ស្លាប់អ្នកនេសាទចិន៖ តៃវ៉ាន់ និងចិនចង្អុលមុខចោទគ្នាទៅវិញ ទៅមក
ចិន និងតៃវ៉ាន់កំពុងឈានចូលក្នុងដំណាក់កាលប្រឈមមុខគ្នាដ៏គ្រោះថ្នាក់ បន្ទាប់ពីអ្នកនេសាទចិន ពីរនាក់ស្លាប់ នៅក្នុងការប៉ះទង្គិចគ្នាជាមួយឆ្មាំសមុទ្រតៃវ៉ាន់ កាលពីថ្ងៃពុធទី ១៤កុម្ភៈ។ ក្រោយឧប្បត្តិហេតុស្លាប់អ្នកនេសាទជនជាតិខ្លួន ចិន បានទាមទារការឆ្លើយបំភ្លឺជាបន្ទាន់ពីតៃវ៉ាន់។ ប៉ុន្តែ តៃវ៉ាន់វិញទាមទារឲ្យចិនជួយឃាត់កុំឲ្យអ្នកនេសាទរបស់ខ្លួន បើកទូកចូលខុសច្បាប់ក្នុងដែនទឹករបស់តៃវ៉ាន់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៧
ស្ថានការណ៍នៅច្រកសមុទ្រតៃវ៉ាន់ កាន់តែតានតឹងឡើងមួយកម្រិត បន្ទាប់ពីអ្នកនេសាទចិនពីរនាក់ស្លាប់ នៅក្នុងហេតុការណ៍ តាមប្រមាញ់ដេញរបស់ឆ្មាំសមុទ្រតៃវ៉ាន់ កាលពីថ្ងៃពុធ ទី ១៤កុម្ភៈ។ តាមទីភ្នាក់ងារព័ត៌មានតៃវ៉ាន់ CNA ឧប្បត្តិហេតុលើកនេះ កើតឡើង នៅក្បែរកោះKimenរបស់តៃវ៉ាន់ នៅពេលទូកល្បឿនលឿនរបស់អ្នកនេសាទចិនមួយគ្រឿងបើកចូលដោយខុសច្បាប់ ក្នុងដែនទឹករបស់តៃវ៉ាន់។ នៅពេលបើកគេចចេញពីការតាមប្រមាញ់របស់កប៉ាល់ល្បាតតៃវ៉ាន់ ទូករបស់អ្នកនេសាទចិនក្រឡាប់ និងធ្វើឲ្យមនុស្ស៤នាក់ធ្លាក់ក្នុងទឹក។
នៅក្នុងសេចក្តីថ្លែងការណ៍នៅថ្ងៃព្រហស្បតិ៍ អ្នកនាំពាក្យរបស់ការិយាល័យចិនទទួលបន្ទុកកិច្ចការតៃវ៉ាន់ ទាមទារឲ្យតៃវ៉ាន់ត្រូវតែឆ្លើយបំភ្លឺជុំវិញហេតុការណ៍ ព្រោះថា ចិនយល់ថា ឧប្បត្តិហេតុដែលតៃវ៉ាន់លើកឡើង ជាឧប្បត្តិហេតុបែបបន្លំពុតត្បុតរបស់តៃវ៉ាន់តែប៉ុណ្ណោះ។
ក្រុមប្រឹក្សាកិច្ចការដីគោក ទទួលបន្ទុកទំនាក់ទំនងជាមួយចិន បានចេញមុខការពារឆ្មាំសមុទ្រតៃវ៉ាន់ថា បានធ្វើឡើងយ៉ាងតឹ្រមត្រូវ តាមច្បាប់ និងថា គឺទូកអ្នកនេសាទចិនទេ ដែលបើករត់គេច មិនព្រមសហការជាមួយឆ្មាំសមុទ្រតៃវ៉ាន់។ ម្យ៉ាង នៅក្នុងពេលមានគ្រោះថ្នាក់ក្រឡាប់ទូកទៀតសោត ឆ្មាំសមុទ្រតៃវ៉ាន់បានចុះទៅស្រង់ ជួយសង្រ្គោះភ្លាមៗ ប៉ុន្តែ មនុស្ស២នាក់ដាច់ខ្យល់ស្លាប់ ចំណែក ២នាក់ទៀតត្រូវដឹកយកទៅសង្រ្គោះបន្ទាន់នៅមន្ទីរពេទ្យលើកោះ Kimen របស់តៃវ៉ាន់។ នៅក្នុងពេលរង់ចាំការស៊ើបអង្កេត ឆ្មាំសមុទ្រតៃវ៉ាន់នឹងជូនដំណឹងទៅគ្រួសារជនរងគ្រោះ ដែលស្លាប់នៅក្នុងឧប្បត្តិហេតុលើកនេះ។
នៅក្នុងសេចក្តីថ្លែងការណ៍ ក្រុមប្រឹក្សាតៃវ៉ាន់ទទួលបន្ទុកទំនាក់ទំនងជាមួយចិនបានទម្លាក់ការទទួលខុសត្រូវលើអាជ្ញាធរចិនដីគោក ដែលនៅតែបណ្តោយបើកដៃឲ្យជនជាតិចិន ចូលមកនេសាទ ក្នុងដែនទឹករបស់តៃវ៉ាន់។
យោងតាមអាជ្ញាធរតៃវ៉ាន់ នៅប៉ុន្មានឆ្នាំចុងក្រោយនេះ ជនជាតិចិនកាន់តែច្រើនបានបើកទូកចូលដោយខុសច្បាប់ ក្នុងដែនទឹករបស់តៃវ៉ាន់ ដើម្បីបូមដីខ្សាច់ នេសាទដោយប្រើគ្រឿងផ្ទុះ ឬយកសំរាមមកចាក់ក្នុងដែនសមុទ្រតៃវ៉ាន់។ ទោះជាតៃវ៉ាន់បានអំពាវនាវម្តងហើយ ម្តងទៀត ឲ្យចិនពង្រឹងការគ្រប់គ្រងសកម្មភាពនេសាទរបស់ជនជាតិខ្លួន ប៉ុន្តែ ស្ថានការណ៍មិនបានប្រសើរទាល់តែសោះ។ អ្នកនេសាទចិននៅតែបន្តផ្គើន បើកទូកចូលដែនទឹកតៃវ៉ាន់ ជាពិសេសនៅក្នុងអំឡុងបុណ្យចូលឆ្នាំចិន វេលាដែលជនជាតិចិន ចូលចិត្តទៅនេសាទចាប់ត្រីសមុទ្រដែលមានតម្លៃថ្លៃៗ។
ឧប្បត្តិហេតុ ដែលមានស្លាប់ជនជាតិចិន ដោយសារការតាមប្រមាញ់របស់ឆ្មាំសមុទ្រតៃវ៉ាន់ មិនមែនជាសញ្ញាល្អទេសម្រាប់ចិន និងតៃវ៉ាន់ ដែលកាន់តែមើលមុខគ្នាលែងចំ ចាប់តាំងពីតៃវ៉ាន់បោះឆ្នោតជ្រើសរើសប្រធានាធិបតីថ្មី ដែលនៅតែប្រកាន់ជំហរតឹងដាក់ចិន។ ទោះប្រធានាធិបតីចិន លោកស៊ី ជីនពីងគំរាមហើយថា នឹងបង្រួបបង្រួមជាមួយតៃវ៉ាន់មកក្នុងទឹកដីចិន ទោះជាត្រូវប្រើកម្លាំងយោធា ប៉ុន្តែ តៃវ៉ាន់នៅតែជ្រើសរើសលោកឡៃ ជីងតឹ មកពីគណបក្សដែលមានទម្លាប់តស៊ូមតិចង់ឲ្យតៃវ៉ាន់ឯករាជ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ