងនេះ អនុញ្ញាតជាអាទិ៍ ឲ្យសហរដ្ឋអាមេរិក ចូលខ្លួនយ៉ាងលឿននិងផ្តល់ជំនួយសង្គ្រោះដល់ហ្វាំងឡង់ ក្នុងករណីមានជម្លោះកើតឡើង។
ចំណែក ភាគីរុស្ស៊ី យល់ថា កិច្ចព្រមព្រៀងថ្មីនេះមានលក្ខណៈឈ្លានពាន ពីខាង ហ្វាំងឡង់ និង បណ្តាសម្ព័ន្ធមិត្ត របស់ប្រទេសនេះ។ ដូច្នេះហើយ ទើប ក្រសួងការបរទេសរុស្ស៊ី បានកោះហៅ ឯកអគ្គរដ្ឋទូតហ្វាំងឡង់ ទៅបំភ្លឺ។ រុស្ស៊ី ក៏បានបញ្ជាក់ប្រាប់សមភាគីជាព័ត៌មានមានថា រដ្ឋបាលម៉ូស្គូ នឹងពុំទុកដោយគ្មានចម្លើយឡើយ ការដែល ហ្វាំងឡង់ រឹតចំណងយោធា ជាមួយ អូតង់។ នេះបើតាម អ្នកនាំពាក្យក្រសួងការបរទេសរុស្ស៊ី លោកស្រី Maria Zakharova។ សេចក្តីជូនដំណឹងរបស់ក្រសួងការបរទេសរុស្ស៊ី បានលម្អិតទៀតថា រុស្ស៊ីចាត់ទុករឿងនេះជាការគំរាមដល់សន្តិសុខជាតិខ្លួន ហើយ រដ្ឋបាលទីក្រុងម៉ូស្គូ នឹងចាត់វិធានការចាំបាច់ ប្រឈមនឹងសេចក្តីសម្រេចទាំងនេះ។
គួរបញ្ជាក់ថា កិច្ចព្រមព្រៀង រវាង ក្រុងហែលស៊ីនគី និង វ៉ាស៊ីនតោន មានរាយឈ្មោះ ទីតាំង និង មណ្ឌល ចំនួន ១៥ នៅក្នុងប្រទេស ហ្វាំងឡង់ ដែលក្នុងនោះមានមូលដ្ឋានទ័ពអាកាស ៤ កន្លែង និង កំពង់ផែយោធា ១ ផង។ ពីអំណឺះទៅ កងទ័ពអាមេរិក អាចមានលទ្ធភាពចូលខ្លួនទៅកាន់ហ្វាំងឡង់ដោយសេរី និងក៏អាចស្តុកទុក សម្ភារៈ យោធា ហើយនិង ស្បៀងសឹក បានទៀតផង។
កិច្ចព្រមព្រៀងយោធាបែបៗនេះ ក៏បានត្រូវចុះហត្ថលេខា ក្នុងថ្ងៃអង្គារ រវាង សហរដ្ឋអាមរិក និង ដាណឺម៉ាក ដែលអនុញ្ញាតឲ្យ ពួកទាហានអាមេរិក ដែលប្រចាំការនៅលើដីដាណឺម៉ាក មានលទ្ធភាពចូលទៅយ៉ាងងាយ។ នេះបើតាមការថ្លែងរបស់ នាយករដ្ឋមន្ត្រីដាណឺម៉ាក លោកស្រី Mette Frederiksen និងដែលឲ្យដឹងដែរថា វាមានសុពលភាពសម្រាប់រយៈពេល ១០ ឆ្នាំឯណោះ។ សូមរំឭកដែរថា សហរដ្ឋអាមេរិក បានចុះរួចស្រេចទៅហើយនូវកិច្ចព្រមព្រៀងយោធាដូចគ្នានេះ ជាមួយ បណ្តាប្រទេសជាច្រើនទៀត នៅអឺរ៉ុបខាងកើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ