លោក ណាវ៉ាល់នី ត្រូវផ្ទេរទៅពន្ធនាគារឆ្ងាយដាច់ស្រយាល ខណៈការបោះឆ្នោតខិតជិតមកដល់
នៅរុស្ស៊ី លោក អាឡិចសី ណាវ៉ាល់នី មេប្រឆាំងនឹងរបបវិមានក្រេមឡាំង ដែលកំពុងជាប់ឃុំ ស្រាប់តែបាត់ខ្លួន ស្ងាត់ដំណឹងសូន្យឈឹង ជាច្រើនសប្តាហ៍មកហើយ។ ថ្ងៃចន្ទ ទី២៥ធ្នូ ក្រមមេធាវីរបស់លោក ចេញមុខ ប្រកាសប្រាប់ថា គេបានរកឃើញទីតាំងឃុំឃាំងខ្លួនរបស់រូបលោក ណាវ៉ាល់នី ហើយ។ នេះបើតាមអ្នកស្រីមេធាវី គីរ៉ា យ៉ារមីយ្ស៍ ដែលបន្ទរឲ្យដឹងទៀតថា លោកសុខសប្បាយធម្មតាទេ។
ចុះផ្សាយនៅថ្ងៃ៖
ស្តាប់ - ០៣:១៩
ការបង្ហើបអំពីដំណឹងសុខទុក្ខរបស់បុរសមេប្រឆាំងនឹងរបបក្រុងម៉ូស្គូនេះ បានបន្ធូរសម្រាលភាពភ័យព្រួយរបស់អ្នកគាំទ្រជាខ្លាំង។ នេះក៏ពីព្រោះថា ច្រើនសប្តាហ៍មកនេះ គ្មាននរណាម្នាក់បានដឹងថា លោក ណាវ៉ាល់នី បាត់ខ្លួនទៅណានោះឡើយ។ ទន្ទឹមនោះ មេធាវីម្នាក់ទៀតរបស់មេជនប្រឆាំង គឺលោក អ៊ីវ៉ាន់ ស្តានូវ បានថ្លែងអំណរគុណដល់អ្នកស្រឡាញ់លោក ណាវ៉ាល់នី ហើយអរគុណដល់សកម្មជនសិទ្ធិមនុស្ស ពួកអ្នកកាសែត និងប្រព័ន្ធផ្សព្វផ្សាយនានា ដែលខំជួយព្រួយបារម្ភ និងតាមដានឈឺឆ្អាល រុករកដំណឹងព័ត៌មានពីរូបលោក ណាវ៉ាល់នី ឥតស្រាកស្រាន្ត។
បើតាមប្រភពក្រុមមេធាវីរបស់ប្រមុខមេប្រឆាំង គឺនៅពេលនេះ លោក អាឡិចសី ណាវ៉ាល់នី កំពុងតែជាប់ឃុំ ក្នុងពន្ធនាគារមួយ នៅ ឃាប់ ជាតំបន់តូចមួយ ឆ្ងាយដាច់ស្រយាល ក្នុងតំបន់ទឹកកកអាក់ទិក នាប៉ែកខាងជើងប្រទេសរុស្ស៊ី។ នោះគឺជា ពន្ធនាគារកម្រិតធ្ងន់ធ្ងរ សម្រាប់ដាក់អ្នកទោសឧក្រិដ្ឋកាចសាហាវ ឬទណ្ឌិតដែលត្រូវជាប់គុក អស់១ជីវិត។ មន្ទីរឃុំឃាំងនេះ មានចម្ងាយរហូតដល់ ១ ៩០០ គីឡូម៉ែត្រឯណោះ ពីរដ្ឋធានីម៉ូស្គូ។ ផ្ទុយខុសពី មន្ទីរអប់រំកែប្រែដែលដាក់ឃុំរូបលោកពីមុន វាឆ្ងាយត្រឹមតែ ២៣៥ គីឡូម៉ែត្រប៉ុណ្ណោះ ពីក្រុងម៉ូស្គូ។
លោកមេធាវី អ៊ីវ៉ាន់ ស្តានូវ បានវិភាគមើលឃើញថា ការណ៍ដែលគេយកលោក អាឡិចសី ណាវ៉ាល់នី ទៅឃុំឃាំងឆ្ងាយដល់ថ្នាក់នេះ គឺ រដ្ឋអំណាចក្រុងម៉ូស្គូ ចង់បញ្ចៀសអ្នកប្រឆាំងឲ្យទៅឆ្ងាយ និងកុំឲ្យរំខានដល់ដំណើរការបោះឆ្នោតប្រធានាធិបតីរុស្ស៊ី ដែលនឹងត្រូវរៀបចំឡើង ខែមីនា ឆ្នាំ២០២៤ គឺ នៅសល់តែ ៣ខែទៀតប៉ុណ្ណោះ។
សូមរំឭកថា ប្រមុខដឹកនាំប្រឆាំង លោក អាឡិចសី ណាវ៉ាល់នី ធ្លាប់ត្រូវគេបំពុលហៀបតែនឹងផុតជីវិត តែត្រូវសង្គ្រោះព្យាបាលជាសះស្បើយវិញ នៅប្រទេសអាល្លឺម៉ង់។ ដើមឆ្នាំ២០២១ ពេលលោកធ្វើដំណើរត្រឡប់ចូលស្រុកវិញ ក៏ត្រូវនគរបាលរុស្ស៊ីចាប់ខ្លួន និងត្រូវតុលាការកាត់ទោស លើបទចោទប្រកាន់ជាច្រើនករណី។ ក្នុងខែសីហាឆ្នាំនេះ សាលក្រមថ្មី១ទៀត បានដាក់ទោសរូបលោក ឲ្យជាប់ពន្ធនាគារ ១៩ ឆ្នាំ ពីបទ«ជ្រុលនិយម»។
តាំងតែពីថ្ងៃទី៦ធ្នូមក អ្នកទោសមនសិការរូបនេះ បានស្ងាត់បាត់ដំណឹងឈឹង។ នេះក៏ព្រោះតែការផ្ទេរអ្នកទោសនៅរុស្ស៊ី ច្រើនតែដឹកតាមរថភ្លើង ជាច្រើនដំណាក់ និងស៊ីពេលយូរ ហើយគ្រួសារគ្មានទទួលដំណឹងជាមុនសោះ។ ការណ៍នេះបង្កជាក្តីបារម្ភ ហើយបណ្តាប្រទេសសហភាពអឺរ៉ុប ព្រមទាំងអង្គការសហប្រជាជាតិ ក៏បានថ្លែងក្តីព្រួយខ្លាំងដែរ។ រដ្ឋបាលទីក្រុងវ៉ាស៊ីន ក៏ថែមទៀតឆ្លៀតប្រកូកប្រកាសឲ្យដោះលែងលោក ណាវ៉ាល់នី ជាបន្ទាន់ផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ