ប្រមុខទូតអាមេរិក-ចិន ជួបគ្នានៅអាល្លឺម៉ង់ ពិភាក្សាអំពីសំណុំរឿងអន្តរជាតិនិងបញ្ហាទ្វេភាគី
នៅប្រទេសអាល្លឺម៉ង់ រដ្ឋមន្រ្តីក្រសួងការបរទេសសហរដ្ឋអាមេរិក បានជួបសំណេះសំណាលជាមួយនឹងរដ្ឋមន្រ្តីក្រសួងការបរទេសចិន ក្នុងឱកាសសន្និសីទក្រុងម៉ុយនិចស្តីពីសន្តិសុខ។ ប្រមុខទូតអាមេរិក លោក អង់តូនី ប្ល៊ីងកិន បានសម្តែងក្តីបារម្ភអំពីបញ្ហាក្នុងតំបន់ប្រាប់ទៅប្រមុខទូតចិន។ រីឯ លោក វ៉ាង យី បានស្នើឲ្យ សហរដ្ឋអាមេរិក លើកលែងទណ្ឌកម្មទាំងឡាយដែលបានដាក់ចំពោះចិន។ នេះបើតាមការឲ្យដឹងអំពីសំណាក់អ្នកនាំពាក្យក្រសួងការបរទេសអាមេរិក លោក ម៉ាតធីវ មីល្ល័រ នៅថ្ងៃសៅរ៍ទី១៧កុម្ភៈ។
ចុះផ្សាយនៅថ្ងៃ៖
ស្តាប់ - ០២:៤៨
ក្នុងជំនួបជាមួយសមភាគីចិននៅអាល្លឺម៉ង់ រដ្ឋមន្រ្តីក្រសួងការបរទេសអាមេរិក លោក អង់តូនី ប្ល៊ីងកិន បានលើកឡើងពីសារៈសំខាន់នៃការធានារក្សាសន្តិភាពនៅ កោះតៃវ៉ាន់ ហើយនិងនៅក្នុងតំបន់សមុទ្រចិន។ នេះបើតាមអ្នកនាំពាក្យក្រសួងការបរទេសអាមេរិក លោក ម៉ាតធីវ មីល្ល័រ ដោយបញ្ជាក់ទៀតថា ប្រមុខទូតអាមេរិក ក៏បានរំឭកអំពីក្តីព្រួយបារម្ភពាក់ព័ន្ធនឹងការគាំទ្ររបស់ ចិន ចំពោះរុស្ស៊ី ក្នុងសង្គ្រាមឈ្លានពាននៅអ៊ុយក្រែន ហើយនិងព្រួយបារម្ភពីការជ្រោមជ្រែងរបស់ចិន ក្នុងឧស្សាហកម្មផលិតគ្រឿងសព្វាវុធរុស្ស៊ី។ ពាក់ព័ន្ធនឹងរុស្ស៊ី រដ្ឋមន្រ្តីការបរទេសអាមេរិក ក៏សម្តែងមន្ទិលសង្ស័យអំពីសមត្ថភាពប្រឆាំងផ្កាយរណបរបស់រុស្ស៊ី ប្រាប់ទៅលោក វ៉ាង យី។ ចំពោះសហរដ្ឋអាមេរិក ប្រព័ន្ធប្រឆាំងផ្កាយរណបរបស់រុស្ស៊ី ជាប្រភពគំរាមកំហែងធំ។
កង្វល់ទាំងអស់នេះបានដឹងឮដល់រដ្ឋមន្ត្រីការបរទេសចិន ដ្បិតថា ភាគីទាំង២ បានជជែកគ្នាដោយបើកចំហ ដោយត្រង់ទៅត្រង់មក ហើយឈរលើស្មារតីកិច្ចស្ថាបនា។ នេះបើយោងតាមសេចក្តីថ្លែងការណ៍ការទូត។
ក្រសួងការបរទេសចិន វិញ ក៏បានចេញសេចក្តីថ្លែងការណ៍ផ្ទាល់ខ្លួនដែរ ដោយបញ្ជាក់ថា ប្រមុខទូតចិន លោក វ៉ាង យី បានស្នើឲ្យសមភាគីអាមេរិក លើកលែងទណ្ឌកម្មទាំងឡាយប្រឆាំងនឹងក្រុមហ៊ុនចិន ហើយនិង បញ្ឈប់អំពើទាំងឡាយទាំងពួងប្រឆាំងនឹងប្រជាជនចិន។ ប្រមុខទូតចិន លោក វ៉ាង យី សង្កត់ធ្ងន់ថា សហរដ្ឋអាមេរិក ត្រូវបញ្ចប់ការរើសអើង បញ្ឈប់ការធ្វើទុក្ខបុកម្នេញនិងកោះហៅជំរិតសួរយកចម្លើយពីប្រជាជនចិន។ ផ្ទុយទៅវិញ សហរដ្ឋអាមេរិក គួរតែប្រឹងសកម្មភាពផ្សេងៗដើម្បីឈានទៅបង្កើនការយល់គ្នាទៅវិញទៅមក រវាងប្រជាពលរដ្ឋទាំងពីរ។
នៅទីក្រុងម៉ុយនិច ប្រទេសអាល្លឺម៉ង់ ក្នុងឱកាសជួបគ្នារបស់ប្រមុខការទូតអាមេរិកចិន ភាគីទាំង២សុទ្ធតែឲ្យតម្លៃខ្ពស់ទៅលើសារៈសំខាន់នៃការបន្តជជែកគ្នា។ ការបន្តជជែកគ្នារវាងចិននិងអាមេរិក ឋិតក្រោមក្របខណ្ឌពង្រឹងកិច្ចសន្ទនាគ្នា ផ្តួចផ្តើមដោយ លោក ចូ បៃដិន និងលោក ស៊ី ជីនពីង ដែលប្រធានាធិបតីទាំងពីរ បានជួបគ្នា នៅរដ្ឋកាលីហ្វ័រញ៉ា កាលពីខែវិច្ឆិកា ឆ្នាំទៅមិញ។ កាលពីដើមឆ្នាំទៅមិញ ប្រទេសទាំង២ បានឈ្លោះទាស់សម្តីគ្នាសម្បើមណាស់ ជុំវិញសំណុំរឿងបាឡុងចារកិច្ច។
ប្រភពពីទីភ្នាក់ងារព័ត៌មានបារាំងអាអេហ្វប៉េ ក្នុងជំនួបរដ្ឋមន្ត្រីការបរទេសលើកនេះ ភាគីទាំងពីរក៏បានបង្ហាញចេតនាសហការគ្នា ប្រកបដោយសេចក្តីទទួលខុសត្រូវ នៅលើវិស័យជាច្រើន ហើយជាពិសេស គឺចេតនាចង់ចូលរួមទប់ស្កាត់គ្រឿងញៀនសំយោគ ប្រភេទហ្វង់តានីល ដែលរីករាលដាលខ្លាំងនៅសហរដ្ឋអាមេរិក និងបានសម្លាប់ពលរដ្ឋអាមេរិក អស់ច្រើន រាប់រយនាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ